[1] Dawuda ni cɛ waa kelen-kelen kuntigiw ani cɛ kɛmɛ-kɛmɛ kuntigiw ani faamaw bɛɛ ye ɲɔgɔn ye.
[2] O kɔ, Dawuda y'a fɔ Israɛl bɔnsɔn jama bɛɛ ye ko: «Ni a diyara aw ye, ni a kɛra Matigi an ka Ala sago ye, an ka ci bila ka taa an balimaw ma, olu minw bɛ Israɛl jamana yɔrɔw bɛɛ la ani sarakalasebaaw ni Levitew ka duguw ni u dafɛlaw la walisa olu ka lajɛ an fɛ yan.
[3] An ka na ni Ala ka wagande ye an fɛ yan k'a masɔrɔ an ma miiri o la Saul ka waati la.»
[4] Jama bee sɔnna o kuma fɔlen ma, o diyara mɔgɔw bɛɛ ye.
[5] O tuma la Dawuda ye Israɛl bɔnsɔn bɛɛ wele k'a daminɛ Misira jamana dugu Sikor la fo ka taa se Hamat donda la walisa u ka na ni Ala ka wagande ye ka bɔ Kirjat-Jearim.
[6] O tuma la Dawuda ni Israɛl bɔnsɔn bɛɛ taara Baala, o ye Juda ka dugu Kirjat-Jearim ye, walisa ka taa ni Ala ka layidu wagande ye, Matigi sigilen bɛ o min kan serubɛnw fila furancɛ la, o bɛ wele Matigi tɔgɔ la.
[7] U ye Ala ka wagande ta k'a bɔ Abinadab ka so k'a sigi wotoro kura kɔnɔ ka taa n'a ye. Uza ni Akijo tun bɛ wotoro boli.
[8] Dawuda ni Israɛl bɔnsɔn bɛɛ tun bɛ dɔn kɛ Ala ɲɛ kɔrɔ ni u barika bɛɛ ye ka dɔnkili da ka nkɔni ni npɔlɔnw ni ntama ni nsiranɛgɛ tɛgɛrɛ fɔ ka buru fyɛ.
[9] U selen Kidon gendekɛnɛ la, misiw tun b'a fɛ ka layidu wagande labi. Uza y'a bolo mɔɔnɔbɔ ka wagande minɛ.
[10] Matigi diminna Uza kɔrɔ, a y'a gosi katuguni a y'a bolo se layidu wagande ma. Uza sara Ala ɲɛ kɔrɔ yen.
[11] Matigi ye min kɛ mɔgɔw la ka Uza faga, Dawuda diminna o kosɔn. U bɛ o yɔrɔ tɔgɔ wele ko Perɛz-Uza halibi.
[12] Dawuda siranna Ala ɲɛ o don na. A y'a fɔ ko: «Ne na taa ni Ala ka wagande ye ne ka so kɔnɔ cogo di?»
[13] Ayiwa Dawuda ma sɔn ka taa ni layidu wagande ye a ka dugu kɔnɔ nka a farala ka taa n'a ye Obɛd-Edɔm ka so Gat.
[14] Ala ka wagande ye kalo saba kɛ Obɛd-Edɔm ka so kɔnɔ. Matigi dubara Obɛd-Edɔm ka so ni a bolo fɛnw bɛɛ ye.