[1] Ayiwa u taara ni Ala ka wagande ye. Dawuda tun ye finiso min dila wagande ye, u y'a sigi o finiso cɛmancɛ la ka sarakaw ni diyaɲe nili fɛnw lase Ala ɲɛ kɔrɔ.
[2] Dawuda tilalen kɔ sarakaw ni diyaɲe nili fɛnw laseli la, a ye dubaw kɛ mɔgɔw ye Matigi tɔgɔ la.
[3] A ye buurukun kelen ni sogo dɔɔnin ani rezɛn jalen kun kelen di Israɛl bɔnsɔn mɔgɔw bɛɛ kelen-kelen ma, cɛ fara muso kan.
[4] Dawuda ye Levitew sigi ka baara kɛ Ala ka wagande ɲɛ fɛ ka seli kɛ ka Matigi, Israɛl ka Ala tanu kosɛbɛ.
[5] Olu kuntigi tun ye Asaf ye, o filanan tun ye Zakari ye ani Jeiɛl ni Semiramɔt ni Jehiɛl ni Matitia ni Eliab ni Benaja ni Obɛd-Edɔm ani Jeiɛl. Fɔlifɛnw tun bɛ u fɛ, olu tun ye npɔlɔnw ni nkɔniw ye. Nsiranɛgɛ tɛgɛrɛw tun bɛ Asaf bolo.
[6] Sarakalasebaaw Benaja ni Jakaziɛl tun bɛ buru fyɛ Ala ka layidu wagande ɲɛ tuma bɛɛ.
[7] O don tun ye Dawuda siɲɛ fɔlɔ ye ka Asaf ni a balimakɛw bila Matigi tanuli la.
[8] Aw ka barika da Matigi ye ka a tɔgɔ wele. Aw ka a ka koba kɛlenw fɔ siyaw ye.
[9] Aw ka dɔnkili da ka ɲagali a ɲɛ kɔrɔ. A' ye a ka kabakoba kɛlenw lakali.
[10] Aw ka ɲagali a tɔgɔ senuma kosɔn, Matigi ɲinibaaw dusukunw ka ɲagali.
[11] Aw ka Matigi ni a ka dɛmɛni barikama ɲini. Aw ka a tanu tuma bɛɛ.
[12] Aw, a ka jɔnw, Israɛl bɔnsɔn, a ka ɲɛnatɔmɔlenw, Yakuba bɔnsɔn, aw ka aw hakili to a ka ko ɲuman kɛlenw la, a ka kabakow ani a da ye kiri ko minw fɔ.
[14] Ale de ye Matigi an ka Ala ye, a ka kiri tigɛlenw bɛ dugukolo yɔrɔw bɛɛ la.
[15] Aw ka aw hakili to a ka layidu la tuma bɛɛ, a ye kuma minw di bɔnsɔn waa kelen ma,
[16] a ye o layidu min ta Ibrahima ye ani a ka kalili Isaka ye.
[17] A y'a fɔ Yakuba ye k'a kɛ sariya sigilen ye k'a kɛ layidu banbali ye Israɛl ye.
[18] A ko: «Ne na Kanan jamana di i ma, o ye aw niyɔrɔ ye.»
[19] U tun ka dɔgɔ kosɛbɛ, u tun ye dunanw ye jamana kɔnɔ.
[20] U tun bɛ yaalayaala siyaw cɛma, ka bɔ mara dɔ la ka taa siya wɛrɛ la.
[21] Ala ma sɔn mɔgɔ si ka a fanga digi u la ka u tɔɔrɔ, a ye masakɛw kɔrɔfɔ u kosɔn, ko:
[22] «Aw kana maga ne ka ɲɛnatɔmɔlenw na, aw kana ko jugu kɛ ne ka kiraw la.»
[23] Dugukolo kan mɔgɔw bɛɛ ka dɔnkili da Matigi ye. Aw ka a ka kisili ko welewele da don o don.
[24] Aw ka a nɔɔrɔ kibaru fɔ siyaw cɛma ka a ka kabako kɛlenw lakali siyaw bɛɛ ye.
[25] K'a masɔrɔ Matigi ka bon, a ka kan ni tanuli banbali ye. Siran ka kan ka kɛ a ɲɛ ka tɛmɛn bato fɛn tɔw bɛɛ kan.
[26] Ɔwɔ, mɔgɔw ka bato fɛnw ye boliw ye, nka Matigi de ye sankolo da.
[27] Nɔɔrɔ ni senumaya bɛ a fan bɛɛ la, barika ni ɲagali bɛ a ka yɔrɔ senuma fa.
[28] Mɔgɔw siyaw bɛɛ, a' ye na ka Matigi bonya. Aw ka a nɔɔrɔ ni a fanga ko fɔ.
[29] Aw ka nɔɔrɔ da Matigi tɔgɔ kan, a ka kan n'a ye. A' ye na ni nili fɛnw ye ka u bila Matigi ɲɛ kɔrɔ. Aw ka Matigi bato, aw masirilen ni senuya ye.
[30] Aw ka yɛrɛyɛrɛ a ɲɛ kɔrɔ, dugukolo kan sigibaaw bɛɛ. Dugukolo sabatilen don, a tɛ se ka lamaga.
[31] Sankolow ka ɲagali, dugukolo ka ɲagalikan bɔ, k'a fɔ siyaw cɛma ko: «Matigi bɛ masaya la fɛn bɛɛ kun na.»
[32] Kɔgɔji ni a kɔnɔ fɛnw bɛɛ ka mankanba bɔ, kungo kɔnɔna ni a kɔnɔ fɛnw bɛɛ ka ɲagali.
[33] Kungo kɔnɔ jiriw ka dɔnkili da ka ɲagali Matigi ɲɛ kɔrɔ, k'a masɔrɔ a bɛ na ka kiri tigɛ dugukolo kan.
[34] Aw ka barika da Matigi ye katuguni a ka ɲi, katuguni a ka makari tɛna ban.
[35] Aw k'a fɔ ko: «An ka kisilitigi Ala ka an kisi, ka an lajɛ ka an tila ka bɔ siyaw bolo walisa an ka i tɔgɔ senuma bonya, an ka ɲagali sɔrɔ i tanuli la.»
[36] Matigi, Israɛl ka Ala ka tanu tuma bɛɛ. O tuma la mɔgɔw bɛɛ y'a fɔ ko: «Amiina, Matigi ka tanu.»
[37] O kɔ, Dawuda ye Matigi ka layidu wagande baara to Asaf ni a balimaw bolo, olu ka o baara kɛ wagande ɲɛ fɛ tuma bɛɛ ka kɛɲɛ ni don o don mago ye.
[38] A ye da kɔlɔsili baara fana to Jedutun denkɛ Obɛd-Edɔm ni Hosa ani u balimaw bolo. Olu bɛɛ lajɛlen tun ye mɔgɔ biwɔɔrɔ ni segin ye.
[39] Batoli kɛ yɔrɔ min tun bɛ Gabaon, a ye sarakalasebaa Zadɔk ni a balimaw sigi ka kɛ Matigi ka so kɔnɔ baarakɛlaw ye yen.
[40] U ka saraka jenita lase Matigi ma saraka jenita saraka bɔlan kan tuma bɛɛ, sɔgɔma ni wula da fɛ ka kɛɲɛ ni Matigi ka sariya ko sɛbɛnnen bɛɛ ye, a ye o min fɔ Israɛl bɔnsɔn ye.
[41] Heman ni Jedutun tun bɛ u fɛ yen ka fara mɔgɔ ɲɛnatɔmɔlenw bɛɛ kan. Olu tɔgɔw fɔra walisa u ka barika da Matigi ye a ka makari banbali kosɔn.
[42] Heman ni Jedutun fana tun bɛ u fɛ yen. Buru ni nsiranɛgɛ tɛgɛrɛw tun bɛ u bolo. Olu ka baara tun ye fɔlifɛn fɔli ye ka bɛn ni dɔnkili ye. Jedutun denkɛw tun ye dakɔlɔsibaaw ye.
[43] Mɔgɔw bɛɛ kelen-kelen taara u ka so kɔnɔ. Dawuda fana kɔseginna ka taa dubaw kɛ a ka so mɔgɔw ye.