[1] O kɔ, Dawuda ye Filisitikaw kɛlɛ ka se sɔrɔ u kan, u kolola a ye. A ye Gat dugu ni a dafɛ duguw minɛ Filisitikaw la.
[2] Dawuda ye se sɔrɔ Moab bɔnsɔn fana kan. Moab bɔnsɔn kolola Dawuda ye ka faama wari sara a ye.
[3] Zoba masakɛ Hadadezɛr tun bɛ sira kan ko a bɛ taa Ufrate ba yɔrɔw bɛɛ mara tuma min na, Dawuda ye a kɛlɛ ka se sɔrɔ a kan fo ka taa se Hamat donda la.
[4] Dawuda ye wotoro waa kelen ni sotigi waa wolonwula ani sennama waa mugan minɛ. A ye wotoro sow bɛɛ kɔsen fasabaw tigɛ, nka a ye wotoro kɛmɛ la sow to yen.
[5] Sirika minw sigilen tun bɛ Damasi, olu nana Zoba masakɛ Hadadezɛr dɛmɛ. Dawuda ye olu la cɛ waa mugan ni fila faga.
[6] O kɔ, a ye a ka kɛlɛkɛ cɛ dɔw sigi Damasi, Siri jamana la. Sirikaw kɛra Dawuda ka jɔnw ye ka faama wari di a ma. Matigi ye se di Dawuda ma a taa yɔrɔw bɛɛ la.
[7] Hadadezɛr ka baaradenw tun ye sanu nɛgɛ bɛnnan minw minɛ, Dawuda ye olu minɛ ka taa ni u ye Jerusalɛm.
[8] A taara ni nsiranɛgɛ dama dɔnbali caman fana ye ka bɔ Hadadezɛr ka duguw Tibehat ni Kun kɔnɔ. Solomani ye olu ta ka kɛ nsiranɛgɛ faaba ni samasenw ani nsiranɛgɛ baarakɛ minanw ye.
[9] Hamat masakɛ Tohu y'a mɛn ko Dawuda ye se sɔrɔ Zoba masakɛ Hadadezɛr ka kɛlɛkɛ cɛw kan tuma min na,
[10] a y'a denkɛ Hadoram ci ka taa masakɛ Dawuda sɛgɛrɛ ka foli di a ma k'a tanu, sabu a ye masakɛ Hadadezɛr kɛlɛ ka se sɔrɔ a kan. Hadadezɛr tun bɛ Tohu kɛlɛ tuma bɛɛ. Hadoram ye sanu ni warijɛ ani nsiranɛgɛ daga sifaw bɛɛ ci Dawuda ma o waati kelen na.
[11] Masakɛ Dawuda ye olu di Matigi ma, ani a tun ye warijɛ ni sanu minw minɛ Edɔmkaw ni Moab bɔnsɔn ni Amɔn bɔnsɔn ni Filisitikaw ani Amalɛk bɔnsɔn siyaw bɛɛ la.
[12] Zeruja denkɛ Abisai ye Edɔmkaw cɛ waa tan ni segin faga jɛkɛnɛ kɔgɔma la.
[13] A y'a ka kɛlɛkɛ cɛ dɔw sigi Edɔm jamana la. Edɔmkaw bɛɛ kɛra Dawuda ka jɔnw ye. Matigi tora Dawuda fɛ ka se di a ma a taa yɔrɔw bɛɛ la.
[14] Dawuda ye Israɛl bɔnsɔn bɛɛ mara. A y'a ka mɔgɔw bɛɛ mara ni tilennenya ye. A ma mɔgɔ bɔ mɔgɔ la.
[15] Zeruja denkɛ Joab tun ye kɛlɛbolo kuntigi ye. Akilud denkɛ Josafat tun ye tilew kibaru sɛbɛnnikɛla ye.
[16] Akitub denkɛ Zadɔk ani Abiatar denkɛ Abimelɛk tun ye sarakalasebaaw ye. Savisa tun ye sɛbɛnnikɛla ye.
[17] Jehojada denkɛ Benaja tun ye Kereti mɔgɔw ni Peleti mɔgɔw kuntigi ye. Dawuda denkɛw tun ye masakɛ kɔrɔ faamaw ye.