[1] Kɛlɛ tun tɛ Sirikaw ni Israɛl bɔnsɔn cɛ san saba kɔnɔ.
[2] O san sabanan la, Juda ka masakɛ Josafat taara Israɛl ka masakɛ sɛgɛrɛ.
[3] Israɛl ka masakɛ y'a fɔ a ka baaradenw ye ko: «Yala aw m'a dɔn ko Galad Ramɔt ye an ta ye wa? An dun ma fɛn kɛ ka o bɔsi Sirikaw la.»
[4] O kɔ, a y'a fɔ Josafat ye ko: «Yala e bɛ sɔn ka taa ne fɛ ka Galad Ramɔt kɛlɛ k'a minɛ wa?» Josafat ye Israɛl ka masakɛ jaabi ko: «Ne bɛ sɔn ka taa, ne ka mɔgɔw ni e ka mɔgɔw ye kelen ye, ne ka yɛlɛnkan sow ni e ka yɛlɛnkan sow ye kelen ye.»
[5] Josafat y'a fɔ Israɛl bɔnsɔn ka masakɛ ye ko: «Ne bɛ i deli ko i ka Matigi ɲininka fɔlɔ.»
[6] O tuma la, Israɛl ka masakɛ ye kira cɛ kɛmɛ naani lajɛ ka olu ɲininka ko: «Ne ka kan ka taa Galad Ramɔt kɛlɛ wa wala ne kana taa?» U y'a jaabi ko: «I ka taa, Matigi na a don masakɛ bolo.»
[7] Nka Josafat ko: «Yala Matigi ka kira dɔ wɛrɛ tɛ yan an bɛ se ka Matigi ɲininka min da la wa?»
[8] Israɛl ka masakɛ ye Josafat jaabi ko: «Kira cɛ kelen wɛrɛ bɛ yen min bɛ se ka Matigi ɲininka, o ye Jimla denkɛ Mise ye, nka a ko man di ne ye fewu katuguni a tɛ kiraya kumaɲuman fɔ ne ko la. A tɛ foyi fɔ ne ye ni ko jugu tɛ.» Josafat ko: «Masakɛ, i kana o fɔ.»
[9] O tuma la Israɛl bɔnsɔn ka masakɛ ye sɔrɔdasi jalatigi dɔ wele k'a fɔ o ye ko: «I ka taa Jimla denkɛ kira Mise wele ka na.»
[10] Israɛl bɔnsɔn ka masakɛ ni Juda bɔnsɔn ka masakɛ ye u ka masaya finiw don u la. U fila bɛɛ sigilen tun bɛ u ka masasigilanw kan fɛrɛkɛnɛ la Samari dugu donda la. Kiraw bɛɛ tun bɛ kiraya kɛ u ɲɛ kɔrɔ.
[11] Kenana denkɛ Sedesiasi tun ye biɲɛkolo nɛgɛmaw dila. A y'a fɔ ko: «Matigi ko: ‹I na Sirikaw tuu ni nin biɲɛkolow ye fo ka u ban.›»
[12] Kira tɔw fana ye kiraya kɛ ka segin o kuma kelen kan ko: «I ka taa Galad Ramɔt kama. I na se sɔrɔ, Matigi na o dugu don masakɛ bolo.»
[13] O y'a sɔrɔ, ciden min tun taara Mise wele, o y'a fɔ Mise ye ko: «Kiraw bɛɛ lajɛlen ye kirayaɲuman kɛ masakɛ ko la, ne b'i deli, i fana ka kirayaɲuman kɛ a ko la.»
[14] Nka Mise y'a jaabi ko: «Matigi ɲɛnama tɔgɔ kosɔn, Matigi mana min fɔ ne ye, ne na o de fɔ.»
[15] Mise selen masakɛ yɔrɔ la, masakɛ y'a fɔ a ye ko: «Mise, an ka taa Galad Ramɔt kɛlɛ wa wala an kana taa?» Mise y'a jaabi ko: «I ka taa, i na se sɔrɔ. Matigi na a don masakɛ bolo.»
[16] Masakɛ ko: «Ne na kangari da i ye siɲɛ joli ko i kana foyi fɔ ne ye Matigi tɔgɔ la ni tiɲɛ tɛ.»
[17] Mise y'a jaabi ko: «Ne ye Israɛl bɔnsɔn bɛɛ jɛnsɛnnen ye kulu kan i ko sagakulu ni gɛnbaa tɛ u la. Matigi y'a fɔ ko: ‹Kuntigi tɛ nin mɔgɔw la. Mɔgɔw bɛɛ ka taa u ka so hɛrɛ la.›»
[18] Israɛl bɔnsɔn ka masakɛ y'a fɔ Josafat ye ko: «Ne m'a fɔ i ye ko a tɛ kirayaɲuman kɛ ne ko la wa? A tɛ foyi fɔ ko jugu kɔ.»
[19] Mise y'a fɔ ko: «I ka Matigi ka kuma lamɛn. Ne ye Matigi sigilen ye a ka masasigilan kan, sankolola kɛlɛbolow bɛɛ lajɛlen bɛ a kɔrɔ, a kinin ni a numan fɛ.
[20] Matigi y'a fɔ ko: ‹Aw la jumɛn na Akab lafili walisa a ka taa Galad Ramɔt kama walisa a ka faga?› Kelen ye jaabili kɛ cogo dɔ la, dɔ ye jaabili kɛ cogo wɛrɛ la.
[21] O tuma la ni dɔ gɛrɛla Matigi la k'i jɔ a ɲɛ kɔrɔ k'a fɔ ko: ‹Ne na taa a lafili.› Matigi ye o ɲininka ko: ‹I na o kɛ cogo di?›
[22] O ye Matigi jaabi ko: ‹Ne na kɛ ni nkalontigɛla ye a ka kiraw bɛɛ da la.› Matigi y'a fɔ o ye ko: ‹Ɔwɔ, i na a lafili, i ka taa a kɛ i ko i y'a fɔ cogo min na.›»
[23] Mise ko fana: «Matigi ye ni nkalontigɛla don i ka kiraw bɛɛ da la, nka Matigi ye ko jugu latigɛ i kama.»
[24] O tuma la Kenana denkɛ Sedesiasi gɛrɛla Mise la k'a gosi a tama la k'a fɔ a ye ko: «Matigi Ni tɛmɛnna sira jumɛn fɛ ka bɔ ne la ka taa kuma i fɛ?»
[25] Mise ko: «Ni i donna soɲɛ kɔnɔ dogodogola ka i dogo don min na, i na o dɔn.»
[26] Israɛl ka masakɛ ye ci di ko u ka taa ni Mise ye dugutigi Amɔn ka yɔrɔ la ani masakɛ denkɛ Joas ka so
[27] k'a fɔ a ye ko masakɛ ko: «I ka nin cɛ bila kaso la ka balo dɔɔnin ni ji dɔɔnin di a ma sani ne ka kɔsegin ka na hɛrɛ la tuma min na.»
[28] Mise ko: «Ni i nana hɛrɛ la, Matigi ma kuma ne da la.» A ko fana: «Mɔgɔw bɛɛ ka ne ka kumaw to u hakili la.»
[29] O tuma la Israɛl bɔnsɔn ka masakɛ ni Juda ka masakɛ Josafat taara Galad Ramɔt kama.
[30] Israɛl ka masakɛ y'a fɔ Josafat ye ko: «Ne bɛ ne cogo yɛlɛma ka taa kɛlɛ la, nka i ka to i ka masaya finiw la.» Ayiwa, Israɛl ka masakɛ y'a cogo yɛlɛma ka taa kɛlɛ la.
[31] O y'a sɔrɔ Siri masakɛ tun ye ci di a ka kɛlɛ kuntigi cɛ bisaba ni fila ma ko: «Aw kana mɔgɔ si kɛlɛ, mɔgɔ misɛn fara mɔgɔba kan ni Israɛl bɔnsɔn ka masakɛ kelen tɛ.»
[32] Wotorotigiw ye Josafat ye tuma min na, u y'a fɔ ko: «Siga t'a la, nin ye Israɛl bɔnsɔn ka masakɛ ye.» U gɛrɛla a la k'a kɛlɛ, nka Josafat ye kulokanba ci.
[33] Wotorotigiw y'a ye ko o tɛ Israɛl bɔnsɔn ka masakɛ ye minkɛ, u seginna ka bɔ a kɔ.
[34] O tuma la cɛ dɔ ye a ka kala bon, o bɛnna Israɛl ka masakɛ ma a ka nɛgɛ dulɔki tugu yɔrɔ dɔ la. Masakɛ y'a fɔ a ka wotorotigi ye ko: «I tɛliya ka kɔsegin ka bɔ ni ne ye kɛlɛ yɔrɔ la, k'a masɔrɔ ne joginna kosɛbɛ.»
[35] Kɛlɛ juguyara o don na. Masakɛ sinsinnen tora a ka wotoro kɔnɔ Sirikaw kuntilenna la. A sara wula da fɛ, a joginda joli tun woyora ka bɔn wotoro kɔnɔ.
[36] Tile bi tuma la, pɛrɛnkanba bɔra kɛlɛ daga yɔrɔ bɛɛ la ko: «Mɔgɔw bɛɛ ka taa u ka duguw kɔnɔ, u bɛɛ ka taa u ka jamana la.»
[37] Ayiwa masakɛ Akab sara. U taara n'a ye Samari k'a su don yen.
[38] U y'a ka wotoro ko Samari ji dingɛ da la tuma min na, jatɔmusow ko yɔrɔ la, wuluw y'a joli lanɔn yen ka kɛɲɛ ni Matigi ka kuma fɔlen ye.
[39] Akab ka ko tɔw ni a ka ko kɛlenw, ni a ye so min jɔ ni samaɲin ye ka dugu minw jɔ, olu bɛɛ sɛbɛnnen bɛ Israɛl bɔnsɔn ka masakɛw ka Tilew Kibaru Kitabu kɔnɔ.
[40] Akab sunɔgɔra a bɛnbaw fɛ. A denkɛ Akazia sigira masaya la a nɔ na.
[41] Asa denkɛ Josafat kɛra Juda bɔnsɔn ka masakɛ ye Israɛl bɔnsɔn ka masakɛ Akab ka masaya san naaninan la.
[42] Josafat si tun ye san bisaba ni duuru ye a sigi tuma la masaya la. A ye san mugan ni duuru kɛ masaya la Jerusalɛm. A ba tɔgɔ ko Azuba, Silki denmuso tun don.
[43] Josafat y'a fa Asa ka siraw taama. A ma ko jugu kɛ Matigi ɲɛ kɔrɔ,
[44] nka a ma batoli kɛ yɔrɔw ci. Mɔgɔw tun bɛ sarakaw bɔ ka wusulan suma dumanw wusu o yɔrɔw la.
[45] Josafat ye hɛrɛ don a ni Israɛl ka masakɛ cɛ.
[46] Josafat ka ko tɔw ni a ka fanga ni a ka kɛlɛ kɛ cogo, olu bɛɛ sɛbɛnnen bɛ Juda ka masakɛw ka Tilew Kibaru Kitabu kɔnɔ.
[47] A ye jatɔcɛw ni jatɔmusow bɛɛ gɛn ka bɔ jamana kɔnɔ, olu tun bɛ yen a fa Asa tilew la.
[48] Masakɛ si tun tɛ Edɔm mara kun na. O jamana kunnasigibaa tun bɛ o baara kɛ.
[49] Josafat ye Tarsisi jikan kurun dɔw dila ka u ci ko u ka taa sanu ɲini Ofir, nka u ma se ka taa, k'a masɔrɔ o kurunw tiɲɛnna Ezion-Gebɛr.
[50] O tuma la Akab denkɛ Akazia y'a fɔ Josafat ye ko: «I k'a to ne ka baaradenw ni i taw ka taa kurunw kɔnɔɲɔgɔn fɛ,» nka Josafat ma sɔn.
[51] Josafat sunɔgɔra a bɛnbaw fɛ. U y'a su don olu kɛrɛ fɛ a fa Dawuda ka dugu kɔnɔ. A denkɛ Joram kɛra masakɛ ye a nɔ na.
[52] Akab denkɛ Akazia kɛra Israɛl bɔnsɔn ka masakɛ ye Samari. O kɛra Juda ka masakɛ Josafat ka masaya san tan ni wolonwulanan la. A ye san fila kɛ masaya la Israɛl kun na.
[53] A ye ko jugu kɛ Matigi ɲɛ kɔrɔ. A y'a fa ni a ba ka siraw ni Nebat denkɛ Jeroboam ka siraw taama, o min ye Israɛl bɔnsɔn bila jurumu la.
[54] A ye baara kɛ Baal ye ka o bato ka Matigi, Israɛl bɔnsɔn ka Ala dusu dimin i ko a fa y'a kɛ cogo min na.