[1] Jojakim ka masaya waati la, Babilonɛ masakɛ Nebukadnezar ye Juda jamana minɛ. Masakɛ Jojakim ye baara kɛ a ye san saba kɔnɔ. O kɔ, a murutira Babilonɛ masakɛ ma.
[2] Matigi ye Kaldekaw ni Sirikaw ni Moab bɔnsɔn ani Amɔn bɔnsɔn ka kɛlɛbolow bila ka taa Jojakim kama. A ye olu ci Juda masaya kama walisa ka a halaki ka kɛɲɛ ni Matigi ka kuma fɔlen ye a ka baaraden kiraw da la.
[3] O bɔnɛ ko sera u ma ka kɛɲɛ ni Matigi ka kuma fɔlen ye ko a bɛ Juda bɔnsɔn ka masaya fili ka bɔ a ɲɛ kɔrɔ Manase ka ko jugu kɛlenw bɛɛ kosɔn,
[4] ani o masakɛ ka joli jalakibali bɔnnen kosɔn. A ye Jerusalɛm nɔgɔ ni o joli ye. O de kosɔn Matigi ma sɔn ka yafa u ma.
[5] Jojakim ka ko tɔw ni a ka ko kɛlenw bɛɛ sɛbɛnnen bɛ Juda bɔnsɔn ka masakɛw ka Tilew Kibaru Kitabu kɔnɔ.
[6] Jojakim sunɔgɔra a bɛnbaw fɛ. A denkɛ Jojaken sigira masaya la a nɔ na.
[7] O y'a sɔrɔ Misira masakɛ tun tɛ se ka bɔ a ka jamana kɔnɔ, katuguni Babilonɛ masakɛ tun ye a ka mara yɔrɔw bɛɛ minɛ ka bɔ Misira kɔ da la fo ka taa se Ufrate ba ma.
[8] Jojaken si san tan ni seginnan la, a sigira masaya la. A ye kalo saba kɛ masaya la Jerusalɛm. A ba tɔgɔ ko Nehusta, Elnatan denmuso tun don ka bɔ Jerusalɛm.
[9] Jojaken ye ko jugu kɛ Matigi ɲɛ kɔrɔ k'a bɛnbaw ka siraw bɛɛ taama.
[10] O waati la, Babilonɛ masakɛ Nebukadnezar ka baaradenw taara Jerusalɛm kama ka daga a da la.
[11] Ka Babilonɛ masakɛ Nebukadnezar ka baaradenw dagalen to Jerusalɛm da la, a yɛrɛ taara dugu da la.
[12] O tuma la Juda ka masakɛ ni a ba ni a ka baaradenw ani a ka kɛlɛbolo kuntigiw bɔra dugu kɔnɔ ka taa Babilonɛ masakɛ kunbɛn, a ye Jojaken minɛ ka taa n'a ye, a yɛrɛ ka masaya san seginnan la.
[13] O kɔ, a ye Matigi ka nafolo mara yɔrɔ ni masaya so nafolo bɛɛ cɛ. Israɛl masakɛ Solomani tun ye sanu minan minw bila Matigi ka so kɔnɔ, a ye olu bɛɛ karikari.
[14] A ye Jerusalɛmkaw bɛɛ cɛ ka taa ni olu ye, kɛlɛkɛ cɛw kuntigiw bɛɛ ni kɛlɛkɛ cɛ ja gɛlɛnw, u bɛɛ lajɛlen tun ye mɔgɔ waa tan ye ani walekɛlaw ni numuw. Mɔgɔ si ma to jamana kɔnɔ faantanw kɔ.
[15] A taara ni Jojaken fana ye Babilonɛ. A ye masakɛ ba ni a musow ni a ka kuntigiw ani jamana kɔnɔ mɔgɔbaw bɛɛ minɛ ka bɔ Jerusalɛm ka taa ni u ye Babilonɛ.
[16] Kɛlɛkɛ cɛw tun ye cɛ waa wolonwula ye, walekɛlaw ni numuw, olu tun ye cɛ waa kelen ye. O mɔgɔw bɛɛ tun bɛ se ka taa kɛlɛ la. Nebukadnezar taara ni o mɔgɔ cɛlenw bɛɛ ye Babilonɛ.
[17] Babilonɛ masakɛ ye Jojaken fa balimakɛ Matania sigi masaya la a nɔ na ka o tɔgɔ yɛlɛma ko Sedesiasi.
[18] Sedesiasi sigira masaya la a si san mugan ni kelennan la, ale ye san tan ni kelen kɛ masaya la Jerusalɛm. A ba tɔgɔ ko Hamutal, Jeremi denmuso tun don ka bɔ Libina.
[19] Sedesiasi ye ko jugu kɛ Matigi ɲɛ kɔrɔ ka Jojaken ka siraw bɛɛ taama.
[20] Nin tɔɔrɔ kow ye Jerusalɛm ni Juda bɔnsɔn sɔrɔ, k'a masɔrɔ Matigi diminnen ye u fili ka bɔ a ɲɛ kɔrɔ. Sedesiasi murutira Babilonɛ masakɛ ma.