[1] Israɛl bɔnsɔn ka masakɛ Joakaz denkɛ Joas ka masaya san filanan la, Joas denkɛ Amazia ye masaya daminɛ.
[2] Ale si tun ye san mugan ni duuru ye a sigi tuma la masaya la. A ye san mugan ni kɔnɔntɔn kɛ masaya la Jerusalɛm. A ba tɔgɔ ko Joadan, o tun bɛ Jerusalɛm.
[3] Amazia ye ko ɲuman kɛ Matigi ɲɛ kɔrɔ, nka a ma taama i ko a bɛnba Dawuda cogo, k'a masɔrɔ a ye a fa Joas ka siraw taama.
[4] Ayiwa, a ma batoli kɛ yɔrɔw ci, mɔgɔw tun bɛ to ka taa sarakaw ni wusulan sarakaw bɔ o batoli kɛ yɔrɔw la.
[5] Masaya sabatira a bolo tuma min na, baaraden minw ye a fa masakɛ faga, a ye olu faga.
[6] Nka a ma olu denw faga ka kɛɲɛ ni Musa ka sariya kitabu sɛbɛnnen ye, Matigi ye o min di Musa ma, ko: «Faw kana faga u denw kosɔn, denw kana faga u faw kosɔn. Mɔgɔw bɛɛ kelen-kelen ka faga u yɛrɛ ka hakɛw kosɔn.»
[7] Amazia ye Edɔmkaw waa tan faga jɛkɛnɛ kɔgɔma la. A ye Sela dugu minɛ ka o tɔgɔ da ko Jokteɛl, o dugu tɔgɔ y'o ye halibi.
[8] O kɔ, Amazia ye cidenw bila ka taa Jehu denkɛ Joakaz denkɛ Israɛl bɔnsɔn ka masakɛ Joas sɛgɛrɛ k'a fɔ o ye ko: «Na, an ka ɲɔgɔn kɛlɛ.»
[9] Israɛl ka masakɛ Joas y'a jaabi ko: «Liban kungo kɔnɔ ŋɔni ye ci bila ka taa fɔ Liban sedere jiri ye ko: ‹I ka i denmuso di ne ma k'a kɛ ne denkɛ muso ye.› Nka Liban kungo kɔnɔ waraw tɛmɛnna, olu ye o ŋɔni cɔngɔ u sen kɔrɔ.
[10] Tiɲɛ la, e ye Edɔmkaw faga, i dusukun falen bɛ kuncɛbaya la. I ka ɲagali i ka bonya la ka to i ka so. Mun kosɔn i bɛ i yɛrɛ bila bɔnɛ la min bɛ e ni Juda bɔnsɔn bɛɛ halaki?»
[11] Amazia ma sɔn ka Joas lamɛn. O tuma la Israɛl bɔnsɔn ka masakɛ Joas wulila, u y'a daminɛ ka ɲɔgɔn kɛlɛ, ale ni Juda ka masakɛ Amazia, Bɛt-Semɛs Juda jamana la.
[12] Israɛl cɛw ye Juda ka kɛlɛkɛ cɛw gosi, olu bɛɛ bolila ka taa so.
[13] Israɛl ka masakɛ Joas ye Akazia denkɛ Joas denkɛ Juda ka masakɛ Amazia minɛ Bɛt-Semɛs. O kɔ, a taara Jerusalɛm ka nɔnkɔn ɲɛ kɛmɛ naani ci o lamini kogo la, k'a daminɛ Efrayim donda la ka taa se seleke la da ma.
[14] A ye sanu ni warijɛ ni minan sɔngɔ gɛlɛnw bɛɛ cɛ ka bɔ Alabatosoba kɔnɔ ani masaya so nafolo mara yɔrɔ la ka taa ni olu ni mɔgɔ minɛlenw bɛɛ ye Samari.
[15] Joas ka ko tɔw ni a ka ko kɛlenw ani a ka kɛlɛ kow bɛɛ ani a tun ye Juda ka masakɛ Amazia kɛlɛ cogo min na, o bɛɛ sɛbɛnnen bɛ Israɛl bɔnsɔn ka masakɛw ka Tilew Kibaru Kitabu kɔnɔ.
[16] Joas sunɔgɔra a bɛnbaw fɛ. U y'a su don masakɛw kɛrɛ fɛ Samari. A denkɛ Jeroboam sigira masaya la a nɔ na.
[17] Joas denkɛ Juda ka masakɛ Amazia ye san tan ni duuru kɛ masaya la Joakaz denkɛ Israɛl bɔnsɔn ka masakɛ Joas salen kɔ.
[18] Amazia ka ko tɔw bɛɛ sɛbɛnnen bɛ Juda ka masakɛ ka Tilew Kibaru Kitabu kɔnɔ.
[19] U ye jɛ siri a kama Jerusalɛm. A bolila ka taa Lakis, nka u y'a nɔgɛn ka taa fo Lakis k'a faga yen.
[20] O kɔ, u y'a su da so kan ka taa n'a ye Jerusalɛm k'a su don a bɛnbaw kɛrɛ fɛ Jerusalɛm, Dawuda ka dugu kɔnɔ.
[21] O tuma la Juda bɔnsɔn bɛɛ ye Azaria kɛ u ka masakɛ ye. U y'a sigi masaya la a fa Amazia nɔ na a si san tan ni wɔɔrɔnan la.
[22] Ale de ye Elat jɔ ko kura ka o fara Juda bɔnsɔn ka mara kan a fa salen kɔ.
[23] Joas denkɛ Juda ka masakɛ Amazia ka masaya san tan ni duurunan la, Joas denkɛ Jeroboam sigira ka kɛ Israɛl bɔnsɔn ka masakɛ ye Samari. Ale ye san binaani ni kelen kɛ masaya la.
[24] A ye ko jugu kɛ Matigi ɲɛ kɔrɔ. A ma Nebat denkɛ Jeroboam ka ko jugu si to yen, o min ye Israɛl bɔnsɔn bila jurumu la.
[25] A ye Israɛl jamana danw sigi k'a daminɛ Hamat donda la ka taa bila jɛkɛnɛ kɔgɔji la ka kɛɲɛ ni Matigi, Israɛl ka Ala ka kuma fɔlen ye a ka baaraden Amitai denkɛ Jonasi da la, o tun bɛ Gat-Hefɛr.
[26] Ayiwa Matigi ye Israɛl bɔnsɔn tɔɔrɔ kow ye, olu tun dafara ka se u dan na. Hɔrɔn ni jɔn bɛɛ tun ka kan. Mɔgɔ si ma sɔrɔ min bɛ se ka u dɛmɛ.
[27] Matigi tun m'a latigɛ ko a na u tɔgɔ jɔsi ka bɔ sankolow jukɔrɔ, o de kosɔn a ye Joas denkɛ Jeroboam kɛ u tilabaa ye.
[28] Jeroboam ka ko tɔw ni a ka ko kɛlenw ani a ye se sɔrɔ a ka kɛlɛ kow la ka Damasi ni Hamat kɔsegin Israɛl ma ka bɔ Juda bolo cogo min na, olu bɛɛ sɛbɛnnen bɛ Israɛl bɔnsɔn ka masakɛw ka Tilew Kibaru Kitabu kɔnɔ.
[29] Jeroboam sunɔgɔra a bɛnbaw, Israɛl ka masakɛw fɛ. A denkɛ Zakari sigira masaya la a nɔ na.