[1] O kɔ, Amɔn bɔnsɔn ka masakɛ Nakas sara. A denkɛ sigira masaya la a nɔ na.
[2] Dawuda ko: «Ne na ko ɲuman kɛ Nakas denkɛ Hanun ye, katuguni a fa ye ko ɲuman kɛ ne ye.» Dawuda ye cidenw bila ka taa Hanun fa sanga fo. Dawuda ka baaradenw sera Hanun yɔrɔ la Amɔn bɔnsɔn ka jamana la walisa ka sanga fo.
[3] Nka Amɔn bɔnsɔn kuntigiw y'a fɔ Hanun ye ko: «Yala e bɛ miiri ko Dawuda ye o cidenw ci ka na i dusu saalo i fa saya ko la wa? Yala i m'a dɔn ko a ka baaradenw nana i kama ka i ka dugu ko lajɛ walisa k'a tiɲɛn ka jamana halaki wa?»
[4] O tuma la Hanun ye Dawuda ka baaradenw minɛ ka u bonbonsi di ka u ka finiw tilancɛ tigɛ fo u woro la, o kɔ, ka u bila ka taa.
[5] Ko min kɛra Dawuda ka cidenw na, o fɔra Dawuda ye minkɛ, a ye mɔgɔ dɔw ci ka taa u kunbɛn, k'a masɔrɔ u tun maloyara kosɛbɛ. Masakɛ y'a fɔ u ye ko: «A' ye to Jeriko fo aw bonbonsi ka nugu, o kɔ, aw na segin ka na yan.»
[6] Amɔn bɔnsɔn y'a ye ko u ye Dawuda dusu dimin minkɛ, Hanun ni Amɔn bɔnsɔn ye warijɛ talan waa kelen ci ka Mesopotami ni Siri Maka ani Zoba wotorotigiw ni sotigiw sara ko olu ka bɔ ka u dɛmɛ.
[7] U ye wotoro waa bisaba ni fila ani Maka masakɛ ni a ka mɔgɔw sara. Olu taara ka daga sigi Medeba kuntilenna la. Amɔn bɔnsɔn fana ye ɲɔgɔn lajɛ ka bɔ u ka duguw kɔnɔ ka taa kɛlɛ kama.
[8] Dawuda y'o mɛn minkɛ, a ye Joab ni a fɛ kɛlɛkɛ cɛ farinw ci ka taa u kama.
[9] Amɔn bɔnsɔn bɔra ka kɛlɛ labɛn dugu donda la. Masakɛ minw tun nana a dɛmɛ, olu dagalen tora kungo kɔnɔ.
[10] Joab y'a ye ko u juguw bɛ u kɛlɛ u ɲɛ fɛ ni u kɔ fɛ minkɛ, a ye kɛlɛkɛ cɛ farin dɔw ɲɛnatɔmɔ ka bɔ Israɛl bɔnsɔn ka kɛlɛkɛ cɛw la, olu y'u labɛn Sirikaw kama.
[11] O kɔ, a ye sɔrɔdasikulu tɔ di a balimakɛ Abisai ma, olu ka taa Amɔn bɔnsɔn kama.
[12] Joab y'a fɔ a ye ko: «Ni Sirikaw barika bonyara ni ne ta ye, i ka na ne dɛmɛ, nka ni Amɔn bɔnsɔn barika bonyara ni i ta ye, ne na taa i dɛmɛ.
[13] I ja gɛlɛya, an ka kɛ cɛw ye an ka mɔgɔw ni an ka Ala ka duguw kosɔn. Min ka di Matigi ye, a ka o de kɛ.»
[14] O kɔ, Joab ni a fɛ kɛlɛkɛ cɛw gɛrɛla Sirikaw la ka u kɛlɛ. Olu bolila u ɲɛ.
[15] Amɔn bɔnsɔn y'a ye ko Sirikaw bolila tuma min na, olu fana bolila Joab balimakɛ Abisai ɲɛ ka taa dugu kɔnɔ. O kɔ, Joab kɔseginna Jerusalɛm.
[16] Sirikaw y'a ye ko Israɛl bɔnsɔn ye se sɔrɔ u kan minkɛ, Sirika minw tun bɛ ba kɔ fɛ, u ye ci bila ka olu wele. Hadadezɛr ka kɛlɛbolo kuntigi Sofak tun bɛ u kun na.
[17] Dawuda ye o kibaru mɛn minkɛ, a ye Israɛl bɔnsɔn bɛɛ lajɛ ka Jurdɛn ba tigɛ ka taa u kunbɛn ka kɛlɛ labɛn u ɲɛ fɛ. O yɔrɔ nin bɛɛ Dawuda ye a ka kɛlɛkɛ cɛw labɛn Sirikaw ɲɛ fɛ. Sirikaw fana y'u labɛn ka kɛlɛ kɛ.
[18] Nka u bolila Israɛl bɔnsɔn ɲɛ. Dawuda ye Sirikaw ka wotorotigi waa wolonwula ani sennama cɛ waa binaani faga ka u ka kɛlɛbolo kuntigi Sofak fana faga.
[19] Hadadezɛr ka baaradenw y'a ye ko se sɔrɔla u kan Israɛl bɔnsɔn fɛ minkɛ, olu ye hɛrɛ don u ni Dawuda cɛ ka kolo a ye. Sirikaw ma sɔn ka Amɔn bɔnsɔn dɛmɛ tun.