[1] Dakɔlɔsibaaw jamakulu tilatila cogo filɛ nin ye, ka bɔ Korɛ gwa la, Korɛ denkɛ Meselemia, Asaf bɔnsɔn don.
[2] Meselemia denkɛw, a denkɛ fɔlɔ Zakari, a denkɛ filanan Jediaɛl, a denkɛ sabanan Zebadia, a denkɛ naaninan Jatiniɛl,
[3] a denkɛ duurunan Elam, a denkɛ wɔɔrɔnan Jokanan, a denkɛ wolonwulanan Eljoenai.
[4] Obɛd-Edɔm denkɛw: a denkɛ fɔlɔ Semaɛja, a denkɛ filanan Jozabad, a denkɛ sabanan Joak, a denkɛ naaninan Sakar, a denkɛ duurunan Netaneɛl,
[5] a denkɛ wɔɔrɔnan Amiɛl, a denkɛ wolonwulanan Isakar, a denkɛ seginnan Pultai k'a masɔrɔ Ala dubara Obɛd-Edɔm ye.
[6] Obɛd-Edɔm denkɛ Semaɛja ye denkɛ minw sɔrɔ, olu kɛra u ka so kuntigiw ye k'a masɔrɔ kɛlɛkɛ cɛ farinw tun don.
[7] Semaɛja denkɛw tun ye Otni ni Refaɛl ni Obɛd ni Elizabad ye. A balimakɛw Elihu ni Semakia tun ye cɛ farinw ye.
[8] Olu bɛɛ tun ye Obɛd-Edɔm denkɛw ni u denkɛw ni u balimaw kɛlɛkɛ cɛ farinw ye. Cɛ barikamaw tun don. Olu bɛɛ tun ye Obɛd-Edɔm bɔnsɔnw ye. U bɛɛ lajɛlen tun ye mɔgɔ biwɔɔrɔ ni fila ye.
[9] Meselemia denkɛw ni a balima cɛ farinw tun ye mɔgɔ tan ni segin ye.
[10] Mɛrari bɔnsɔn Hosa denkɛw filɛ ninw ye: Simri tun ye u kuntigi ye hali ni a ma kɛ denkɛ fɔlɔ ye. A fa y'a sigi ka kɛ kuntigi ye.
[11] Hosa denkɛ filanan tun ye Hilkija ye. A denkɛ sabanan tun ye Tebalia ye, a denkɛ naaninan tun ye Zakari ye. Hosa denkɛw ni a balimaw bɛɛ lajɛlen tun ye mɔgɔ tan ni saba ye.
[12] Dakɔlɔsibaa kuluw bɔra olu la. Matigi ka so kɔnɔ baara kalifara u ma, u kuntigiw fara u balimakɛw kan.
[13] Kala dara ka da kelen-kelen ɲɛnatɔmɔ ka kalifa o gwaw bɛɛ ma, gwa misɛn fara gwaba kan.
[14] Selemia kɛra kɔrɔn yanfan dakɔlɔsibaa ye ka kɛɲɛ ni kala dali ye. U ye kala da a denkɛ Zakari fana ye, o ta kɛra saheli yanfan ye, o bɛnna ale ma. Hakilitigi tun don.
[15] Obɛd-Edɔm niyɔrɔ bɛnna worodugu yanfan ma. Ale ni a denkɛw tun ye fɛn mara yɔrɔ dakɔlɔsibaaw ye.
[16] Supim ni Hosa ka yɔrɔ bɛnna tilebi yanfan Salekɛt da ma, tintin sira kan. Da kɔlɔsi yɔrɔ fila ɲɛ sinnen tun bɛ ɲɔgɔn ma.
[17] Levite wɔɔrɔ tun bɛ kɔrɔn yanfan donda kɔlɔsi. Naani tun bɛ saheli yanfan fɛ donda kɔlɔsi don o don. Naani tun bɛ wɔrɔdugu yanfan donda kɔlɔsi don o don. Fila-fila tun bɛ fɛn mara yɔrɔ donda kɔlɔsi.
[18] Kɔfɛ du min tun bɛ tilebi yanfan fɛ, naani tun bɛ o sira da kɔlɔsi, fila tun bɛ kɔfɛ du kɔnɔ ka o da kɔlɔsi.
[19] Olu sigira ka kɛ dakɔlɔsiba jamakuluw ye. U bɛɛ bɔra Korɛ ni Mɛrari bɔnsɔnw na.
[20] Ka bɔ Levitew la, Akija ɲɛnatɔmɔna ka kɛ Ala ka so kɔnɔ nafolo mara yɔrɔ ni fɛn senumaw nafolo mara yɔrɔ kɔlɔsibaa ye.
[21] Ka bɔ Laedan denkɛw la, Gersɔn denkɛ Laedan tun ye a bɛnbaw ka sow kuntigi ye ka bɔ Gersɔn bɔnsɔn na.
[22] Jehiɛli denkɛw, Zetam ani a balimakɛ Joɛl ɲɛnatɔmɔna ka kɛ Matigi ka so nafolo mara yɔrɔ kɔlɔsibaaw ye.
[23] Amram bɔnsɔn ni Jizehar bɔnsɔn ni Heborɔn bɔnsɔn ani Uziɛl bɔnsɔn na,
[24] Musa denkɛ Gersom denkɛ Sebuɛl tun ye nafolo mara yɔrɔ kuntigi ye.
[25] Ale balimaw tun ye Eliezɛr bɔnsɔnw ye. Rekabia tun ye Eliezɛr denkɛ ye, Esayi tun ye Rekabia denkɛ ye, Joram tun ye Esayi denkɛ ye, Zikiri tun ye Joram denkɛ ye, Selomit tun ye Zikiri denkɛ ye.
[26] O Selomit ni a balimaw ɲɛnatɔmɔna ka kɛ fɛn senuma nafolo mara yɔrɔ kɔlɔsibaaw ye. Masakɛ Dawuda ni Israɛl bɔnsɔnw kuntigiw, kɛlɛkɛ cɛ waa kelen-kelen kuntigiw ni cɛ kɛmɛ-kɛmɛ kuntigiw ani kɛlɛbolo kuntigiw ye o fɛnw di Ala ma.
[27] U ye nafolo min cɛ kɛlɛ la, u ye dɔ bɔ o la k'a di Matigi ka so labɛnni kama.
[28] Yelikɛla Samuɛl ni Kis denkɛ Saul ni Ner denkɛ Abinɛr ani Zeruja denkɛ Joab ye fɛn minw bila u dan na Matigi ye, Selomit ni a balimaw tun bɛ olu kɔlɔsi.
[29] Jizehar bɔnsɔn na, Kenaniya ni a denkɛw kɛra kuntigiw ni kiritigɛlaw ye ka faama kow ɲɛnabɔ Israɛl ye.
[30] Ka bɔ Heborɔn bɔnsɔn na, Hasabia ni a balimaw, cɛ ja gɛlɛnw bɛɛ lajɛlen tun ye cɛ waa kelen ni kɛmɛ wolonwula ye. Olu tun bɛ Israɛl bɔnsɔn ka jamana tilebi yanfan kɔlɔsi, Jurdɛn ba fan fɛ, ka Matigi ka kow bɛɛ ni masakɛ ka kow bɛɛ ɲɛnabɔ.
[31] Minw bɔra Heborɔn bɔnsɔn na, Jerija tun ye olu kuntigi ye. O kɛra Dawuda ka masaya san binaaninan la. Ɲininkali kɛra Heborɔn bɔnsɔn ko la ka kɛɲɛ ni u buruju ni u bɛnbaw bɔnsɔn na cogo ye. U ye cɛ farin minw sɔrɔ olu cɛma, olu bɔra Jaezɛr Galad jamana la.
[32] Jerija balimaw cɛ farinw bɛɛ lajɛlen tun ye gwatigi waa fila ni kɛmɛ wolonwula ye. Masakɛ Dawuda ye u sigi ka kɛ Rubɛn bɔnsɔn ni Gad bɔnsɔn ani Manase siya tilancɛ kuntigiw ye, ka Ala ka kow bɛɛ ni masakɛ ka kow bɛɛ ɲɛnabɔ.