[1] Dawuda ye Israɛl bɔnsɔn kuntigiw bɛɛ lajɛ Jerusalɛm, Israɛl bɔnsɔn kuntigiw ni jamakulu kuntigi minw tun bɛ masakɛ ka baara la ani cɛ waa kelen-kelen kuntigiw ni cɛ kɛmɛ-kɛmɛ kuntigiw ni masakɛ ni a denkɛw ka nafolo kɔlɔsibaaw ani u ka bagankuluw kuntigiw ani a ka dukɛnɛ kɔlɔsibaaw ani sɔrɔdasi jalatigiw ani kɛlɛkɛ cɛ farinw bɛɛ.
[2] O tuma la masakɛ Dawuda wulila k'i jɔ ka kuma ta k'a fɔ ko: «Ne balimaw ni ne ka mɔgɔw, a' ye ne lamɛn. Ne tun b'a fɛ ka so jɔ Matigi ka layidu wagande ye k'a kɛ an ka Ala senda yɔrɔ ye. Ne tun bɛ labɛnni la o so jɔli kama,
[3] nka Ala y'a fɔ ne ye ko ne tɛna so jɔ ale tɔgɔ la k'a masɔrɔ ne ye kɛlɛkɛ cɛ ye, ko ne ye joli caman bɔn.
[4] O bɛɛ n'a ta Matigi, Israɛl bɔnsɔn ka Ala ye ne ɲɛnatɔmɔ ka bɔ ne fa ka so mɔgɔw cɛma walisa ne ka kɛ Israɛl bɔnsɔn ka masakɛ ye tuma bɛɛ, katuguni a ye Juda bɔnsɔn ɲɛnatɔmɔ ka kɛ kuntigi ye. A ye ne fa ka so ɲɛnatɔmɔ ka bɔ Juda siya la. A ye ne ɲɛnatɔmɔ ka bɔ ne balimaw cɛma ka kɛ Israɛl bɔnsɔn ka masakɛ ye.
[5] Matigi ye masasigilan min labɛn Israɛl bɔnsɔn ye, a ye ne denkɛ Solomani ɲɛnatɔmɔ ka bɔ ne denkɛw bɛɛ cɛma ka sigi o masasigilan kan, k'a sɔrɔ Matigi ye den caman di ne ma.
[6] «A y'a fɔ ne ye ko: ‹I denkɛ Solomani de na so ni a dukɛnɛ jɔ ne ye, k'a masɔrɔ ne y'a ɲɛnatɔmɔ ka kɛ ne denkɛ ye, ne na kɛ a fa ye.
[7] Ne na a ka masaya sabati tuma bɛɛ, ni a ye ne ka ci fɔlenw ni ne ka ko latigɛlenw mara i ko a b'a kɛ cogo min na bi.›
[8] «Ayiwa sisan, Israɛl bɔnsɔn bɛɛ, Matigi ka jama bɛɛ, ne b'a fɔ aw ye Ala ɲɛ kɔrɔ, o min bɛ an lamɛn, ko aw ka Matigi, aw ka Ala ka ci fɔlenw bɛɛ mara ka u kɛ ka dafa walisa aw ka sigi o jamana ɲuman la ka o mara ka kɛ ciyɛn ye ka di aw denw ma aw kɔ badaa.
[9] «E fana, ne denkɛ Solomani, i ka i fa ka Ala dɔn ka baara kɛ a ye ni dusukun jɛlen ni kan minɛli ye, katuguni Matigi bɛ mɔgɔ dusukun na kow bɛɛ sɛgɛsɛgɛ ka a kɔnɔna kow ni a ka miiriliw bɛɛ dɔn. Ni i y'a ɲini, a n'a yɛrɛ jira i la, nka ni i murutira a ma, a na i fili badaa.
[10] I k'a dɔn sisan ko Matigi ye e de ɲɛnatɔmɔ ko i ka so jɔ ka kɛ a batoli yɔrɔ ye. I jija ka o baara kɛ.»
[11] O kɔ, Dawuda ye so ni a waranda jɔ cogo ni sow ni fɛn lamara bonw ani sanfɛ bonw ani a lamini bonw ani jurumu kafari bon bisigi di a denkɛ Solomani ma.
[12] A ye fɛn o fɛn miiri a kɔnɔ, a ye olu bisigi fana di, Matigi ka so dukɛnɛw bisigi ani a lamini bonw ani Ala ka so nafolo mara yɔrɔw ni fɛn senumaw nafolo mara yɔrɔw bisigiw,
[13] ani sarakalasebaaw ni Levitew jɔyɔrɔ baaraw ko ani Matigi ka so kɔnɔ baara kɛ minanw.
[14] Sanu bɛ dila ka kɛ minan sifa o sifa ye ani a bɛ kɛ ka baara sifa o sifa kɛ, a ye o bɛɛ fɔ ka o sanu giriya dama fɔ. Warijɛ bɛ dila ka kɛ minan sifa o sifa ye ani a bɛ baara sifa o sifa kɛ, a ye o bɛɛ fɔ ka o warijɛ giriya dama fɔ.
[15] Sanu fitinɛw ni u bɛɛlɛw, fitinɛw bɛɛ kelen-kelen ni bɛɛlɛw, a ye o sanu bɛɛ giriya dama fɔ. Warijɛ fitinɛw, a ye olu bɛɛ kelen-kelen ni u bɛɛlɛw warijɛ giriya dama fɔ ka kɛɲɛ ni fitinɛw bɛɛ kelen-kelen ka baara ye.
[16] A ye jirali buuru bila tabaliw bɛɛ kelen-kelen sanu giriya dama fɔ a ye ani warijɛ giriya dama warijɛ tabaliw kosɔn.
[17] A ye sogo sɔgɔlanw ni koli minanba ni sanu yɛrɛwolo jifilenw bɛɛ kɛ cogo jira a la ani sanu tasa ani u bɛɛ kelen-kelen giriya dama,
[18] ani wusulan saraka bɔlan sanuma ani o giriya dama. A ye wotoro bisigi fana di a ma ani serubɛn minw bɛ u kamanw sɛɛnɛ Matigi ka layidu wagande san fɛ.
[19] Dawuda ko: «O baara cogo bisigi bɛɛ jirala ne la Matigi yɛrɛ bolo la sɛbɛn na.»
[20] Dawuda y'a fɔ a denkɛ Solomani ye ko kura ko: «I barika bonya ka i ja gɛlɛya, i ka wuli ka baara kɛ. I kana siran, i ja kana tigɛ k'a masɔrɔ Matigi Ala, ne ka Ala na to i fɛ. A tɛna i bila, a tɛna i janfa fo i ka Matigi ka so jɔ ka o baaraw bɛɛ kɛ ka u ban.
[21] A filɛ, sarakalasebaaw ni Levitew kuluw bɛ yan ka Ala ka so kɔnɔ baara bɛɛ kɛ. Cɛ minw bɛ baara bɛɛ cogo dɔn k'a kɛ ni diyaɲe ye, olu bɛɛ fana na kɛ i fɛ yan ka baara sifaw bɛɛ kɛ. Kuntigiw ni mɔgɔw bɛɛ na i ka ci fɔlenw bɛɛ kɛ.»