[1] Masakɛ Dawuda y'a fɔ jama bɛɛ ye ko: «Ala ye ne denkɛ Solomani kelenpe ɲɛnatɔmɔ. Denmisɛn don fɔlɔ, a si ma se fɔlɔ nka baara ka bon, k'a masɔrɔ o so tɛna kɛ mɔgɔ ta ye fɔ Matigi Ala ta.
[2] Ne yɛrɛ ta fan fɛ, ne ye ne se kow bɛɛ kɛ ka labɛnni kɛ ne ka Ala ka so jɔli kama, sanu fɛnw dila sanu ani warijɛ fɛnw dila warijɛ ani nsiranɛgɛ fɛnw dila nsiranɛgɛ ani nɛgɛfin fɛnw dila nɛgɛfin ani jirima fɛnw dila jiri ani onikis kabakurunw ani kabakurun cɔrɔtaw ni kabakurunw ɲɛ sifaw ani kabakurun sɔngɔ gɛlɛn sifaw bɛɛ ani kabakurun jɛman ɲuman ɲuman caman.
[3] Sanu ni warijɛ caman fana bɛ ne yɛrɛ tigitigi bolo. Ne bɛ o di ne ka Ala ka so kosɔn k'a fara fɛn labɛnnenw bɛɛ kan so senuma jɔli kama, katuguni ne ka Ala ka so ko ka di ne ye haali.
[4] O kasabi ye sanu talan waa saba ye, Ofir sanu don, ani warijɛ yɛrɛwolo talan waa wolonwula. Olu bɛ kɛ so kɔnɔ labɛnni kama,
[5] sanu fɛnw dila sanu ani warijɛ fɛnw dila warijɛ maɲɛrɛ dɔnnaw ka baaraw bɛɛ kama. Ayiwa jɔn bɛ aw cɛma min b'a fɛ ka a ka diyaɲe nili fɛn di Matigi ma bi?»
[6] O tuma la Israɛl bɔnsɔn na gwatigiw ni siyaw kuntigiw ni cɛ waa kelen-kelen kuntigiw ani cɛ kɛmɛ-kɛmɛ kuntigiw ani masakɛ ka nafolo kɔlɔsibaaw bɛɛ ye u ka nili fɛnw di ni ɲagali ye.
[7] U ye sanu talan waa duuru ni darik waa tan ani warijɛ talan waa tan ani nsiranɛgɛ talan waa tan ni segin ani nɛgɛfin talan waa kɛmɛ di Ala ka so baara kama.
[8] Kabakurun sɔngɔ gɛlɛnw tun bɛ minw fɛ, olu y'u di Gersɔn bɔnsɔn Jehiɛl ma Matigi ka nafolo mara yɔrɔ la.
[9] Mɔgɔw nisɔndiyara o nili ko la, k'a masɔrɔ u y'a kɛ ni dusukun jɛlen ye Matigi ye. Masakɛ Dawuda fana ɲagalila kosɛbɛ.
[10] Dawuda ye barika da Matigi ye jama bɛɛ ɲɛ kɔrɔ yen ko: «Matigi, an fa Israɛl ka Ala, e ka kan ni tanuli ye badaa badaa.
[11] Bonya ni barika ani saramaya ye e de ta ye, Matigi, katuguni sankolola fɛnw ni dugukolo kan fɛnw ye e de ta ye. Matigi, masaya ye e de ta ye fɛn bɛɛ kun na.
[12] Fɛntigiya ni nɔɔrɔ bɔra e de la. E bɛ fɛn bɛɛ kun na. Barika ni sebaaya bɛ e de bolo. E bolo bɛ se ka fɛn bɛɛ lawuli ka u sinsin.
[13] Ayiwa sisan an ka Ala, an bɛ barika da i ye ka i tɔgɔ nɔɔrɔma bonya.
[14] Ne ye mun ye, ne ka mɔgɔw fana ye mun ye fo an bɛ se ka na nin ɲɔgɔn nili fɛnw di i ma? Ɔwɔ, fɛn bɛɛ bɛ bɔ e de fɛ, an ye fɛn minw di i ma, an ye olu bɛɛ sɔrɔ e fɛ.
[15] An ye dunanw ni siginfɛw ye i ɲɛ kɔrɔ i ko an bɛnbaw tun bɛ cogo min na. An si tilew bɛɛ bɛ i ko ja minw tɛ mɛn dugukolo kan.
[16] Matigi, an ka Ala, an ye nin nafoloba min labɛn walisa ka batoli so jɔ i ye, olu bɛɛ bɛ bɔ e de fɛ, olu bɛɛ ye e de ta ye.
[17] Ne ka Ala, ne y'a dɔn ko i bɛ mɔgɔ dusukun sɛgɛsɛgɛ, ko tilennen ka di i ye, o de kosɔn ne ye nin nili fɛnw di ni diyaɲe ni dusukun tilennen ye. Ne ɲɛ bɛ i ka mɔgɔw nisɔndiyalen lajɛlen na o cogo kelen na ka na nin nili fɛnw di i ma ni diyaɲe ye.
[18] Matigi, an bɛnbaw Ibrahima ni Isaka ani Israɛl ka Ala, i ka nin ɲɔgɔn miirili ni ɲagali bila nin mɔgɔw dusukunw na tuma bɛɛ ka u dusukunw sinsin i la.
[19] I ka dusukun dafalen di ne denkɛ Solomani fana ma walisa a ka i ka sariyaw ni i ka ci fɔlenw ani i ka ko latigɛlenw mara ka u bɛɛ kɛ. Ne ye labɛnni kɛ Alabatosoba jɔli kama, a ka o so jɔ.»
[20] Dawuda y'a fɔ jama bɛɛ ye ko: «Aw ka Matigi aw ka Ala tanu.» Jama bɛɛ ye barika da Matigi u bɛnbaw ka Ala ye. U ye u biri Matigi ni masakɛ ɲɛ kɔrɔ.
[21] O dugusajɛ u ye saraka ni saraka jenitaw bɔ Matigi ye, ntura waa kelen kɛra saraka jenita ye, ani sagajigi waa kelen ani sagaden waa kelen ani minnifɛn saraka ani saraka caman wɛrɛw Israɛl bɔnsɔn bɛɛ kosɔn.
[22] U ye dumuni kɛ ka minni kɛ Matigi ɲɛ kɔrɔ o don na ka ɲagali kosɛbɛ. U ye Dawuda denkɛ Solomani sigi siɲɛ filanan la ka kɛ masakɛ ye. U y'a mun Matigi ɲɛ kɔrɔ k'a kɛ masakɛ ye, ka Zadɔk mun k'o kɛ sarakalasebaa ye.
[23] O tuma la Solomani sigira Matigi ka masasigilan kan ka kɛ masakɛ ye a fa Dawuda nɔ na. A ka kɛtaw ɲɛna. Israɛl bɔnsɔn bɛɛ y'a bonya.
[24] Kuntigiw bɛɛ ni kɛlɛkɛ cɛ farinw bɛɛ ani masakɛ Dawuda denkɛw bɛɛ kolola masakɛ Solomani ye.
[25] Matigi ye sebaayaba di Solomani ma Israɛl bɔnsɔn bɛɛ ɲɛ kɔrɔ, ka masaya sarama di a ma ka tɛmɛn a ɲɛ fɛ mɔgɔw Israɛl bɔnsɔn ka masakɛw bɛɛ kan.
[26] Ayiwa, Isayi denkɛ Dawuda ye san binaani kɛ masaya la Israɛl bɔnsɔn bɛɛ kun na. A ye san wolonwula kɛ masaya la Heborɔn ka san bisaba ni saba kɛ masaya la Jerusalɛm.
[28] A kɔrɔlen wasalen fɛntigima nɔɔrɔma sara. A ye si jan sɔrɔ. A denkɛ Solomani kɛra masakɛ ye a nɔ na.
[29] Masakɛ Dawuda ka ko kɛlen fɔlɔw ni a labanw bɛɛ sɛbɛnnen bɛ yelikɛla Samuɛl ka kitabu ni kira Natan ka kitabu ani yelikɛla Gad ka kitabu kɔnɔ,
[30] a ka masaya cogoyaw bɛɛ ni a ka se sɔrɔli kow bɛɛ ani ko minw kɛra a tilew la Israɛl bɔnsɔn ka jamana ni jamana tɔw bɛɛ kɔnɔ, olu bɛɛ sɛbɛnnen bɛ o kitabuw kɔnɔ.