[1] Israɛl denkɛ fɔlɔ Rubɛn denkɛw filɛ ninw ye. Israɛl denkɛ fɔlɔ don, nka a ye a fa ka dalan nɔgɔ, o de y'a to a ka kɔrɔya tɔnɔ dira Israɛl denkɛ Yusufu denkɛw ma. O bɛɛ n'a ta Yusufu buruju ma sɛbɛn ka kɛɲɛ ni den fɔlɔya cogo ye.
[2] Juda ye bonya sɔrɔ ka tɛmɛn a balimakɛw kan, kuntigi bɔra ale la, nka kɔrɔya tɔnɔ kɛra Yusufu ta ye.
[3] Israɛl denkɛ fɔlɔ Rubɛn denkɛw tun ye Henɔk ni Palu ni Hɛzrɔn ani Karmi ye.
[4] Joɛl denkɛ tun ye Semaɛja ye. Semaɛja denkɛ tun ye Gog ye. Gog denkɛ tun ye Simei ye.
[5] Simei denkɛ tun ye Mise ye. Mise denkɛ tun ye Reaja ye. Reaja denkɛ tun ye Bal ye.
[6] Bal denkɛ tun ye Beera ye. Rubɛn bɔnsɔn kuntigi dɔ tun don. Asiri masakɛ Tilgat-Pilnesɛr y'a minɛ ka taa n'a ye.
[7] Beera balimakɛw filɛ ninw ye ka kɛɲɛ ni u ka gwaw ye u bɔnsɔn buruju sɛbɛn la, u kuntigiw tun ye Jeiɛl ni Zakari
[8] ni Azaz denkɛ Bela ye. Azaz fa tun ye Sema ye. Sema fa tun ye Joɛl ye. Bela ka gwaw sigilen tun bɛ Aroɛr fo ka taa se Nebɔ kulu ni Bal-Meon ma.
[9] U ka baganw jiidira Galad jamana la, o de kosɔn u sigi yɔrɔ dancɛ sera fo kɔrɔn yanfan fɛ kungokolon ma, o min bɛ se Ufrate ba ma.
[10] Saul tilew la, u ye Hagar siya kɛlɛ ka olu faga ka sigi u ka finisow kɔnɔ Galad ni kɔrɔn cɛ jamana bɛɛ la.
[11] Gad bɔnsɔn sigira u kuntilenna la Basan jamana la fo ka taa se Salika.
[12] U kuntigi Joɛl ka gwaw ni a kɔrɔsigibaa Safam ka gwaw tun bɛ yen ani Jaenai ni Safat ka gwaw sigira yen.
[13] U balima minw bɔra u bɛnbaw bɔnsɔnw na, olu tun ye Mikaɛl ni Mesulam ni Seba ni Jorai ni Jaekan ni Ziya ani Ebɛr ye. Olu tun ye mɔgɔ wolonwula ye.
[14] Olu tun ye Huri denkɛ Abihail denkɛw ye. Huri fa tun ye Jaroak ye. Jaroak fa tun ye Galad ye, Galad fa tun ye Mikaɛl ye. Mikaɛl fa tun ye Jesisai ye. Jesisai fa tun ye Jakido ye. Jakido fa tun ye Buz ye.
[15] Guni denkɛ Abdiɛl denkɛ Aki tun ye u bɛnbaw bɔnsɔnw kuntigi ye.
[16] U sigira Basan jamana la Galad ani a dafɛ duguw ni Saron lamini kungo la fo ka taa se u dancɛw ma.
[17] Olu bɛɛ tɔgɔw sɛbɛnna buruju kitabu kɔnɔ, Juda ka masakɛ Jotam ani Israɛl ka masakɛ Jeroboam tilew la.
[18] Rubɛn siya ni Gad siya ni Manase siya tilancɛ, olu la cɛ ja gɛlɛnw, nɛgɛ bɛnnan ni npantigiw, bɔnnikɛ kalatigiw, kɛlɛ ɲɛ dɔnbaaw tun ye cɛ waa binaani ani kɛmɛ wolonwula ani cɛ biwɔɔrɔ ye. U kalannen tun don kɛlɛ la.
[19] U ye Hagar siya ni Jetur ni Nafis ani Nodab duguw kɛlɛ.
[20] Ka u to kɛlɛ la, u kasira Ala nɔ fɛ katuguni u ye u jigi da a kan. A ye u ka delili lamɛn ka u dɛmɛ ka Hagar siya ni olu fɛ mɔgɔw bɛɛ don u bolo.
[21] U ye olu ka baganw bɛɛ cɛ, u ka ɲaamɛ waa biduuru ani saga waa kɛmɛ fila ni waa biduuru ani fali waa fila, ka mɔgɔ waa kɛmɛ fana minɛ.
[22] U juguw caman fagara katuguni nin kɛlɛ tun ye Ala nɔ ye. U sigira o mɔgɔw nɔ na fo ka taa se u ka jɔnya tuma ma.
[23] Manase siya tilancɛ bɔnsɔn cayara. Ka bɔ Basan fo ka taa se Bal-Hermɔn ni Senir ani Hermɔn kulu ma, u sigira o jamana la.
[24] U bɛnbaw bɔnsɔnw kuntigiw filɛ ninw ye, Efɛr ni Jisei ni Eliɛl ni Aziriɛl ni Jeremi ni Hodavia ani Jakdiɛl. Olu tun ye cɛ farinma ja gɛlɛnw tɔgɔbatigiw ye.
[25] U bɛnbaw bɔnsɔnw kuntigiw tun don. U ye u faw ka Ala hakɛ ta. Ala tun ye o jamana siya minw halaki ka bɔ u ɲɛ, u tugura olu ka bato fɛnw nɔ fɛ.
[26] Israɛl ka Ala ye Asiri masakɛ Pul ani Asiri masakɛ Tilgat-Pilnesɛr lawuli u kama. Tilgat-Pilnesɛr ye Rubɛn siya ni Gad siya ni Manase siya tilancɛ cɛ ka taa ni u ye fo Kalak ni Kabor ni Hara ani Gozan ba dala. U bɛ yen fo ka na se bi ma.