[1] Elise ye Sunɛm muso min denkɛ lakunun, a y'a fɔ o ye ko: «Wuli, i ni i ka so mɔgɔw, ka taa aw sigi yɔrɔ wɛrɛ la katuguni Matigi ye kɔngɔba ladon nin jamana kɔnɔ. O na tiɲɛnni kɛ san wolonwula kɔnɔ.»
[2] O tuma la, o muso ni a ka so mɔgɔw wulila ka taa u sigi Filisitikaw ka jamana la ka san wolonwula kɛ ka kɛɲɛ ni Ala ka cɛ ka kuma fɔlen ye.
[3] San wolonwula tɛmɛnnen kɔ, o muso kɔseginna ka bɔ Filisitikaw ka jamana la ka taa masakɛ sɛgɛrɛ a ka so ni a ka foro ko la.
[4] O y'a sɔrɔ masakɛ ni Ala ka cɛ ka baaraden Gehazi tun bɛ baro la ɲɔgɔn fɛ ko: «Ne bɛ i deli ko i ka Elise ka kabako kɛlenw bɛɛ lakali ne ye.»
[5] Elise ye muso ka den lakunun cogo min na, Gehazi tun b'a la ka o lakali masakɛ ye. K'a to o lakalili la, o muso nana ka masakɛ deli a ka so ni a ka foro ko la. Gehazi ko: «Ne bɛ kuma muso min ko la, o muso filɛ, Elise ye a denkɛ min lakunun, o fana filɛ.»
[6] Masakɛ ye muso ɲininka, a ye o ko lakali a ye. Masakɛ ye o muso ka ko kalifa a ka kuntigi sigilen dɔ ma, ko: «I ka nin muso bolo fɛnw bɛɛ kɔsegin a ma, ani a ka dugukolo suman bɛɛ, kabini a taa don na fo ka na se bi ma.»
[7] Elise taara Damasi. O y'a sɔrɔ Siri masakɛ Ben-Hadad banana. Mɔgɔ dɔ y'a fɔ a ye ko: «Ala ka cɛ sera yan.»
[8] Masakɛ y'a fɔ Hazaɛl ye ko: «I ka bonyali fɛn ta ka taa Ala ka cɛ kunbɛn k'a fɔ a ye ko, a ka Matigi ɲininka ni ne na wuli ka bɔ nin bana la.»
[9] Ayiwa Hazaɛl taara Elise kunbɛn ni ɲaamɛ binaani doninen ye Damasi fɛn ɲumanw la, ka olu kɛ ka kira bonya. A taara ni o fɛnw ye Elise ɲɛ kɔrɔ k'a fɔ a ye ko: «I denkɛ Siri masakɛ Ben-Hadad ye ne ci i ma ka i ɲininka yala ni a na wuli ka bɔ a ka bana la.»
[10] Elise y'a jaabi ko: «I ka taa a fɔ a ye ko a na kɛnɛya, nka Matigi y'a jira ne la ko a na sa, siga t'a la.»
[11] O kɔ, Ala ka cɛ ye Hazaɛl lajɛ kosɛbɛ ka mɛn fo ka o maloya, o kɔ, a bira kasi la.
[12] Hazaɛl y'a ɲininka ko: «Mun kosɔn ne matigi bɛ kasi?» Elise y'a jaabi ko: «Katuguni e na ko jugu minw kɛ Israɛl bɔnsɔn na, ne bɛ olu dɔn. I na tasuma tugu u ka duguba barikamaw la ka u ka kamalenw faga ni npan ye ka u ka denmisɛnw saba duguma fo ka u yɛrɛkɛ ka u ka muso kɔnɔmaw kɔnɔ fara.»
[13] Hazaɛl ko: «Nka ne, i ka baaraden bɛ i ko wulu, ne na se ka o kobaw kɛ cogo di?» Elise ko: «Matigi y'a jira ne la ko i na kɛ Siri jamana masakɛ ye.»
[14] O tuma la Hazaɛl bɔra Elise kɔrɔ ka taa a kuntigi yɔrɔ la. O y'a ɲininka ko: «Elise ye mun fɔ i ye?» A ko: «I na kɛnɛya, siga t'a la.»
[15] O dugusajɛ Hazaɛl ye birifini dɔ ta ka o don ji la ka o da Ben-Hadad ɲɛda kan, o sara. Hazaɛl kɛra masakɛ ye a nɔ na.
[16] Israɛl bɔnsɔn ka masakɛ Akab denkɛ Joram ka masaya san duurunan la, Josafat denkɛ Joram kɛra Juda ka masakɛ ye.
[17] A si tun ye san bisaba ni fila ye a ka masaya daminɛ tuma la. A ye san segin kɛ masaya la Jerusalɛm.
[18] Ale ye Israɛl bɔnsɔn ka masakɛw ka siraw taama i ko Akab ka so y'a kɛ cogo min na, katuguni Akab denmuso tun ye a muso ye. O de kosɔn a ye ko jugu kɛ Matigi ɲɛ kɔrɔ.
[19] O bɛɛ n'a ta, Matigi tun t'a fɛ ka Juda bɔnsɔn halaki a ka baaraden Dawuda kosɔn, k'a masɔrɔ a ye layidu ta ko a na Dawuda ka lanpa manalen to a bɔnsɔn cɛma tuma bɛɛ.
[20] Edɔmkaw murutira Juda bɔnsɔn ma ale tile la ka masakɛ sigi u kun na.
[21] Joram taara ni a ka kɛlɛkɛ wotorow bɛɛ ye Zair. A wulila su fɛ ka bi Edɔmkaw kan, olu ye a ka kuntigiw kooli. A ka kɛlɛkɛ cɛw bolila ka taa u ka jamana la.
[22] O de kosɔn Edɔmkaw kɛra u yɛrɛ ta ye Juda bɔnsɔn cɛma fo ka na se bi ma. Libina fana murutira o waati yɛrɛ la.
[23] Joram ka ko tɔw ni a ka ko kɛlenw ni a ka kɛwalew bɛɛ sɛbɛnnen bɛ Juda ka masakɛw ka Tilew Kibaru Kitabu kɔnɔ.
[24] Joram sunɔgɔra a bɛnbaw fɛ. A su donna olu kɛrɛ fɛ Dawuda ka dugu kɔnɔ. A denkɛ Akazia kɛra masakɛ ye a nɔ na.
[25] Israɛl ka masakɛ Akab denkɛ Joram ka masaya san tan ni filanan la, Juda ka masakɛ Joram denkɛ Akazia sigira masaya la.
[26] Akazia si tun ye san mugan ni fila ye a ka masaya daminɛ tuma la. A ye san kelen kɛ masaya la Jerusalɛm. A ba tun bɛ wele ko Atali, o tun ye Israɛl ka masakɛ Omri denmuso ye.
[27] Akazia ye Akab ni a ka so ka siraw taama. A ye ko jugu kɛ Matigi ɲɛ kɔrɔ, katuguni a ye Akab denmuso furu.
[28] A taara ni Akab denkɛ Joram ye ka Siri masakɛ Hazaɛl kɛlɛ Galad Ramɔt, nka Sirikaw ye masakɛ Joram jogin.
[29] A kɔseginna ka taa a jogindaw fura kɛ Jizreɛl, Sirikaw ye o kɛ a la Rama, Siri masakɛ Hazaɛl kɛlɛ tuma la. Juda ka masakɛ Joram denkɛ Akazia taara bɔ Akab denkɛ Joram ye Jizreɛl katuguni a tun man kɛnɛ.