[1] Filisitikaw taara Israɛl bɔnsɔn kɛlɛ Gilboa kulu kan. Israɛl bɔnsɔn bolila u ɲɛ. Israɛl bɔnsɔn caman fagara yen.
[2] Filisitikaw tugura Saul ni a denkɛw nɔ fɛ. U ye Saul denkɛw Jonatan ni Abinadab ani Maliki-Sua faga.
[3] Kɛlɛ juguyara Saul ma. Bɔnnikɛ kalatigiw kura a la, biɲɛ y'a sɔrɔ fo k'a jogin.
[4] Saul y'a fɔ a ka kɛlɛkɛ minan tabaa ye ko: «I ka npan foosi k'a turu ne la walisa o bolokobaliw kana kɛ ne sababu ye.» Nka a ka kɛlɛkɛ minan tabaa ma sɔn, k'a masɔrɔ a siranna. O tuma la Saul y'a ka npan foosi ka i turu o kan.
[5] Saul ka kɛlɛkɛ minan tabaa y'a ye ko Saul sara minkɛ, o fana y'i turu a ka npan kan, o sara.
[6] Ayiwa Saul ni a denkɛ saba bɛɛ sara ɲɔgɔn fɛ. Mɔgɔ si ma to min bɛ sigi a nɔ na.
[7] Israɛl bɔnsɔn minw sigilen tun bɛ jɛkɛnɛ la, olu y'a ye ko kɛlɛbolow bolila, ko Saul ni a denkɛw fana sara, olu bɔra u ka duguw kɔnɔ ka boli ka taa. Filisitikaw taara u sigi o yɔrɔw la.
[8] O dugusajɛ Filisitikaw nana suw wɔrɔn. U ye Saul ni a denkɛw sɔrɔ Gilboa kulu kan.
[9] U ye u wɔrɔn ka taa ni Saul kunkolo ni a ka kɛlɛkɛ minanw ye. O kɔ, u ye ci bila ka taa Filisiti jamana yɔrɔw bɛɛ la ka o kibaru duman fɔ u ka bato fɛnw ni mɔgɔw bɛɛ ye.
[10] U ye Saul ka kɛlɛkɛ minanw bila u ka bato fɛn batoso kɔnɔ ka Saul kunkolo gengen u ka bato fɛn Dagon batoso kɔnɔ.
[11] Jabɛs-Galadkaw ye Filisitikaw ka ko kɛlen mɛn Saul la minkɛ,
[12] olu ka kɛlɛkɛ cɛ ja gɛlɛnw taara Saul ni a denkɛw suw ta ka taa ni u ye Jabɛs. Olu ye u kolow don terebente sun kɔrɔ Jabɛs, ka sun don tile wolonwula kɔnɔ.
[13] Ayiwa Saul sara a ka filili kosɔn, a ye o min kɛ Matigi la katuguni a ma Matigi ka ciw kɛ. A ye sukilila fana ɲininka.
[14] A ma sɔn ka Matigi ɲininka. O de kosɔn Matigi y'a to a ka faga ka masaya di Isayi denkɛ Dawuda ma.