[1] Dawuda ye a ka sow jɔ a yɛrɛ ka dugu kɔnɔ, ka yɔrɔ dɔ labɛn Ala ka wagande ye ka finiso jɔ a kosɔn.
[2] O tuma la Dawuda y'a fɔ ko: «Mɔgɔ si man kan ka Ala ka wagande doni ni Levitew tɛ, k'a masɔrɔ Matigi ye olu ɲɛnatɔmɔ walisa u ka Ala ka wagande doni ka kɛ a baarakɛlaw ye badaa.»
[3] O kɔ, Dawuda ye Israɛl bɔnsɔn bɛɛ wele Jerusalɛm walisa ka taa ni Matigi ka wagande ye a ka yɔrɔ labɛnnen na.
[4] Dawuda ye Aron denkɛw ni Levitew fana bɛɛ lajɛ.
[5] Minw bɔra Kɛhat bɔnsɔn na, Uriɛl tun ye olu kuntigi ye, o ni a balimaw bɛɛ lajɛlen tun ye cɛ kɛmɛ ni mugan ye.
[6] Minw bɔra Mɛrari bɔnsɔn na, Asaja tun ye olu kuntigi ye, o ni a balimaw tun ye cɛ kɛmɛ fila ni mugan ye.
[7] Minw bɔra Gersɔn bɔnsɔn na, Joɛl tun ye olu kuntigi ye, o ni a balimaw tun ye cɛ kɛmɛ ni bisaba ye.
[8] Minw bɔra Elizafan bɔnsɔn na, Semaɛja tun ye olu kuntigi ye, o ni a balimaw tun ye cɛ kɛmɛ fila ye.
[9] Minw bɔra Heborɔn bɔnsɔn na, Eliɛl tun ye olu kuntigi ye, o ni a balimaw tun ye cɛ bisegin ye.
[10] Minw bɔra Uziɛl bɔnsɔn na, olu kuntigi tun ye Aminadab ye, o ni a balimaw tun ye cɛ kɛmɛ ni tan ni fila ye.
[11] O kɔ, Dawuda ye sarakalasebaaw Zadɔk ni Abiatar ani Levitew Uriɛl ni Asaja ni Joɛl ani Semaɛja ni Eliɛl ani Aminadab wele,
[12] k'a fɔ olu ye ko: «Aw minw ye Levitew ka gwaw kuntigiw ye, a' ye aw ni aw balimaw saniya walisa ka taa ni Matigi, Israɛl bɔnsɔn ka Ala ka wagande ye a ka yɔrɔ la, ne ye o min labɛn a ye.
[13] Aw tun tɛ fɔlɔ ta la, o de y'a to Matigi an ka Ala ye an gosi katuguni an ma a kɛ ka kɛɲɛ ni a ka ci fɔlen ye.»
[14] O tuma la sarakalasebaaw ni Levitew ye u yɛrɛw saniya Matigi, Israɛl bɔnsɔn ka Ala ka wagande tali kama.
[15] Levitew denkɛw ye Ala ka wagande ta u kamankun kan ni a ta berew ye, i ko Musa tun y'a fɔ ka kɛɲɛ ni Matigi ka ci fɔlen ye cogo min na.
[16] Dawuda y'a fɔ Levitew kuntigiw ye ko u ka dɔnkili dalaw ɲɛnatɔmɔ ka bɔ u balimaw la, olu ka fɔlifɛnw ni npɔlɔnw ni nkɔniw ni nsiranɛgɛ tɛgɛrɛw ta ka olu fɔ k'u ka nisɔndiya jira.
[17] O tuma la Levitew ye dɔnkili dalaw ɲɛnatɔmɔ. Olu kɛra Joɛl denkɛ Heman ni Berekia denkɛ Asaf ye ka bɔ u balimaw cɛma. Min bɔra u balimaw Mɛrari bɔnsɔn na, o tun ye Kusaja denkɛ Etan ye.
[18] Minw jɔra olu kɔ fɛ ka kɛ sira filanan ye, olu tun ye Zakari ni Ben ni Jaziɛl ni Semiramɔt ni Jehiɛl ni Uni ni Eliab ni Benaja ni Maseja ni Matitia ni Elifele ni Mikneja ni Obɛd-Edɔm ani Jeiɛl ye, olu tun ye dakɔlɔsibaaw ye.
[19] Nsiranɛgɛ tɛgɛrɛw tun bɛ dɔnkili dalaw Heman ni Asaf ani Etan bolo ka u fɔ.
[20] Zakari ni Aziɛl ni Semiramɔt ni Jehiɛl ni Uni ni Eliab ni Maseja ani Benaja, olu tun ye npɔlɔn fɔlaw ye.
[21] Matitia ni Elifele ni Mikneja ni Obɛd-Edɔm ni Jeiɛl ani Azazia tun ye nkɔni juru segin fɔlaw ye ka u ɲɛ minɛ dɔnkili la.
[22] Levitew kuntigi Kenaniya tun bɛ layidu wagande tali ko ɲɛnabɔ. A ye o doni ta cogo kɔlɔsi katuguni a hakili tun ka di kosɛbɛ.
[23] Berekia ani Elkana tun ye wagande kɔlɔsibaaw ye.
[24] Sarakalasebaaw Sebania ni Josafat ni Netaneɛl ni Amasai ni Zakari ni Benaja ani Eliezɛr tun bɛ buru fyɛ Ala ka wagande ɲɛ fɛ. Obɛd-Edɔm ani Jehija tun ye wagande tabaaw ye.
[25] Dawuda ni Israɛl bɔnsɔn cɛkɔrɔbaw ani mɔgɔ waa kelen-kelen kuntigiw taara Matigi ka layidu wagande nɔ fɛ ka bɔ Obɛd-Edɔm ka so ka na n'a ye ni ɲagaliba ye.
[26] Ala ye Matigi ka layidu wagande donibaa Levitew dɛmɛ tuma min na, u ye ntura wolonwula ni sagajigi wolonwula faga saraka ye.
[27] Lenfu fini dulɔkiba tun bɛ Dawuda kan na, Levite minw tun bɛ Ala ka wagande doni ani dɔnkili dalaw ani Kenaniya min tun bɛ layidu wagande tali ko ɲɛnabɔ, dɔ tun bɛ olu bɛɛ fana kan na. Dawuda ye lenfu fini efɔd da a kamankun kan.
[28] Israɛl bɔnsɔn bɛɛ nana ni Matigi ka layidu wagande ye Jerusalɛm ni ɲagalikanba ni biɲɛkolo burukan ani buru fyɛkan ani nsiranɛgɛ tɛgɛrɛkan ani npɔlɔn ni nkɔni fɔkan ye.
[29] Ayiwa Matigi ka layidu wagande donna Dawuda ka dugu kɔnɔ minkɛ, Saul denmuso Mikal ye filɛli kɛ finɛtiri fɛ. A ye masakɛ Dawuda pantɔ, dɔnkɛtɔ ye. A y'a mafiɲɛya a dusukun na.