[1] Ayiwa Sitanɛ wulila Israɛl bɔnsɔn kama ka Israɛl bɔnsɔn tɔgɔ sɛbɛnni miirili don Dawuda dusu la.
[2] O tuma la Dawuda y'a fɔ Joab ni kuntigiw ye ko: «A' ye taa Israɛl bɔnsɔn tɔgɔw sɛbɛn k'a daminɛ Beɛr-Seba fo ka taa se Dan. O kɔ, aw ka kɔsegin ka na mɔgɔw hakɛ fɔ ne ye.»
[3] Joab y'a jaabi ko: «Ala ka Israɛl bɔnsɔn caya siɲɛ kɛmɛ ka tɛmɛn nin kan. Ne matigi, masakɛ, olu bɛɛ tɛ i ka baaradenw ye wa? Mun kosɔn ne matigi bɛ o ɲininkali kɛ? Mun kosɔn i bɛ o jurumu bila Israɛl bɔnsɔn kan na?»
[4] O bɛɛ n'a ta, masakɛ ka kuma ye se sɔrɔ Joab ka kuma kan. O tuma la Joab ye sira minɛ ka taa Israɛl bɔnsɔn ka jamana bɛɛ yaala, o kɔ, ka kɔsegin Jerusalɛm.
[5] Joab ye mɔgɔ dannenw jate ka o fɔ Dawuda ye. Israɛl bɔnsɔn bɛɛ lajɛlen tun ye cɛ npan samabaa miliyɔn kelen ni cɛ waa kɛmɛ ye. Juda bɔnsɔn na kɛlɛkɛ cɛ tun ye cɛ waa kɛmɛ naani ni cɛ waa biwolonwula ye.
[6] A ma Levi ni Benjamɛn sen don danni la katuguni masakɛ ka kuma tun man di Joab ye fewu.
[7] O tɔgɔ sɛbɛnni ma diya Ala ye. A ye Israɛl bɔnsɔn gosi.
[8] Dawuda y'a fɔ Ala ye ko: «Ne ye nin min kɛ, o ye jurumuba ye. Ayiwa, ne b'i deli, i ka sɔn ka i ka jɔnkɛ ka jurumu yafa a ma. Ne ye hakilintanya ko kɛ.»
[9] O tuma la Matigi kumana Dawuda ka yelikɛla Gad fɛ ko:
[10] «I ka taa kuma Dawuda fɛ ko: ‹Matigi ko: «Ko saba bɛ ne fɛ ka fɔ i ye, i ka u la kelen ɲɛnatɔmɔ. Ne na o kɛ i ye.» ›»
[11] Gad taara Dawuda sɛgɛrɛ ka Matigi ka kuma fɔ a ye ko:
[12] «I ka ninw la kelen ɲɛnatɔmɔ, san saba kɔngɔba wala ka boli i juguw ɲɛ kalo saba kɔnɔ ka i tiɲɛn ni npan ye i juguw fɛ wala Matigi ka a ka npan kɛ ka jamana gosi tile saba kɔnɔ, o kɔrɔ ko fiɲɛbana bɛ kɛ jamana la. Matigi ka mɛlɛkɛ na tiɲɛnni kɛ Israɛl bɔnsɔn ka jamana yɔrɔw bɛɛ la. Ne bɛ taa min fɔ ne cibaa ye, i ka o latigɛ sisan ka o fɔ ne ye.»
[13] Dawuda ye Gad jaabi ko: «Ne dusu tɔɔrɔlen bɛ kojugu. Ayiwa a ka di ne ye Matigi ka ne gosi, k'a masɔrɔ a ka makari tɛ ban, nka ne t'a fɛ ka ne yɛrɛ bila mɔgɔw bolo.»
[14] O tuma la Matigi ye fiɲɛbana bila Israɛl bɔnsɔn na. O ye Israɛl bɔnsɔn mɔgɔ waa biwolonwula faga.
[15] O kɔ, Ala ye mɛlɛkɛ ci ka taa Jerusalɛm, ko a ka a halaki. Ka mɛlɛkɛ to o halakili la, Matigi y'a filɛ, a nimasara o halakili ko la k'a fɔ halakili mɛlɛkɛ ye ko: «O n'a bɔ sa. I bolo madon i la.» O tuma la Matigi ka mɛlɛkɛ ye i jɔ Jebus Ornan ka gendekɛnɛ da fɛ.
[16] Dawuda y'a ɲɛ kɔrɔta ka Matigi ka mɛlɛkɛ jɔlen ye dugukolo ni sankolo furancɛ la ni npankisɛ ye a bolo ka o yankan Jerusalɛm fan fɛ. O yɔrɔ nin bɛɛ Dawuda ni cɛkɔrɔbaw ye u bi k'u ɲɛ biri duguma. Cafu fini tun bɛ u kan na.
[17] Dawuda y'a fɔ Ala ye ko: «E m'a dɔn ko ne de ye o tɔgɔ sɛbɛnni ko ci di wa? Ne ye jurumu kɛ, ne ye ko jugu kɛ, nka nin sagaw ye mun kɛ? Matigi, ne ka Ala, ne bɛ i deli, i ka i bolo se ne ni ne fa ka so ma, nka a kana se i ka mɔgɔw ma ka u gosi.»
[18] Matigi ka mɛlɛkɛ y'a fɔ Gad ye ko a k'a fɔ Dawuda ye ko o ka taa saraka bɔlan jɔ Matigi ye Jebus Ornan ka gendekɛnɛ la.
[19] O tuma la Dawuda taara ka kɛɲɛ ni Matigi ka kuma fɔlen ye Gad fɛ.
[20] Ornan ye a kɔ filɛ, a ye mɛlɛkɛ ye. A denkɛ naani minw tun bɛ a fɛ yen, olu y'u dogo. Ornan tun bɛ alikama gosi la o waati la.
[21] Dawuda sera Ornan yɔrɔ la, Ornan y'a ɲɛ kɔrɔta ka Dawuda natɔ ye. A bɔra gendekɛnɛ la ka i biri masakɛ kɔrɔ.
[22] O tuma la Dawuda y'a fɔ Ornan ye ko: «I ka gendekɛnɛ yɔrɔ feere ne ma walisa ne ka saraka bɔlan jɔ Matigi ye. A feere ne ma warijɛ la walisa fiɲɛbana ka ban ka bɔ mɔgɔw la.»
[23] Nka Ornan y'a fɔ Dawuda ye ko: «Yɔrɔ min ka di i ye, i ka o ta, ne matigi, masakɛ, ko min ka di i ye, i ka o kɛ. A filɛ, ne na misiw di i ma ka kɛ saraka jenitaw ye ka wotorow kɛ dɔgɔw ye ka alikama kɛ mugu sarakaw ye. Ne na o bɛɛ di.»
[24] Nka masakɛ Dawuda ye Ornan jaabi ko: «Ayi, ne na o bɛɛ san u sɔngɔ dafalen na, k'a masɔrɔ ne t'a fɛ ka i ka fɛnw kɛ saraka ye Matigi ye. Ne ye fɛn min sɔrɔ gwansan, ne t'a fɛ ka o kɛ saraka jenita ye Matigi ye.»
[25] Ayiwa Dawuda ye sanu sikle kɛmɛ wɔɔrɔ suma k'a di Ornan ma ka kɛ o yɔrɔ sɔngɔ ye.
[26] Dawuda ye saraka bɔlan jɔ Matigi ye yen ka saraka jenitaw ni nisɔndiya sarakaw lase o kan ka Matigi deli. O tuma la Matigi y'a jaabi ni tasuma ye ka bɔ sankolo la ka bi saraka jenita saraka bɔlan kan.
[27] O kɔ, Matigi kumana mɛlɛkɛ fɛ, o y'a ka npan segin a tan na.
[28] Kabini o waati la, Dawuda y'a ye ko Matigi y'a kan lamɛn Jebus Ornan ka gendekɛnɛ la. A ye saraka faga yen.
[29] Musa tun ye Matigi ka finiso min jɔ kungokolon kɔnɔ ani saraka jenita saraka bɔlan, olu tun bɛ batoli kɛ yɔrɔ la Gabaon o waati la.
[30] Nka Dawuda tun tɛ se ka taa o saraka bɔlan ɲɛ fɛ ka Ala ɲininka, katuguni a siranna Matigi ka mɛlɛkɛ ka npan kosɔn.