[1] Ka Dawuda dogolen to Ziklag a boli tuma la Kis denkɛ Saul ɲɛ, kɛlɛkɛ cɛ farin minw taara fara a kan yen k'a dɛmɛ kɛlɛ la olu filɛ,
[2] kala bonna tɛgɛ dumanw ni kaba fililaw ani biɲɛ bonnaw tun don. U kinin ni u numan bɛɛ tun ka kan. Benjamɛn bɔnsɔnw tun don ka bɔ Saul balimaw la.
[3] U kuntigi tun ye Ahiezɛr ye. Joas dara o kan, olu tun ye Sema denkɛw ye ka bɔ Gibea ani Azmavɛt denkɛw Jeziɛl ni Pelɛt ni Beraka ani Jehu ka bɔ Anatɔt
[4] ani Jismaɛja ka bɔ Gabaon, o tun ye kɛlɛkɛ cɛ farin ye, o kuntigi cɛ bisaba la kelen tun don. Ale tun ye u kuntigi ye, ani Jeremi ni Jakaziɛl ni Jokanan ani Jozabad ka bɔ Gedera
[5] ani Eluzai ni Jerimot ni Bealia ni Semaria ni Sefatia ka bɔ Harof
[6] ani Elkana ni Jisija ni Azareɛl ni Joezɛr ani Jasobeam, olu bɔra Korɛ siya la
[7] ani Joɛla ni Zebadia, olu tun ye Jeroham denkɛw ye ka bɔ Gedor.
[8] Gad siya la kɛlɛkɛ cɛ farin minw bɔra ka taa Dawuda sɛgɛrɛ a kɛlɛ kunbɛn so la kungokolon kɔnɔ, olu kalannen tun don kɛlɛ kɛ cogo la. U tun bɛ nɛgɛ bɛnnan ni bonni cogo dɔn. U tun bɛ i ko warabaw, u sen tun ka di i ko mankalanin kuluw kan.
[9] Ezɛr tun ye olu kuntigi ye, Abdiasi tun ye a dankan ye. Eliab tun ye u sabanan ye,
[10] Mismana tun ye u naaninan ye, Jeremi tun ye u duurunan ye,
[11] Atai tun ye u wɔɔrɔnan ye, Eliɛl tun ye u wolonwulanan ye,
[12] Jokanan tun ye u seginnan ye, Elizabad tun ye u kɔnɔntɔnnan ye,
[13] Jeremi tun ye u tannan ye, Makbanai tun ye u tan ni kelennan ye.
[14] Olu bɛɛ tun ye Gad bɔnsɔnw na kɛlɛbolo kuntigiw ye. U la dɔgɔmanni tun bɛ se ka cɛ kɛmɛ kɛlɛ, u la mɔgɔba tun bɛ se ka cɛ waa kelen kɛlɛ.
[15] Olu bɛɛ ye Jurdɛn ba tigɛ san kalo fɔlɔ la, o waati y'a sɔrɔ ba fara fo ka walan. Jɛkɛnɛ la mɔgɔ minw tun bɛ kɔrɔn ni tilebi fɛ, u ye olu kɛlɛ, olu bolila u ɲɛ.
[16] Benjamɛn bɔnsɔn ni Juda bɔnsɔn dɔw taara Dawuda sɛgɛrɛ a dogo yɔrɔ la.
[17] Dawuda bɔra ka i jɔ u ɲɛ fɛ ka kuma u fɛ ko: «Ni aw nana ne yɔrɔ la ni hɛrɛ miirili ye, ne dusu ni aw ta na kɛ kelen ye, nka ni aw b'a fɛ ka ne lafili ka ne don ne juguw bolo k'a sɔrɔ ne ma ko jugu si kɛ, an bɛnbaw ka Ala ka kɛ seere ye aw ni ne cɛ, ne ka kɛta ko la ka kiri tigɛ an cɛ.»
[18] O tuma la Ala Ni jiginna cɛ bisaba kuntigi Amasai kan. O y'a fɔ ko: «An bɛ e fɛ, Dawuda, an bɛ i fɛ, Isayi denkɛ. Hɛrɛ, ɔwɔ, hɛrɛ bɛ i fɛ. Mɔgɔ minw nana i dɛmɛ, hɛrɛ bɛ olu bɛɛ fɛ, katuguni i ka Ala b'i dɛmɛ.» O tuma la Dawuda ye u ladon ka u fara a fɛ kɛlɛkɛ cɛw kan.
[19] Manase bɔnsɔn dɔw farala Dawuda kan, Dawuda taara Filisitikaw fɛ ko u bɛ Saul kɛlɛ tuma min na. Nka u ma Filisitikaw dɛmɛ katuguni Filisitikaw ka faamaw ye ɲɔgɔn ye ka Dawuda bila ka taa. U ko: «A na an janfa ka fara a kuntigi Saul kan ni an kunkolow ye a bolo.»
[20] A seginna ka taa Ziklag tuma min na, Adinak ni Jozabad ni Jediaɛl ni Mikaɛl ni Jozabad ni Elihu ani Ziltai, o kuntigi minw bɔra Manase bɔnsɔn na, olu taara a sɛgɛrɛ.
[21] U ye Dawuda dɛmɛ ka binkannikɛlaw kɛlɛ, k'a masɔrɔ kɛlɛbolo kuntigiw tun don.
[22] Mɔgɔw tun bɛ na Dawuda yɔrɔ la don o don ka fara a ka kɛlɛkɛ cɛw kan fo ka a ka kɛlɛkɛ cɛw caya ka kɛ i ko Ala ka kɛlɛbolo.
[23] Kɛlɛkɛ cɛ minw taara Dawuda sɛgɛrɛ Heborɔn walisa ka Saul ka masaya yɛlɛma k'a di Dawuda ma ka kɛɲɛ ni Matigi ka kuma fɔlen ye, olu filɛ ninw ye.
[24] Minw bɔra Juda bɔnsɔn na, o nɛgɛ bɛnnan ni tamatigi minw labɛnnen tun don kɛlɛ kama, olu bɛɛ lajɛlen kɛra cɛ waa wɔɔrɔ ni cɛ kɛmɛ segin ye.
[25] Minw bɔra Simeɔn bɔnsɔn na, olu tun ye kɛlɛkɛ cɛ farin waa wolonwula ni kɛmɛ ye. Kɛlɛbolo barikama tun don.
[26] Minw bɔra Levi bɔnsɔn na, olu tun ye cɛ waa naani ani cɛ kɛmɛ wɔɔrɔ ye.
[27] Jehojada tun ye Aron ka so ka kɛlɛbolo kuntigi ye, cɛ waa saba ni kɛmɛ wolonwula tugulen tun bɛ ale la.
[28] Kamalen barikama farinma Zadɔk ani a fa ka so mɔgɔw la kuntigi mugan ni fila.
[29] Minw bɔra Benjamɛn bɔnsɔn na, Saul balimaw kɔni, olu tun ye cɛ waa saba ye. U caman tun bɛ baara kɛ Saul ka so ye fo ka se o waati ma.
[30] Minw bɔra Efrayim bɔnsɔn na, olu tun ye cɛ waa mugan ni cɛ kɛmɛ segin ye. Olu tun ye mɔgɔ tɔgɔbaw ye u bɛnbaw bɔnsɔn cɛma.
[31] Minw ɲɛnatɔmɔna ka bɔ Manase siya tilancɛ la ka taa Dawuda sigili la masaya la, olu kɛra cɛ waa tan ni segin ye.
[32] Minw bɔra Isakar bɔnsɔn na ni mɔgɔ sɛbɛw tun don u ka waati la, ni u tun bɛ Israɛl ka kɛtaw dɔn, olu bɛɛ lajɛlen kɛra kuntigi kɛmɛ fila ye ani u balima minw tun bɛ u kan minɛ.
[33] Minw bɔra Zabulɔn bɔnsɔn na, olu tun ye kɛlɛkɛ cɛ waa biduuru ye. Olu bɛɛ miirili tun ye kelen ye kɛlɛ kama.
[34] Minw bɔra Nefitali bɔnsɔn na, olu kɛra kuntigi waa kelen ani nɛgɛ bɛnnan ni tamatigi cɛ waa bisaba ni wolonwula ye.
[35] Minw bɔra Dan siya la, olu tun ye cɛ waa mugan ni segin ani cɛ kɛmɛ wɔɔrɔ ye, olu labɛnnen tun don kɛlɛ kama.
[36] Minw bɔra Asɛr bɔnsɔn na, olu tun ye kɛlɛkɛ cɛ waa binaani ye, olu labɛnnen tun don kɛlɛ kama.
[37] Rubɛn bɔnsɔn ni Gad bɔnsɔn ani Manase siya tilancɛ, minw tun bɛ Jurdɛn ba fan dɔ fɛ, olu bɛɛ lajɛlen kɛra cɛ waa kɛmɛ ni mugan ye. Kɛlɛkɛ minan sifa bɛɛ tun bɛ u bolo.
[38] O kɛlɛkɛ cɛw bɛɛ y'u labɛn kɛlɛ kama ka taa ni dusukun kelen ye Heborɔn, ko u bɛ Dawuda sigi Israɛl bɔnsɔn kun na k'a kɛ masakɛ ye. Israɛl bɔnsɔn tɔw bɛɛ fana y'u labɛn ka Dawuda sigi k'a kɛ masakɛ ye.
[39] Olu ni Dawuda ye dumuni ni minni kɛ ɲɔgɔn fɛ tile saba kɔnɔ, k'a masɔrɔ u balimaw tun ye dumuni labɛn u ye.
[40] U tɔw ta fan fɛ, u sigiɲɔgɔn ani Isakar ni Zabulɔn bɔnsɔn ani Nefitali bɔnsɔn fana taara ni dumuni ye faliw ni ɲaamɛw ni falibaw ani misiw kan. O dumuni fɛnw tun ye farinimugu dilalen ni buurukunw ani toro mɔw ani rezɛn jalenw ni diwɛn ni tulu ani misiw ni sagakulu caman ye katuguni Israɛl bɔnsɔn nisɔndiyalen tun don kosɛbɛ.