[1] Manase si san tan ni filanan la, a sigira masaya la. A ye san biduuru ni duuru kɛ masaya la Jerusalɛm. A ba tɔgɔ ko Hefiziba.
[2] Ale ye ko jugu kɛ Matigi ɲɛ kɔrɔ. Matigi ye siya minw gɛn ka bɔ Israɛl bɔnsɔn ɲɛ, Manase ye olu ka batoli cogo haramulenw ɲɔgɔn kɛ.
[3] A fa tun ye batoli kɛ yɔrɔ minw ci, a ye olu jɔ ko kura ka Baal ka saraka bɔlanw jɔ. Israɛl ka masakɛ Akab tun ye Astarte boli minw dila, a ye olu ɲɔgɔn dila ka i biri sankolola kɛnɛbɔlanw kɔrɔ ka olu bato.
[4] A ye saraka bɔlan wɛrɛw jɔ Matigi ka so kɔnɔ, k'a sɔrɔ Matigi tun y'a fɔ o so ko la ko: «Ne na ne tɔgɔ to Jerusalɛm.»
[5] A ye saraka bɔlan wɛrɛw jɔ Matigi ka dukɛnɛ fila la sankolola kɛnɛbɔlanw ye.
[6] A y'a yɛrɛ denkɛ jeni tasuma la ka taamashyɛn dɔnbaaya kɛ ka subaaya kɛ ka sukililaw ani filɛlikɛlaw sigi. A ye Matigi dusu dimin ka ko jugu kɛ a ɲɛ kɔrɔ.
[7] Astarte boli ta fan fɛ, a ye o dila ka o jɔ Matigi ka so kɔnɔ. Matigi kumana Dawuda ni a denkɛ Solomani fɛ o so min ko la ko: «Ne ye nin Alabatosoba ni Jerusalɛm ɲɛnatɔmɔ Israɛl bɔnsɔn bɛɛ cɛma ka ne tɔgɔ kɛ o kɔnɔ tuma bɛɛ.
[8] Ne ye ci minw fɔ u ye, ni u ye olu bɛɛ mara ka ne ka jɔnkɛ Musa ka ci fɔlenw bɛɛ kɛ, o tuma la ne ye jamana min di Israɛl bɔnsɔn bɛnbaw ma, ne tɛna u gɛn ka bɔ o la.»
[9] Nka u ma olu mara. Matigi tun ye siya minw halaki ka bɔ Israɛl ɲɛ, Manase ye u kalan ko nɔgɔlenw la ka tɛmɛn o siyaw ta kan.
[10] O tuma la Matigi kumana a ka baaraden kiraw da la ko:
[11] «Juda bɔnsɔn ka masakɛ Manase ye ko jugubaw kɛ ka tɛmɛn a ɲɛ fɛ Amɔr siya kan. A ye Juda bɔnsɔn bila boli batoli jurumuw la.
[12] O de kosɔn Matigi, Israɛl bɔnsɔn ka Ala ko: ‹Ne na bɔnɛ lase Jerusalɛm ni Juda bɔnsɔn ma. Mɔgɔ o mɔgɔ mana o mɛn, o na a kibaru mɛnbaaw bɛɛ tulo kɔrɔla gwan.
[13] Ne na Jerusalɛm sara i ko ne ye Samari ni Akab ka so sara cogo min na. Ne na Jerusalɛm fura k'a kɛ i ko mɔgɔ bɛ tasa jɔsi k'a dabiri cogo min na.
[14] Ne na ne ka ciyɛn sagaden tɔ tolenw fili, ne na u don u juguw bolo ka u kɛ fɛn bɔsilen ni fɛn cɛlenw ye u juguw fɛ.
[15] K'a masɔrɔ kabini ne ye u bɛnbaw labɔ Misira jamana la don min na, u ye ko jugu kɛ ne ɲɛ kɔrɔ ka ne dusu dimin fo ka na se bi ma.›»
[16] Manase ye Juda bila jurumuw la k'a to u ka ko jugu kɛ Matigi ɲɛ kɔrɔ. Ka fara o kan, a ye mɔgɔ jalakibali caman caman faga fo ka Jerusalɛm fan bɛɛ fa u joli la.
[17] Manase ka ko tɔw ni a ka ko kɛlenw ani a ka jurumu, olu bɛɛ sɛbɛnnen bɛ Juda bɔnsɔn ka masakɛw ka Tilew Kibaru Kitabu kɔnɔ.
[18] Manase sunɔgɔra a bɛnbaw fɛ, a su donna a yɛrɛ ka masaya yɔrɔ la, Uza ka nakɔ la. A denkɛ Amɔn sigira masaya la a nɔ na.
[19] Amɔn si san mugan ni filanan la, a sigira masaya la. A ye san fila kɛ masaya la Jerusalɛm. A ba tɔgɔ ko Mesulemɛt, Haruz denmuso tun don ka bɔ Jotiba.
[20] Ale ye ko jugu kɛ Matigi ɲɛ kɔrɔ i ko a fa Manase y'a kɛ cogo min na.
[21] A y'a fa ka sira yɛrɛ de taama, a fa ye boli minw bato, a ye olu fana bato ka i biri u kɔrɔ.
[22] A ye Matigi, a bɛnbaw ka Ala bila. A ma Matigi ka sira taama.
[23] Amɔn ka baaradenw wulila a kama k'a faga a ka bon kɔnɔ.
[24] Nka mɔgɔ minw ye masakɛ faga, jamana kɔnɔ mɔgɔw ye olu faga ka masakɛ Amɔn denkɛ Josiasi sigi masaya la a nɔ na.
[25] Amɔn ka ko tɔw ani a ka ko kɛlenw bɛɛ sɛbɛnnen bɛ Juda bɔnsɔn ka masakɛw ka Tilew Kibaru Kitabu kɔnɔ.
[26] U y'a su don a ka kaburu kɔnɔ, Uza ka nakɔ la. A denkɛ Josiasi sigira masaya la a nɔ na.