[1] Tir masakɛ Hiram ye cidenw ci ka taa ni sedere jiriw ye Dawuda fɛ yen. A ye kaba dɛsɛlaw ani jiri dɛsɛlaw fana ci walisa ka masaya so jɔ a ye.
[2] O tuma la Dawuda y'a dɔn ko Matigi ye a ka masaya sabati Israɛl bɔnsɔn cɛma k'a masɔrɔ a ka masaya bonyara a ka mɔgɔ Israɛl bɔnsɔn kosɔn.
[3] Dawuda ye muso wɛrɛw ta Jerusalɛm. A ye denkɛw ni denmusow sɔrɔ.
[4] A ye den minw sɔrɔ k'a to Jerusalɛm, olu tɔgɔw filɛ ninw ye, Samua ni Sobab ni Natan ni Solomani
[5] ni Jibar ni Elisua ni Elipelɛt
[6] ni Noga ni Nefɛg ani Jafia
[7] ni Elisama ni Beɛljada ani Elifelɛt.
[8] Filisitikaw y'a mɛn ko Dawuda munna ka kɛ Israɛl bɔnsɔn bɛɛ ka masakɛ ye tuma min na, u wulila ka taa a kama k'a kɛlɛ. O fɔra Dawuda ye minkɛ, a wulila ka u kunbɛn.
[9] Ayiwa Filisitikaw ye u fɛnsɛ Refaim jɛkɛnɛ la.
[10] O tuma la Dawuda ye Ala ɲininka ko: «Ne ka taa Filisitikaw kama, i na u don ne bolo wa?» Matigi y'a jaabi ko: «I ka taa, ne na u don i bolo.»
[11] Filisitikaw ye u madon ka se fo Bal-Perazim, Dawuda ye se sɔrɔ u kan yen. O kɔ, a ko: «Ala ye ne juguw jɛnsɛn ne bolo fɛ i n'a fɔ ba woyo karilen.» O de kosɔn u ye o yɔrɔ tɔgɔ da ko Bal-Perazim.
[12] Filisitikaw bolila ka u ka boliw to yen. Olu jenina ka kɛɲɛ ni Dawuda ka ci fɔlen ye.
[13] O waati la Filisitikaw ye u fɛnsɛ o jɛkɛnɛ la ko kura.
[14] Dawuda ye Ala ɲininka ko kura. Ala y'a jaabi ko: «I kana u kɛlɛ u kɔ fɛ, i ka munumunu ka taa u ɲɛ fɛ muriye jirisunw kuntilenna la.
[15] Ni i ye senkan mɛn o jirisunw san fɛ, o tuma la i ka kɛlɛ kɛ, sabu Ala bɛ taa i ɲɛ fɛ ka Filisitikaw ka kɛlɛbolo gosi.»
[16] Ala ye min fɔ Dawuda ye, a ye o kɛ. Israɛl bɔnsɔn ye Filisitikaw ka kɛlɛbolo gosi ka bɔ Gabaon fo ka taa se Gezɛr.
[17] Dawuda tɔgɔ bɔra jamana bɛɛ la ka taa a fɛ. Matigi y'a to siyaw bɛɛ ka siran a ɲɛ.