[1] Juda ka masakɛ Akaz ka masaya san tan ni filanan la, Ela denkɛ Ose kɛra Israɛl bɔnsɔn ka masakɛ ye Samari. Ale ye san kɔnɔntɔn kɛ masaya la.
[2] A ye ko jugu kɛ Matigi ɲɛ kɔrɔ nka a ma Israɛl bɔnsɔn ka masakɛ tɔw bɔ, olu minw tun bɛ a ɲɛ.
[3] Asiri masakɛ Salmanasar wulila a kama. Ose kolola a ye ka faama wari di a ma.
[4] Nka Ose ye Asiri masakɛ janfa katuguni Ose ye dɛmɛni ɲini Misira masakɛ So fɛ. A ma sɔn ka faama wari di Asiri masakɛ ma tun. O de kosɔn Asiri masakɛ ye Ose minɛ k'a siri k'a bila kaso la.
[5] O kɔ, a ye jamana bɛɛ minɛ ka daga Samari da la san saba kɔnɔ.
[6] Ose ka masaya san kɔnɔntɔnnan la, Asiri masakɛ ye Samari minɛ ka taa ni Israɛl bɔnsɔn ye Asiri jamana la ka olu sigi Kalak ni Gosan Kabor ba da la ani Medikaw ka duguw kɔnɔ.
[7] O kɛra k'a masɔrɔ Israɛl bɔnsɔn ye ko jugu kɛ Matigi u ka Ala ɲɛ kɔrɔ, o min ye u labɔ Misira jamana la ka u hɔrɔnya masakɛ Faraon ka jɔnya ma. U ye bato fɛn wɛrɛw bato.
[8] Matigi ye siya minw gɛn ka bɔ Israɛl bɔnsɔn ɲɛ, Israɛl bɔnsɔn ye olu ka laada siraw taama ka Israɛl bɔnsɔn ka masakɛw ka sariya sigilenw fana taama.
[9] Israɛl bɔnsɔn ye Matigi, u ka Ala bila ka u ka ko kɛtaw kɛ dogo la. U ye batoli kɛ yɔrɔw jɔ u ka duguw bɛɛ kɔnɔ, k'a daminɛ dugu misɛnw na fo ka taa se dugu barikamaw ma.
[10] U ye samasenw jɔ ka Astarte boliw dila tintinw bɛɛ kan ani jirisun kɛnɛw bɛɛ kɔrɔ.
[11] U ye wusulan suma dumanw wusu batoli kɛ yɔrɔw la i ko Matigi ye siya minw gɛn ka bɔ u ɲɛ. U ye ko bɛnbali cɛjuguw kɛ ka Matigi dusu dimin.
[12] U ye baara kɛ boliw ye, Matigi tun y'a fɔ u ye ko u kana baara si kɛ olu ye.
[13] Matigi tun ye Israɛl bɔnsɔn ni Juda bɔnsɔn lasɔmi a ka kiraw ni a ka yelikɛlaw da la ko: «A' ye aw ka sira juguw bila. Ne ye sariya min di aw bɛnbaw ma, ka o di aw ma ne ka jɔn kiraw fɛ, aw ka olu taama ka ne ka ci fɔlenw ni ne ka ko fɔlenw kɛ.»
[14] Nka u tun t'a fɛ ka o lamɛn. U ye u tulo gɛlɛya i ko u bɛnba minw ma da Matigi u ka Ala la.
[15] A ka sariya sigilenw ani a ye layidu min ta u bɛnbaw ye, ani a ye u lasɔmi ko minw na, u banna olu ma. U tugura fɛn fufafuw la fo ka u yɛrɛ kɛ fɛn fufafuw ye. U ye u kɛrɛfɛ siyaw cogo ta, Matigi tun y'a fɔ u ye ko u kana olu ka kɛtaw kɛ.
[16] U banna Matigi, u ka Ala ka ci fɔlenw ma ka misiden bisigi sanuma fila dila ka Astarte boliw dila ka u biri sankolola kɛnɛbɔlanw kɔrɔ ka olu bato ka baara kɛ Baal ye.
[17] U ye u denkɛw ni u denmusow kɛ saraka jenitaw ye ka subaaya ni filɛli kɛ ka u yɛrɛw feere ko haramulenw ma Matigi ɲɛ kɔrɔ walisa ka Matigi dusu dimin.
[18] O de kosɔn Matigi diminna Israɛl bɔnsɔn kɔrɔ kosɛbɛ ka u fili ka bɔ a ɲɛ kɔrɔ, fo Juda siya kelen tora.
[19] Juda fana ma Matigi u ka Ala ka ci fɔlenw mara, u ye Israɛl bɔnsɔn ka laada sigilenw sira taama.
[20] O de kosɔn Matigi banna Israɛl bɔnsɔn bɛɛ la ka u majigin ka u don u juguw bolo, fo a ye u fili ka bɔ a ɲɛ kɔrɔ.
[21] Israɛl bɔnsɔn farala ka bɔ Dawuda ka so la. U ye Nebat denkɛ Jeroboam sigi k'a kɛ u ka masakɛ ye, o de ye Israɛl kun yɛlɛma ka bɔ Matigi batoli la ka ko juguba kɛ. Jeroboam ye Israɛl bɔnsɔn bɛɛ don a ka jurumu la.
[22] U ma sɔn ka o sira juguw bila,
[23] fo Matigi ye u fili ka bɔ a ɲɛ kɔrɔ i ko a tun y'a fɔ a ka baaraden kiraw da la cogo min na. O de kosɔn Israɛl bɔnsɔn cɛra ka bɔ u ka jamana la ka taa kɛ jɔnw ye Asiri jamana la. U bɛ yen halibi.
[24] Asiri masakɛ nana ni Babilonɛkaw ni Kutakaw ni Avakaw ni Hamatkaw ani Sefarvayimkaw ye ka olu sigi Samari duguw kɔnɔ Israɛl bɔnsɔn nɔ na. O mɔgɔw ye Samari minɛ k'a kɛ u ta ye ka u sigi o duguw kɔnɔ.
[25] U sigi waati la, u tun tɛ Matigi bato, o de kosɔn Matigi ye warabaw ci ka u farafara.
[26] O tuma la a fɔra Asiri masakɛ ye ko: «I ye mɔgɔ minw sigi Samari duguw kɔnɔ, olu tɛ jamana bato fɛn bato cogo dɔn, o de kosɔn o bato fɛn ye warabaw ci ka o mɔgɔw farafara, k'a masɔrɔ u tɛ o jamana ka bato fɛn cogo dɔn.»
[27] O yɔrɔ nin bɛɛ Asiri masakɛ y'a fɔ ko: «Aw ye o jamana mɔgɔw ka sarakalasebaa minw minɛ ka na, a' ye o dɔ bila ka taa, o ka u kalan o bato fɛn bato cogo la.»
[28] Ayiwa, u ye o Samari mɔgɔ minɛlen sarakalasebaa kelen bila ka taa sigi Bɛtɛl. O ye o mɔgɔw kalan Matigi bato cogo la.
[29] Nka siyaw bɛɛ kelen-kelen ye u yɛrɛw ka bato fɛnw dila ka olu bila Samarikaw ka batoli kɛ yɔrɔ jɔlenw bato sow kɔnɔ. Siyaw bɛɛ kelen-kelen ye u yɛrɛw ka bato fɛnw dila u sigi duguw kɔnɔ.
[30] Babilonɛkaw ye Sukɔt-Benot dila. Gutikaw ye Nergal dila. Hamatkaw ye Asima dila.
[31] Avakaw ye Nibkaz ani Tartak dila. Sefarvayimkaw ye u ka denmisɛnw jeni tasuma la u ka bato fɛnw Adramelɛk ni Anamelɛk ye.
[32] U ye Matigi fana bato, nka u ye sarakalasebaaw bɔ mɔgɔ gwansan cɛma ka olu sigi batoli kɛ yɔrɔw la.
[33] O mɔgɔw tun bɛ Matigi bato ka u ka bato fɛnw fana bato waati kelen na ka kɛɲɛ ni u bɔ jamana ka batoli cogo ye.
[34] U bɛ u ka batoli cogo kɔrɔ kɛ halibi. U tɛ siran Matigi ɲɛ, u tɛ sɔn ka u ka laadaw wala u ka ci fɔlenw mara. Ala ka sariya minw dira Yakuba bɔnsɔn ma, u tɛ sɔn ka olu taama. Matigi ye o Yakuba tɔgɔ da ko Israɛl.
[35] Matigi ye layidu ta Yakuba bɔnsɔn ye ka ci fɔlenw di u ma ko: «Aw kana bato fɛn wɛrɛ si bato, aw kana aw biri u kɔrɔ, aw kana baara kɛ u ye, aw kana saraka faga u ye.
[36] Nka aw ka siran Matigi ɲɛ, o min ye aw labɔ Misira jamana la ni a bolo barikama ye. Aw ka aw biri o de kɔrɔ ka o bato ka aw ka sarakaw faga a ye.
[37] A ye ciw ni ko fɔlenw ni sariya ani ci fɔlen minw di aw ma, aw ka olu mara tuma bɛɛ. Aw kana bato fɛn wɛrɛ si bato.
[38] Ne ye layidu min ta aw ye, aw kana ɲinɛ o kɔ. Aw kana bato fɛn wɛrɛ si bato.
[39] Aw ka siran Matigi aw ka Ala ɲɛ, ale de bɛ aw tila ka bɔ aw juguw bɛɛ bolo.»
[40] U ma o kuma jate, nka u tugura u ka laada kɔrɔw la.
[41] U ye Matigi bato, nka u ye u ka boliw fana bato o waati kelen na. U denw ni u denw ta denw b'a kɛ i ko u faw y'a kɛ cogo min na.