[1] Masakɛ Akab salen kɔ, Moab bɔnsɔn murutira Israɛl bɔnsɔn ma.
[2] Akazia bɔra a ka Samari sankanso finɛtiri banabililen fɛ ka bi duguma. A banana o yɔrɔ nin bɛɛ. O tuma la a ye cidenw bila k'a fɔ olu ye ko: «A' ye Ekirɔn ka bato fɛn Bal-Zebub ɲininka yala ni ne na wuli ka bɔ nin bana la.»
[3] Nka Ala ka mɛlɛkɛ y'a fɔ Tisibite Eli ye ko: «I ka wuli ka taa Samari masakɛ ka cidenw kunbɛn k'a fɔ u ye ko: ‹Yala Ala tɛ Israɛl fɛ fo aw bɛ taa Ekirɔn ka bato fɛn Bal-Zebub ɲininka wa?›
[4] O de kosɔn Matigi kumana ko: ‹I dalen bɛ dalan min kan, i tɛna wuli ka bɔ o kan katuguni i na sa.›» Eli taara.
[5] Cidenw kɔseginna Akazia yɔrɔ la. A ye u ɲininka ko: «Mun kosɔn aw kɔseginna?»
[6] U y'a jaabi ko: «Mɔgɔ dɔ ye an kunbɛn k'a fɔ an ye ko: ‹Masakɛ min ye aw ci, aw ka segin ka taa o yɔrɔ la k'a fɔ a ye ko: «Matigi ko: ‹Yala Ala si tɛ Israɛl fɛ fo i bɛ taa Ekirɔn ka bato fɛn Bal-Zebub ɲininka wa? Ko o de kosɔn i dalen bɛ dalan min kan, i tɛna wuli ka bɔ o kan, sabu i na sa.›»
[7] O tuma la masakɛ ye u ɲininka ko: «Cɛ min ye aw kunbɛn ka nin kuma fɔ aw ye, o cogo bɛ di?»
[8] U y'a jaabi ko: «Kasa dulɔki bɛ o cɛ kan na, wolo cɛ sirilan kɛra ka a cɛ siri.» Masakɛ kulola ko: «Eli don ka bɔ Tisibite.»
[9] Ayiwa Akazia ye kuntigi dɔ ci, o ni a ka sɔrɔdasikulu cɛ biduuru taara Eli sɛgɛrɛ. O y'a sɔrɔ Eli sigilen tun bɛ kulu kan. Kuntigi y'a fɔ a ye ko: «Ala ka cɛ, masakɛ ko i ka jigin ka na.»
[10] Nka Eli ye o kuntigi jaabi ko: «Ni ne ye Ala ka cɛ ye, tasuma ka bɔ sankolo la ka e ni i ka sɔrɔdasikulu cɛ biduuru bɛɛ jeni.» O yɔrɔ nin bɛɛ tasuma jiginna ka bɔ sankolo la ka kuntigi ni a ka sɔrɔdasikulu cɛ biduuru bɛɛ jeni ka u ban.
[11] Akazia ye kuntigi wɛrɛ ni a ka sɔrɔdasikulu cɛ biduuru ci ka taa Eli sɛgɛrɛ. O kuntigi y'a fɔ Eli ye ko: «Ala ka cɛ, masakɛ ko i ka tɛliya ka jigin ka na.»
[12] Nka Eli y'a jaabi ko: «Ni ne ye Ala ka cɛ ye, tasuma ka jigin ka bɔ sankolo la ka e ni i fɛ cɛ biduuru jeni.» O yɔrɔ nin bɛɛ Ala ka tasuma bɔra sankolo la ka o kuntigi ni a fɛ cɛ biduuru jeni ka u ban.
[13] Akazia ye kuntigi dɔ ni a fɛ cɛ biduuru bila ka taa Eli sɛgɛrɛ a siɲɛ sabanan la. O kuntigi gɛrɛla Eli la ka i ɲɔngiri k'i majigin a kɔrɔ k'a fɔ a ye ko: «Ala ka cɛ, ne bɛ i deli i ka hinɛ ne la, ne ni ne nɔfɛ cɛw ni ka kɛ fɛnba ye i ɲɛ na.
[14] Tasuma jiginna ka bɔ sankolo la ka kuntigi fila ni u fɛ cɛ biduuru-duuru jeni, nka sisan, ne ni ka kɛ fɛnba ye i ɲɛ na.»
[15] O tuma la Matigi ka mɛlɛkɛ y'a fɔ Eli ye ko: «I ka jigin ka taa ninw fɛ, i kana siran.» Eli wulila ka taa kuntigi fɛ masakɛ kɔrɔ.
[16] Eli y'a fɔ masakɛ ye ko: «Matigi ko: ‹I ye cidenw bila ka taa Ekirɔn ka bato fɛn Bal-Zebub ɲininka, a kɛra i ko Ala tɛ Israɛl bɔnsɔn fɛ ka o ɲininka. O de kosɔn i dalen bɛ dalan min kan, i tɛna wuli ka bɔ o kan, k'a masɔrɔ i na sa, siga t'a la.›»
[17] Akazia sara ka kɛɲɛ ni Matigi ka kuma fɔlen ye Eli da la. Denkɛ tun t'a fɛ, o de y'a to Joram sigira masaya la a nɔ na, o kɛra Juda ka masakɛ Josafat denkɛ Joram ka masaya san filanan la.
[18] Akazia ka ko tɔw bɛɛ sɛbɛnnen bɛ Israɛl bɔnsɔn ka masakɛw ka Tilew Kibaru Kitabu kɔnɔ.