[1] O tuma la Dawuda y'a fɔ ko: «Yan na kɛ Matigi Ala batosoba ye. Yan na kɛ Israɛl bɔnsɔn ka saraka jenitaw saraka bɔlan jɔ yɔrɔ ye.»
[2] Siginfɛ minw tun bɛ Israɛl jamana kɔnɔ, Dawuda ye olu bɛɛ lajɛ ka kaba dɛsɛlaw ɲɛnatɔmɔ olu la Ala ka so jɔli kama.
[3] Dawuda ye nɛgɛfin caman fana dila ka olu kɛ dala konw gengen pɔntiw ani u tugutugulanw ye. A ye nsiranɛgɛ dama dɔnbali caman lajɛ
[4] ani sedere jiriw dama dɔnbaliw, k'a masɔrɔ Sidɔnkaw ni Tirkaw taara Dawuda yɔrɔ la ni sedere jiri dama dɔnbaliw ye.
[5] O tuma la Dawuda y'a fɔ ko: «Ne denkɛ Solomani ye denmisɛn ye fɔlɔ, a ma kɔgɔ fɔlɔ. Ale bɛ na so min jɔ Matigi ye, o ka kan ka kɛ so ɲuman ɲuman ye fo k'a tɔgɔ bɔ jamanaw bɛɛ la. O de kosɔn ne bɛ nin fɛnw bɛɛ labɛn ne denkɛ ye.» Dawuda ye labɛnniba kɛ sani a ka sa.
[6] Dawuda ye a denkɛ Solomani wele k'a fɔ a ye k'a gɛlɛya a ma ko a ka so jɔ Matigi, Israɛl ka Ala ye.
[7] Dawuda y'a fɔ Solomani ye ko: «Ne denkɛ, ne yɛrɛ tun b'a fɛ ka so jɔ Matigi, ne ka Ala ye.
[8] Nka Matigi ka kuma sera ne ma ko: ‹I ye joli caman bɔn, i ye kɛlɛbaw kɛ, o kosɔn i tɛna so jɔ ne ye, sabu i ye joli caman bɔn duguma ne ɲɛ kɔrɔ.
[9] Nka i na denkɛ dɔ bange, o na kɛ hɛrɛden ye. Ne na hɛrɛ di a ma k'a tanga a lamini juguw bɛɛ ma. A tɔgɔ na da ko Solomani, o kɔrɔ ko hɛrɛ. Ne na hɛrɛ ni lafiya di Israɛl bɔnsɔn ma a si tilew bɛɛ la.
[10] Ale de na so jɔ ne ye, a na kɛ ne denkɛ ye, ne na kɛ a fa ye. Ne na a ka masasigilan ni a ka masaya sabati Israɛl bɔnsɔn cɛma badaa.›»
[11] Dawuda taara ɲɛ k'a fɔ ko: «Ayiwa sisan ne denkɛ, Matigi ka to i fɛ walisa i ka kɛtaw bɛɛ ka ɲɛ ka Matigi, i ka Ala ka so jɔ ka kɛɲɛ ni a ka kuma fɔlen ye i ko la.
[12] A ka hakilitigiya ni faamuli di i ma walisa i ka Israɛl bɔnsɔn mara ka Matigi, i ka Ala ka sariya fana mara.
[13] Matigi ye sariyaw ni ci fɔlen minw di Israɛl bɔnsɔn ma Musa tile la, ni i ye olu mara, i ka kɛtaw na ɲɛ. I barika bonya ka i ja gɛlɛya, i kana siran, i ja kana tigɛ.
[14] Ne sera ka fɛn minw bila Matigi ka so jɔli kama ka ne to ne ka tɔɔrɔw la fo ka na se sisan ma, olu filɛ ninw ye, sanu talan waa kɛmɛ ani warijɛ talan waa kelen sigi yɔrɔma waa kelen ani nsiranɛgɛ ni nɛgɛfin dama dɔnbali katuguni u ka ca haali. Ne ye jiriw ni kabakurunw fana labɛn nka i yɛrɛ na dɔ fara u kan.
[15] Baarakɛlaw caman bɛ i fɛ yan, kaba dɛsɛlaw ni masɔnw ani jiri dɛsɛlaw ani baara sifa bɛɛ kɛbaaw.
[16] Sanu ni warijɛ ni nsiranɛgɛ ani nɛgɛfin dama dɔnbali bɛ i fɛ yan. Ayiwa, i ka wuli sa ka baara daminɛ. Matigi ka to i fɛ.»
[17] Dawuda kumana Israɛl bɔnsɔn kuntigiw fɛ ko olu ka a denkɛ Solomani dɛmɛ.
[18] A y'a fɔ u ye ko: «Matigi, aw ka Ala tɛ aw fɛ wa? A ma lafiya di aw ma aw fan bɛɛ fɛ wa? Ayiwa, a ye jamana kɔnɔ mɔgɔw bɛɛ don ne bolo. O jamana mɔgɔw kolola Matigi ni a ka mɔgɔw ye.
[19] Sisan aw ka aw dusukun ni aw hakili to Matigi, aw ka Ala ɲinili la. Aw ka wuli sa ka Matigi Ala ka yɔrɔ senuma jɔ, walisa aw ka Matigi ka layidu wagande ni Ala ka minan senumaw ladon o so kɔnɔ, aw na o so min jɔ Matigi ye.»