[1] Akazia ba Atali y'a ye ko a denkɛ sara minkɛ, a wulila ka masakɛ denkɛw bɛɛ faga.
[2] Nka Joram denmuso Joseba, Akazia balimamuso wulila dogo la ka Akazia denkɛ Joas ta ka bɔ masakɛ denkɛw cɛma, ka ale ni a lamarabaa bila sibon dɔ kɔnɔ. U y'a dogo Atali la o cogo la, a ma faga.
[3] A dogolen tun bɛ Matigi ka so kɔnɔ a lamɔbaa Joseba fɛ san wɔɔrɔ kɔnɔ. O y'a sɔrɔ Atali bɛ masaya la jamana kun na.
[4] A san wolonwulanan la sarakalasebaa Jehojada ye ci bila ka taa cɛ kɛmɛ-kɛmɛ kuntigiw ni masakɛ ka garadiw nɔ fɛ. Olu nana a kɔrɔ Matigi ka so kɔnɔ. A ni olu ye jɛ siri ko olu k'u kali Matigi ka so kɔnɔ. O kɔ, a ye masakɛ denkɛ jira u la.
[5] A y'a fɔ u ye ko: «Aw na min kɛ, o filɛ nin ye. Aw minw bɛ don baara la lafiɲɛ don na, aw ka tila saba ye. Aw tila kelen ka masakɛ ka so kɔlɔsi.
[6] Aw tila filanan ka to Sur donda la. Aw tila sabanan ka to garadiw kɔ fɛ donda la ka so kɔlɔsi walisa mɔgɔ si kana don.
[7] Ka fara o kan, ni aw tila filanan tilara aw ka baara la lafiɲɛ don na, aw na to masakɛ kɔrɔ ka Matigi ka so kɔlɔsi.
[8] Aw na masakɛ lamini ni aw ka kɛlɛkɛ minanw ye aw bolo. Ni mɔgɔ o mɔgɔ donna aw cɛma, o ka faga. Masakɛ bɛ taa yɔrɔ o yɔrɔ, aw ka kɛ a kɔrɔ.»
[9] O cɛ kɛmɛ-kɛmɛ kuntigiw ye sarakalasebaa Jehojada ka ci fɔlenw bɛɛ kɛ. O kuntigiw ka cɛ minw ka kan ka lafiɲɛ don baara daminɛ ani minw ka kan ka baara bila, u taara ni olu ye sarakalasebaa Jehojada yɔrɔ.
[10] Sarakalasebaa ye masakɛ Dawuda ka tamaw ni nɛgɛ bɛnnanw di cɛ kɛmɛ-kɛmɛ kuntigiw ma, olu bilalen tun bɛ Matigi ka so kɔnɔ.
[11] Garadiw ye masakɛ lamini, k'a daminɛ saraka bɔlan na fo ka taa se Alabatosoba ma. U bɛɛ kelen-kelen jɔlen tun don ni u ka kɛlɛkɛ minanw ye u bolo, k'a daminɛ so kinin yanfan fɛ fo ka taa se so numan yanfan fɛ.
[12] O tuma la Jehojada ye masakɛ denkɛ madon ka masafugula don a kun na ka sariya kitabu di a ma. U y'a mun k'a kɛ masakɛ ye ka tɛgɛrɛ fɔ ka pɛrɛn ko: «Masakɛ ka si sɔrɔ.»
[13] Atali ye kɔlɔsilikɛlaw ni mɔgɔw mankan mɛn minkɛ, a taara Matigi ka so kɔnɔ mɔgɔw cɛma.
[14] A ye filɛli kɛ ka masakɛ jɔlen ye samasen kɛrɛ fɛ banbe kan, sɔrɔdasi kuntigiw ni buru fyɛlaw jɔlen tun bɛ a kɛrɛ fɛ. Jamana mɔgɔw bɛɛ ɲagalilen tun don, u ye buru fyɛ. O tuma la Atali ye a ka finiw fara ka pɛrɛn ko: «Janfa kɛra! Janfa kɛra!»
[15] Nka sarakalasebaa Jehojada y'a fɔ cɛ kɛmɛ-kɛmɛ kuntigiw ye ko: «A' ye bɔ n'a ye kɛnɛma aw fila furancɛ la. Ni mɔgɔ o mɔgɔ tugura a kɔ, o tigi ka faga ni npan ye,» katuguni sarakalasebaa tun ye mɔgɔw bali walisa a kana na faga Alabatosoba kɔnɔ.
[16] U ye sira di Atali ma ka taa n'a ye masa so da la yɛlɛnkan sow don sira fɛ. U y'a faga yen.
[17] Jehojada y'a to layidu ka ta Matigi ani masakɛ ni mɔgɔw cɛ ko Israɛl bɔnsɔn na kɛ Matigi ka mɔgɔw ye. A y'a to layidu ka ta masakɛ ni mɔgɔw fana cɛ.
[18] Jamana mɔgɔw bɛɛ donna Baal batoso kɔnɔ k'a bɛɛ tiɲɛn, ka a ka saraka bɔlanw ni a jaw karikari ka Baal ka sarakalasebaa Matan faga saraka bɔlanw ɲɛ fɛ. Sarakalasebaa Jehojada ye garadiw sigi Alabatosoba kɔnɔ.
[19] O kɔ, a ye garadiw ni masakɛ kɔlɔsibaaw ani jamana mɔgɔw bɛɛ labɔ Alabatosoba kɔnɔ ka taa ni masakɛ ye masaya so kɔnɔ garadiw ka donda fɛ. Joas sigira masasigilan kan.
[20] Jamana mɔgɔw bɛɛ ɲagalila. Masamusoma Atali fagara ni npan ye ka bɔ masasigilan kan tuma min na, dugu ye lafiya sɔrɔ.
[21] Joas sigira masasigilan kan a si san wolonwulanan la.