[1] Akazia denkɛ Juda ka masakɛ Joas ka masaya san mugan ni sabanan la, Jehu denkɛ Joakaz kɛra Israɛl bɔnsɔn ka masakɛ ye Samari. A ye san tan ni wolonwula kɛ masaya la.
[2] Joakaz ye ko jugu kɛ Matigi ɲɛ kɔrɔ. Nebat denkɛ Jeroboam ye Israɛl bɔnsɔn bila jurumu minw na, a tugura olu la. A ma olu dabila.
[3] Matigi diminna Israɛl bɔnsɔn kɔrɔ o waatiw bɛɛ la. A ye u don Siri masakɛ Hazaɛl ani a denkɛ Ben-Hadad bolo.
[4] Nka Joakaz ye Matigi deli. Matigi y'a ka delili lamɛn, sabu Siri masakɛ tun ye Israɛl tɔɔrɔ cogo min na, a y'o ye.
[5] Matigi ye tilabaa lawuli Israɛl bɔnsɔn ye. O ye u tila ka bɔ Sirikaw bolo. Ayiwa Israɛl bɔnsɔn sigira u ka finisow kɔnɔ i ko u tun bɛ cogo min na ka kɔrɔ.
[6] O bɛɛ n'a ta u ma Jeroboam ka so ka jurumu kɛlenw dabila, a ye Israɛl bɔnsɔn bila o jurumu minw na. U ye u yɛrɛw di kakalaya ma fo u ye Astarte boli to Samari dugu kɔnɔ.
[7] Matigi ma mɔgɔ si to Joakaz bolo a ka kɛlɛbolow la, sotigi biduuru ni wotoro tan ani kɛlɛkɛ cɛ sennama waa tan kɔ. Siri masakɛ ye u halaki ka u kɛ i ko buguri.
[8] Joakaz ka ko tɔw ni a ka ko kɛlenw ni a ka kɛlɛ kow sɛbɛnnen bɛ Israɛl bɔnsɔn ka masakɛw ka Tilew Kibaru Kitabu kɔnɔ.
[9] Joakaz sunɔgɔra a bɛnbaw fɛ. U y'a su don Samari. A denkɛ Joas sigira masaya la a nɔ na.
[10] Juda ka masakɛ Joas ka masaya san bisaba ni wolonwulanan la, Joakaz denkɛ Joas kɛra Israɛl bɔnsɔn ka masakɛ ye Samari. Ale ye san tan ni wɔɔrɔ kɛ masaya la.
[11] A ye ko jugu kɛ Matigi ɲɛ kɔrɔ. Nebat denkɛ Jeroboam ye Israɛl bɔnsɔn bila jurumu minw na, a ma olu si to yen.
[12] Joas ka ko tɔw ni a ka ko kɛlenw ani a ka kɛlɛ kow bɛɛ sɛbɛnnen bɛ Israɛl bɔnsɔn ka masakɛw ka Tilew Kibaru Kitabu kɔnɔ.
[13] Joas sunɔgɔra a bɛnbaw fɛ, Jeroboam sigira a ka masasigilan kan. Joas su donna Israɛl bɔnsɔn ka masakɛw fɛ Samari.
[14] Elise sa bana y'a minɛ. K'a dalen to o bana bolo, Israɛl ka masakɛ Joas taara a filɛ. O y'i biri kira ɲɛda kan ka kasi k'a fɔ ko: «Ne fa, ne fa, Israɛl ka wotoro ni a ka sotigiw.»
[15] Elise y'a fɔ a ye ko: «I ka kala ani biɲɛkisɛw ta.» Joas ye kala ni biɲɛkisɛw ta.
[16] Elise y'a fɔ Israɛl ka masakɛ ye ko: «I ka kala minɛ i bolo.» Masakɛ ye kala minɛ minkɛ, Elise ye a bolow da masakɛ bolow kan.
[17] O kɔ, k'a fɔ masakɛ ye ko: «I ka kɔrɔn fɛ finɛtiri dayɛlɛ.» Joas ye o dayɛlɛ. Elise y'a fɔ tun ko: «I ka biɲɛ bon.» Masakɛ ye biɲɛ bon. O tuma la Elise ko: «Nin ye Matigi ka se sɔrɔli biɲɛ bonnen de ye Sirikaw ma. I na se sɔrɔ Sirikaw kan Afɛk ka u halaki ka u ban.»
[18] Elise ko fana: «I ka biɲɛw ta.» Joas ye u ta. Elise y'a fɔ Israɛl ka masakɛ ye ko kura ko: «I ka dugukolo gosi.» Joas y'a gosi siɲɛ saba.
[19] Ala ka cɛ diminna a kɔrɔ k'a fɔ a ye ko: «I tun ka kan ka a gosi siɲɛ duuru wala wɔɔrɔ, o tuma la i tun na se sɔrɔ Sirikaw kan fo ka u halaki ka u ban, nka i na Sirikaw gosi siɲɛ saba dɔrɔn.»
[20] Elise sara, u y'a su don. San o san Moab bɔnsɔn tun bɛ na Israɛl bɔnsɔn kɛlɛ jamana kɔnɔ.
[21] Mɔgɔw tun bɛ cɛ dɔ su don, u ye juguw natɔ ye. U ye o su fili Elise kaburu kɔnɔ. O su selen Elise kolow ma, o su kununna ka i jɔ a sen kan.
[22] Siri masakɛ Hazaɛl tun bɛ Israɛl bɔnsɔn tɔɔrɔ Joakaz tilew la.
[23] Nka u hinɛ tun bɛ Matigi la, a makarila u la ka a janto u la a ka layidu talen kosɔn Ibrahima ni Isaka ani Yakuba ye. A tun t'a fɛ u ka halaki ka u ban, hali sisan a ma u fili ka bɔ a ɲɛ kɔrɔ.
[24] Siri masakɛ Hazaɛl sara, a denkɛ Ben-Hadad sigira a nɔ na.
[25] O tuma la Ben-Hadad fa Hazaɛl tun ye dugu minw minɛ Joas fa Joakaz ka waati la, Joas ye olu minɛ Ben-Hadad la. A ye Sirikaw tiɲɛn siɲɛ saba ka Israɛl bɔnsɔn ka duguw minɛ.