[1] Dawuda kɔrɔla, a ye si jan sɔrɔ. A y'a denkɛ Solomani sigi ka o kɛ Israɛl bɔnsɔn ka masakɛ ye.
[2] O kɔ, masakɛ Dawuda ye Israɛl bɔnsɔn kuntigiw ni sarakalasebaaw ani Levitew bɛɛ lajɛ ɲɔgɔn kan.
[3] U ye Levitew dan k'a daminɛ san bisaba mɔgɔw la fo ka taa se u ɲɛ mɔgɔw ma. Olu minw jatera, olu kɛra cɛ waa bisaba ni segin ye.
[4] Olu la cɛ waa mugan ni naani ɲɛnatɔmɔna ka Matigi ka so kɔnɔ baara kow ɲɛnabɔ. Cɛ waa wɔɔrɔ kɛra sɛbɛnnikɛlaw ni kiritigɛlaw ye.
[5] Cɛ waa naani kɛra dakɔlɔsibaaw ye. Cɛ waa naani tun bɛ Matigi tanu ni fɔlifɛnw ye, Dawuda tun ye o fɛn minw dila batoli kama.
[6] Dawuda ye o baaraw tilatila Levi bɔnsɔnw cɛ, Gersɔn bɔnsɔnw ni Kɛhat bɔnsɔnw ani Mɛrari bɔnsɔnw.
[7] Gersɔn denkɛw filɛ ninw ye: Laedan ani Simei.
[8] Laedan denkɛw tun ye kuntigi Jehiɛl ni Zetam ani Joɛl ye, olu tun ye mɔgɔ saba ye.
[9] Simei denkɛw tun ye Selomit ni Haziɛl ani Haran ye, olu tun ye mɔgɔ saba ye. Olu tun ye Laedan bɔnsɔn ka gwaw kuntigiw ye.
[10] Simei denkɛw tun ye Jakat ni Zina ni Jeus ani Beria ye. O mɔgɔ naani tun ye Simei denkɛw ye.
[11] Jakat tun ye kuntigi ye. Zina tun ye a dankan ye. Jeus ni Beria tun ma denkɛ caman sɔrɔ, o de kosɔn u jatera gwa kelen ni kulu kelen ye.
[12] Kɛhat denkɛw tun ye Amram ni Jizehar ni Heborɔn ani Uziɛl ye. Olu bɛɛ lajɛlen tun ye mɔgɔ naani ye.
[13] Amram denkɛw tun ye Aron ani Musa ye. Aron ni a denkɛw bilara u dan na ka kɛ mɔgɔ senumaw ye badaa, ka kɛ sarakalasebaaw ye ka wusulan suma duman wusu Matigi ɲɛ kɔrɔ ka a ka baara kɛ ka dubaw kɛ a tɔgɔ la.
[14] Ala ka cɛ Musa kɔni, ale denkɛw jatera Levi bɔnsɔn fɛ.
[15] Musa denkɛw tun ye Gersom ni Eliezɛr ye.
[16] Gersom denkɛw kuntigi tun ye Sebuɛl ye.
[17] Eliezɛr denkɛw kuntigi tun ye Rekabia ye. Denkɛ wɛrɛ tun tɛ Eliezɛr fɛ nka Rekabia denkɛw tun ka ca kosɛbɛ.
[18] Jizehar denkɛw kuntigi tun ye Selomit ye.
[19] Heborɔn denkɛw kuntigi tun ye Jerija ye. Amaria tun ye a dankan ye, u sabanan tun ye Jakaziɛl ye, u naaninan tun ye Jekameam ye.
[20] Uziɛl denkɛw kuntigi tun ye Mise ye, u filanan tun ye Jisija ye.
[21] Mɛrari denkɛw tun ye Makili ni Musi ye. Makili denkɛw tun ye Eleazar ni Kis ye.
[22] Eleazar sara k'a sɔrɔ a ma denkɛ si sɔrɔ fɔ denmusow. U balimakɛ Kis denkɛw ye u furu.
[23] Musi denkɛw tun ye Makili ni Edɛr ani Jeremot ye, mɔgɔ saba tun don.
[24] Olu tun ye Levi bɔnsɔn ye ka kɛɲɛ ni u bɛnbaw ka gwaw ye. Kuntigi minw jatera, olu don. Olu tun bɛ baara kɛ Matigi ka so kɔnɔ k'a daminɛ san mugan mɔgɔw la fo ka taa se u ɲɛ mɔgɔw ma,
[25] katuguni Dawuda tun y'a fɔ ko: «Matigi, Israɛl bɔnsɔn ka Ala ye lafiya di a ka mɔgɔw ma ka u sigi Jerusalɛm tuma bɛɛ.
[26] Levitew fana tɛ finiso ni a baarakɛ minanw doni tun.»
[27] Ka kɛɲɛ ni Dawuda ka ciw laban ye, Levitew tɔgɔw sɛbɛnna k'a daminɛ san mugan mɔgɔw la ka taa ɲɛ fɛ.
[28] Olu ka yɔrɔ tun bɛ Aron denkɛw kɛrɛ fɛ Matigi ka so kɔnɔ baara kosɔn. Olu tun bɛ dukɛnɛw ni so bonw kɔlɔsi ani ka fɛn saniyataw bɛɛ saniya ka Ala ka so kɔnɔ baara bɛɛ kɛ.
[29] Jirali buurukunw ni mugu sarakaw mugu tɛntɛnnen ni buuru misɛn pɛnpɛrɛlen fununbaliw ani fɛn minw bɛ kɛ minan pɛnpɛrɛlen na ani fɛn minw bɛ jiran tulu la, u tun bɛ olu ko ɲɛnabɔ ka fɛn bɛɛ suma cogo ni a janya cogo ɲɛnabɔ.
[30] U tun bɛ taa Matigi ɲɛ kɔrɔ sɔgɔma o sɔgɔma k'a tanu k'a bato, u tun bɛ o kɛ wula o wula fana.
[31] U tun bɛ taa ni saraka jenitaw ye Matigi ɲɛ kɔrɔ tuma bɛɛ ka kɛɲɛ ni sariya sɛbɛnnen ye lafiɲɛ don ko ni kalo kura ni seli donw ko la.
[32] U tun bɛ finiso ni yɔrɔ senuma kɔlɔsi ka u balimaw Aron denkɛw ka Matigi ka so kɔnɔ baara kɛ.