[1] O waati la masakɛ Ezekiasi banana fo a tun bɛ ɲini ka sa. Amoz denkɛ kira Esayi taara a yɔrɔ la k'a fɔ a ye ko: «Matigi ko: ‹I ka i ka so kɔnɔ kow ɲɛnabɔ katuguni i tɛna kɛnɛya, i na sa.›»
[2] O tuma la Ezekiasi y'a ɲɛ sin kogo ma ka Matigi deli ko:
[3] «Matigi, i hakili to a la ko ne taamana i ɲɛ kɔrɔ ni kantigiya ni dusukun tilennen ye. Ne ye ko ɲuman kɛ i ɲɛ kɔrɔ.» O kɔ, Ezekiasi ye ɲɛji caman bɔ.
[4] Esayi bɔtɔ, sani a ka se dukɛnɛ cɛmancɛ la, Matigi kumana a fɛ ko:
[5] «I ka segin ka taa a fɔ ne ka mɔgɔw kuntigi Ezekiasi ye ko Matigi, a bɛnba Dawuda ka Ala ko: ‹Ne ye a ka delili mɛn, ne ye a ɲɛji ye. Ne na a kɛnɛya. Tile saba tɛmɛnnen kɔ, a na taa Matigi ka so kɔnɔ.
[6] Ne na san tan ni duuru fara a si tile kan. Ne na ale ni nin dugu tila ka bɔ Asiri masakɛ bolo. Ne na nin dugu mara ne yɛrɛ ani ne ka baaraden Dawuda kosɔn.›»
[7] O tuma la Esayi ko: «Aw ka toro mɔnnen kun kelen ta.» U y'a ta k'a da o sumuni kan. Masakɛ kɛnɛyara.
[8] O y'a sɔrɔ Ezekiasi tun y'a fɔ Esayi ye ko: «Taamashyɛn jumɛn n'a to ne k'a dɔn ko Matigi na ne kɛnɛya, ko ne na taa Matigi ka so kɔnɔ a tile sabanan don?»
[9] Esayi y'a jaabi ko: «Matigi bɛ taamashyɛn min di i ma ka a ka kuma fɔlen dafa, o filɛ nin ye, i b'a fɛ ja ka taa ɲɛ senda yɔrɔ tan kan wala a ka segin kɔ senda yɔrɔ tan kan?»
[10] Ezekiasi ko: «Ja ka taa ɲɛ senda yɔrɔ tan kan, o man gɛlɛn, nka a ka segin kɔ senda yɔrɔ tan kan.»
[11] Kira Esayi ye Matigi deli, ja tun jiginna senda yɔrɔ minw kan, Akaz ka yɛlɛnyɛlɛnnan kan, Matigi y'a to a ka segin kɔ fɛ senda yɔrɔ tan kan.
[12] O waati la Babilonɛ masakɛ Baladon denkɛ Berodak-Baladon ye sɛbɛn ni bonyali fɛn ci Ezekiasi ma katuguni a y'a mɛn ko Ezekiasi tun man kɛnɛ.
[13] Ezekiasi ye o cidenw minɛ ko ɲuman ka masaya so yɔrɔw bɛɛ jira u la ani a ka fɛnw mara yɔrɔ ani fɛn sɔngɔ gɛlɛnw, warijɛ ni sanu ani suma diyalanw ani tulu sɔngɔ gɛlɛn ani a ka kɛlɛkɛ minanw ni a ka nafolo mara yɔrɔw la fɛnw bɛɛ. Foyi ma to a ka masaya so kɔnɔ ani a ka mara yɔrɔw si la, Ezekiasi ma min jira u la.
[14] O tuma la kira Esayi taara masakɛ Ezekiasi sɛgɛrɛ k'a ɲininka ko: «Nin mɔgɔw ye mun fɔ i ye? U bɔra jamana jumɛn na ka na bɔ i ye?» Ezekiasi y'a jaabi ko: «U nana ka bɔ Babilonɛ jamana jan na.»
[15] Esayi ko: «I ye mun jira u la i ka masaya so kɔnɔ?» Ezekiasi ko: «U ye ne ka masaya so kɔnɔ fɛnw bɛɛ ye. Foyi ma to ne ka nafolo mara yɔrɔ la, ni ne ma min jira u la.»
[16] O tuma la Esayi y'a fɔ Ezekiasi ye ko: «I ka Matigi ka kuma lamɛn.
[17] Don bɛ na, fɛn o fɛn bɛ i ka masaya so kɔnɔ, i bɛnbaw ye fɛn o fɛn ladon i ka nafolo mara yɔrɔ la fo ka na se bi ma, o bɛɛ na taa Babilonɛ.
[18] I den minw bɛ to i kɔ, olu dɔw na cɛ ka taa jɔnya la ka baara kɛ Babilonɛ masakɛ ka masaya so kɔnɔ.»
[19] Ezekiasi ye Esayi jaabi ko: «I ye Matigi ka kuma min fɔ ne ye, o ka ɲi.» A ko fana: «Hɛrɛ ni lakanali tɛna kɛ ne si tilew la wa?»
[20] Ezekiasi ka ko tɔw ni a ka kɛlɛ kow ani a ye bajalan minw sen ka ji ladon dugu kɔnɔ, o kow bɛɛ sɛbɛnnen bɛ Juda bɔnsɔn ka masakɛw ka Tilew Kibaru Kitabu kɔnɔ.
[21] Ezekiasi sunɔgɔra a bɛnbaw fɛ, a denkɛ Manase sigira masaya la a nɔ na.