[1] Israɛl bɔnsɔn bɛɛ y'u lajɛ Dawuda kɔrɔ Heborɔn k'a fɔ a ye ko: «A filɛ, an ye i kolow ni i farisogo dɔ ye.
[2] Waati tɛmɛnnen na, ka Saul to an kun na, e de tun ye Israɛl bɔnsɔn ɲɛminɛbaa ye ka taa kɛlɛ la ka segin ni u ye o waati la. Matigi, i ka Ala y'a fɔ i ye ko: ‹I na sigi ne ka mɔgɔw, Israɛl bɔnsɔn kun na ka kɛ u marabaa ye, i na kɛ ne ka mɔgɔw, Israɛl bɔnsɔn kuntigi ye.›»
[3] O tuma la Israɛl bɔnsɔn cɛkɔrɔbaw bɛɛ taara masakɛ sɛgɛrɛ Heborɔn. Dawuda ye layidu ta u ye Matigi ɲɛ kɔrɔ yen. U ye Dawuda mun k'a kɛ Israɛl bɔnsɔn ka masakɛ ye ka kɛɲɛ ni Matigi ka kuma fɔlen ye Samuɛl fɛ.
[4] Dawuda ani Israɛl bɔnsɔn bɛɛ taara daga Jerusalɛm da la. O ye Jebus ye, sabu Jebuskaw sigilen tun bɛ jamana kɔnɔ.
[5] Jebuskaw y'a fɔ Dawuda ye ko: «I tɛna don yan.» Nka Dawuda ye Sion kɛlɛ kunbɛn so minɛ, o de kɛra Dawuda ka dugu ye.
[6] O y'a sɔrɔ Dawuda tun y'a fɔ ko: «Ni mɔgɔ o mɔgɔ ye Jebuska dɔ faga, o tigi na kɛ kuntigi ni kɛlɛbolo kuntigi ye.» Joab fɔlɔ ye kɛlɛ daminɛ, ale kɛra kuntigi ye. A ba tɔgɔ ko Zeruja.
[7] Dawuda sigira o kɛlɛ kunbɛn so kɔnɔ, o de kosɔn u ye o tɔgɔ da ko Dawuda ka dugu.
[8] A ye kogo kɛ ka dugu lamini k'a daminɛ Milo fo ka dugu lamini. Joab ye dugu tɔ labɛn.
[9] Dawuda ka masaya tun bɛ bonya ka taa a fɛ katuguni Kɛlɛbolow Matigi tun bɛ a fɛ.
[10] Kuntigi kɛlɛkɛ cɛ farin minw tun bɛ Dawuda ka baara la ni olu ni Israɛl bɔnsɔn bɛɛ jɛra ka a sigi masaya la ka kɛ masakɛ ye ka kɛɲɛ ni Matigi ka kuma fɔlen ye Israɛl ko la,
[11] olu filɛ ninw ye, Hakmoni denkɛ Jasobeam, o tun ye o cɛ saba kuntigi ye. Ale de ye a ka tama kɛ ka cɛ kɛmɛ saba faga yɔrɔ nin kelen na.
[12] Akosi bɔnsɔn Dodo denkɛ Eleazar dara ale kan. O bɔra Ahoha. O kuntigi saba la kelen tun don.
[13] Ale de tun bɛ Dawuda fɛ Pas-Damim Filisitikaw ɲɔgɔn lajɛ waati la ka kɛlɛ kɛ. Orje foro dɔ tun bɛ o yɔrɔ la, mɔgɔw bolila Filisitikaw ɲɛ yen.
[14] Ale ni a fɛ cɛw ye u jɔ o foro cɛmancɛ la ka Filisitikaw bali yen na ani ka u faga. Matigi ye koba kɛ a ka mɔgɔw ye yen ka se di u ma.
[15] Ka Filisitikaw dagalen to Refaim jɛkɛnɛ la, kuntigi bisaba la cɛ saba taara Dawuda sɛgɛrɛ Adulam kuluwo kɔnɔ fara kan.
[16] Dawuda tun bɛ yɛrɛ kun dogo yɔrɔ la o waati la. Filisitikaw ka kɛlɛbolo kelen tun ye Bɛtilɛhɛm minɛ.
[17] Dawuda y'a fɔ ko: «E, jɔn na taa Bɛtilɛhɛm dugu donda la kɔlɔn ji dɔ bɔ k'a di ne ma ne ka ne min?»
[18] O tuma la o kuntigi saba taara Filisitikaw ka daga cɛ tigɛ ka ji bɔ Bɛtilɛhɛm donda la kɔlɔn na ka taa ni o ji ye k'o di Dawuda ma. Nka a ma sɔn k'a min, a y'a bɔn duguma Matigi ye
[19] k'a fɔ ko: «Ne ka Ala ka ne kisi nin kɛli ma. Nin cɛ minw kɛra yɛrɛfagasuw ye ka taa, ne ka olu joli min wa? Katuguni olu ye u ni fili ka na o ji di ne ma.» A ma sɔn ka o min. O kuntigi cɛ farin saba ye o kow kɛ.
[20] Joab balimakɛ Abisai tun ye o cɛ bisaba kuntigi ye. Ale de ye cɛ kɛmɛ saba faga ni a ka tama ye. O kuntigi bisaba la kelen tun don.
[21] Ale tɔgɔ bɔlen tun don ka tɛmɛn cɛ bisaba kan. A kɛra olu kuntigi ye, nka a tun tɛ o cɛ saba fɔlɔw bɔ.
[22] Jehojada denkɛ Benaja dara ale kan. Kɛlɛkɛ cɛ farin denkɛ tun don ka bɔ Kabzeɛl. Ale ye Moab bɔnsɔn cɛ barikama fila faga. Ale jiginna ji dingɛ kɔnɔ nɛnɛ waati la. Waraba dɔ tun bɛ yen. A ye o faga.
[23] A ye Misiraka dɔ fana faga. O jɔ kundama tun ye nɔnkɔn ɲɛ duuru ye. Tama belebele tun bɛ o Misiraka bolo i ko gese dalaw ka bankalama. Benaja jiginna ka taa a kama ni bere ye ka a ka tama minɛ a la, ka o Misiraka faga ni o tama ye.
[24] Jehojada denkɛ Benaja ye min kɛ, o filɛ o ye. Ale tun ye o kuntigi bisaba la kelen ye.
[25] Ale tɔgɔ bɔlen tun bɛ ka tɛmɛn o cɛ bisaba kan nka a tun tɛ o cɛ saba fɔlɔw bɔ. Dawuda ye a kɛ a ka kɔlɔsibaaw kuntigi ye.
[26] Kɛlɛkɛ cɛ farinw filɛ ninw ye, Joab balimakɛ Asaɛl ani Dodo denkɛ Elkanan ka bɔ Bɛtilɛhɛm,
[27] ani Samɔt ka bɔ Haror ani Helɛz ka bɔ Palon,
[28] ani Ikɛs denkɛ Ira ka bɔ Tekoa ani Abiezɛr ka bɔ Anatɔt
[29] ani Sibekai ka bɔ Husa ani Ilai ka bɔ Akoak
[30] ani Maharai ka bɔ Netofa ani Baana denkɛ Helɛd ka bɔ Netofa
[31] ani Ribai denkɛ Itai ka bɔ Gibea, o ye Benjamɛn bɔnsɔn ka dugu ye, ani Benaja ka bɔ Piraton
[32] ani Hurai ka bɔ Nakale-Gas ani Abiɛl ka bɔ Araba
[33] ani Azmavɛt ka bɔ Bakarum ani Eliakba ka bɔ Salbon
[34] ani Bene-Hasem ka bɔ Gizon ani Sage denkɛ Jonatan ka bɔ Harar
[35] ani Sakar denkɛ Akiam ka bɔ Harar ani Ur denkɛ Elifal
[36] ani Hefɛr ka bɔ Mekera ani Akija ka bɔ Palon
[37] ani Hɛzrɔn ka bɔ Karmɛl ani Ezbai denkɛ Narai
[38] ani Natan balimakɛ Joɛl ani Hagari denkɛ Mibkar
[39] ani Amɔn bɔnsɔn Zelɛk ani Zeruja denkɛ Joab ka kɛlɛkɛ minan tabaa Nakarai ka bɔ Berot
[40] ani Ira ka bɔ Jetɛr ani Garɛb ka bɔ Jetɛr
[41] ani Hɛti bɔnsɔn Uri ani Aklai denkɛ Zabad
[42] ani Siza denkɛ Adina, o tun ye Rubɛn bɔnsɔn kuntigi ye, kɛlɛkɛ cɛ bisaba tun bɛ ale fɛ,
[43] ani Maka denkɛ Hanan ani Josafat ka bɔ Mitini
[44] ani Oziasi ka bɔ Astarɔt ani Hotam denkɛw Sama ni Jehiɛl ka bɔ Aroɛr
[45] ani Simri denkɛ Jediaɛl ni a balimakɛ Joka ka bɔ Tizi
[46] ani Eliɛl ka bɔ Makavim ani Elinam denkɛw Jeribai ni Josavia ani Moab bɔnsɔn Jitma
[47] ani Eliɛl ni Obɛd ani Jasiɛl ka bɔ Mezobaja.