[1] Dawuda y'i sigi a ka masaya so kɔnɔ tuma min na, a y'a fɔ kira Natan ye ko: «Ne sigilen bɛ sedere jiri so kɔnɔ i ko i ɲɛ b'a la cogo min na, k'a sɔrɔ Matigi ka layidu wagande sigilen bɛ finiso kɔnɔ.»
[2] Natan ye Dawuda jaabi ko: «I b'a fɛ ka fɛn o fɛn kɛ, i ka o kɛ, k'a masɔrɔ Ala bɛ i fɛ.»
[3] Nka o su fɛ Ala kumana Natan fɛ ko:
[4] «I ka taa a fɔ ne ka jɔnkɛ Dawuda ye ko Matigi ko: ‹E tɛna sigi so jɔ ne ye.
[5] I b'a dɔn ko kabini ne ye Israɛl bɔnsɔn labɔ Misira jamana la don min na fo ka na se bi ma, ne ma sigi so si kɔnɔ, nka ne sigilen tun bɛ finiso kɔnɔ ne taa yɔrɔw bɛɛ la.
[6] Ka ne to Israɛl bɔnsɔn bɛɛ fɛ u taama yɔrɔw bɛɛ la, ne ye ci fɔ kiritigɛla minw ye, ko u ka ne ka mɔgɔw Israɛl mara, ne kumana u dɔ fɛ ko, o ka sedere jiri so jɔ ne ye wa?›
[7] Sisan i k'a fɔ ne ka jɔnkɛ Dawuda ye ko Kɛlɛbolow Matigi ko: ‹Ne ye i ta ka bɔ saga gɛn yɔrɔ la ka bɔ sagaw nɔ fɛ walisa i ka kɛ ne ka mɔgɔw Israɛl kuntigi ye.
[8] Ne tora i fɛ i ka kɛtaw bɛɛ la, ne ye i juguw bɛɛ halaki ka bɔ i ɲɛ. Ne na i tɔgɔ bonya i ko dugukolo kan mɔgɔbaw tɔgɔw.
[9] Ne ye sigi yɔrɔ ɲɛnatɔmɔ ne ka mɔgɔw Israɛl bɔnsɔn ye ka u sigi yen. U sigira u yɛrɛw ka so, u tɛna yɛlɛma tun. Kojugukɛlaw tɛna u tiɲɛn tun i ko fɔlɔ cogo,
[10] i ko ne tun ye kiritigɛlaw sigi ne ka mɔgɔw Israɛl bɔnsɔn kun na waati min na. Ne na i juguw bɛɛ bila i sen kɔrɔ. Ayiwa Matigi b'a fɔ i ye ko ale yɛrɛ na so jɔ i ye.
[11] Ni i si tile dafara tuma min na, ni i kafora i bɛnbaw kan, ne na i bɔnsɔn dɔ lawuli i kɔ, i denkɛw la kelen kɔni. Ne na a ka masaya sabati.
[12] O de na bato so jɔ ne ye, ne na o ka masaya sabati tuma bɛɛ.
[13] Ne na kɛ a fa ye, a na kɛ ne denkɛ ye. Ne tɛna ne ka nɛɛma mabɔ o la i ko ne y'a kɛ i ɲɛ fɛ masakɛ la cogo min na.
[14] Ne na a sigi ne ka so ni ne ka masaya la tuma bɛɛ. A ka masaya na sabati tuma bɛɛ.›»
[15] Kira Natan taara o kumaw bɛɛ ni o ko yelenw bɛɛ da jira Dawuda la.
[16] O tuma la Dawuda taara i jɔ Matigi ɲɛ kɔrɔ k'a fɔ a ye ko: «Ne ye jɔn ye, Matigi Ala, ne ka so ye mun ye fo i nana ni ne ye fo ka se nin yɔrɔ la?
[17] Nin kɛra ko misɛn ye e Ala ɲɛ na, nka i ye don jan ko fɔ i ka jɔnkɛ ka so ko la. I ye i ɲɛ majigin ka ne filɛ, i n'a fɔ ne ye mɔgɔ tɔgɔba dɔ ye, e Matigi Ala.
[18] I ka jɔnkɛ ye o bonyali min sɔrɔ, ne Dawuda bɛ se ka mun fɔ i ye o ko la tun? I bɛ i ka jɔnkɛ dɔn.
[19] Matigi, i ye nin ko ɲumanbaw ni nin kobaw kɛ i ka jɔnkɛ kanuya ni i dusukun miirili kosɔn.
[20] Matigi, i bɔɲɔgɔnko si tɛ. Ala si tɛ i kelen kɔ, ka kɛɲɛ ni an tulow ka ko mɛnnenw ye.
[21] Mɔgɔ jumɛn bɛ i ko i ka mɔgɔw, Israɛl bɔnsɔn? Ala nana dugukolo siya jumɛn kunmabɔ k'a kɛ a ka mɔgɔw ye fɔlɔ walisa ka a tɔgɔ bonya? I ye kabakow ni taamashyɛnw kɛ. I ye mɔgɔ minw kunmabɔ ka bɔ Misira jamana la ka kɛ i ta ye, i ye siyaw gɛn ka bɔ olu ɲɛ.
[22] I ye i ka mɔgɔw Israɛl bɔnsɔn kɛ i taw ye badaa. Matigi, e de kɛra u ka Ala ye.
[23] «Ayiwa, sisan Matigi, i ye kuma minw fɔ i ka jɔnkɛ ni a ka so ko la, i ka olu dafa tuma bɛɛ, k'a kɛ i ko i y'a fɔ cogo min na.
[24] Ɔwɔ, i ka o kuma dafa, i tɔgɔ ka bonya tuma bɛɛ walisa a ka fɔ ko: ‹Kɛlɛbolow Matigi, Israɛl bɔnsɔn ka Ala don, ɔwɔ, ale ye Israɛl bɔnsɔn ka Ala ye.› I ka jɔnkɛ Dawuda ka so ka sabati i ɲɛ kɔrɔ.
[25] Ne ka Ala, i yɛrɛ y'a jira i ka jɔnkɛ la ko i na so jɔ a ye. O de y'a to i ka jɔnkɛ y'a ja gɛlɛya ka delili kɛ i ɲɛ kɔrɔ.
[26] Ayiwa, sisan Matigi, e de ye Ala ye. I ye nin nɛɛma ko layidu ta i ka jɔnkɛ ye.
[27] I ka sɔn ka duba i ka jɔnkɛ ka so ye walisa o ka kɛ layidu wulibali ye i ɲɛ kɔrɔ, katuguni e Matigi dubara min ye, o ye dubaden ye tuma bɛɛ.»