[1] Kira dɔ denkɛ muso nana Elise sɛgɛrɛ k'a fɔ a ye ko: «I ka baaraden, ne cɛ sara. I y'a dɔn ko i ka baaraden tun bɛ siran Matigi ɲɛ. Jurutigi dɔ nana ne denkɛ fila minɛ ka olu kɛ a ka jɔnw ye.»
[2] Elise y'a fɔ a ye ko: «Ne ka mun kɛ i ye? Fɛn min bɛ i ka so, o fɔ ne ye.» Muso y'a jaabi ko: «Foyi tɛ i ka jɔnmuso ka so ni tulu daga kelen tɛ.»
[3] Elise ko: «I ka taa daga lankolon caman singa i sigiɲɔgɔnw fɛ. I ka u caya kosɛbɛ.
[4] I ka don so kɔnɔ ka da tugu i ni i denkɛw da la ka tulu yɛlɛma o dagaw bɛɛ kɔnɔ fo ka u bɛɛ fa ka u bila kɛrɛ fɛ.»
[5] O muso bɔlen kɔ yen, a taara datugu a ni a denkɛw da la. Olu tun bɛ dagaw di a ma, a tun bɛ tulu yɛlɛma olu kɔnɔ.
[6] Dagaw bɛɛ falen kɔ, a y'a fɔ a denkɛ ye ko: «I ka dɔ wɛrɛ di ne ma.» Nka denkɛ y'a jaabi ko: «Daga wɛrɛ tɛ yen tun.» O tuma la tulu jɔra.
[7] Ayiwa muso taara o fɔ Ala ka cɛ ye. O y'a fɔ a ye ko: «Taa ka tulu feere ka i ka juru sara. Ni a tɔ min tora, e ni i denkɛw ka o kɛ balo ye.»
[8] Don dɔ la Elise tɛmɛnna Sunɛm dugu kɔnɔ. Muso fɛntigi dɔ tun bɛ yen, o ye Elise karaba ka dumuni kɛ a ka so. K'a daminɛ o don na, ni Elise tun bɛ tɛmɛn tuma o tuma, a tun bɛ don o muso ka so ka dumuni kɛ.
[9] O muso y'a fɔ a cɛ ye ko: «Ne y'a dɔn ko nin cɛ ye Ala ka mɔgɔ senuma dɔ ye.
[10] Ne bɛ i deli, an ka bon misɛn dɔ jɔ a ye sankanso san fɛ k'a kɛ a siyɔrɔ ye ka dalan kelen bila a ye yen ani tabali ni sigilan ani lanpa. Ni a nana an ka so tuma o tuma, a na jigin yen.»
[11] Don dɔ la Elise taara Sunɛm. A taara o sankanso kɔnɔ ka i da.
[12] A y'a fɔ a ka baaraden Gehazi ye ko: «I ka nin Sunɛm muso wele ka na.» Gehazi y'a wele, muso taara Elise yɔrɔ.
[13] O tuma la Elise y'a fɔ Gehazi ye ko: «I k'a fɔ nin muso ye ko, a ye an ladon kosɛbɛ, ayiwa sisan an ka mun kɛ a ye? An ka kuma masakɛ fɛ wala kɛlɛbolow kuntigi fɛ a ko la wa?» Muso ko: «Ne bɛ hɛrɛ la ne ka mɔgɔw cɛma.»
[14] Elise ko: «An ka mun kɛ a ye?» Gehazi ko: «A filɛ, denkɛ si t'a fɛ, a cɛ fana kɔrɔla.»
[15] Elise y'a fɔ a ye ko: «Muso wele ka na.» Gehazi y'a wele. Muso nana i jɔ so da la.
[16] Elise y'a fɔ muso ye ko: «San wɛrɛ ɲan tuma nin waati yɛrɛ la, i na denkɛ sɔrɔ.» Muso ko: «Ayi, ne matigi, e min ye Ala ka cɛ ye, i kana i ka jɔnmuso lafili.»
[17] O muso ye kɔnɔ ta o san na yɛlɛma ka denkɛ bange ka kɛɲɛ ni Elise ka kuma fɔlen ye.
[18] Den bonyara tuma min na, don dɔ la a taara a fa sɛgɛrɛ suman tigɛ yɔrɔ la.
[19] A y'a fɔ a fa ye ko: «Ne kunkolo! Ne kunkolo!» Fa y'a fɔ baaraden ye ko a ka taa a di a ba ma.
[20] Baaraden taara ni cɛni ye k'a di a ba ma. Den dalen tora a ba sen kan fo ka taa tile gwan. O kɔ, a sara.
[21] O tuma la muso yɛlɛnna ni den ye k'a da Ala ka cɛ ka dalan kan. O kɔ, ka da tugu ka bɔ.
[22] O kɔ, a ye a cɛ wele k'a fɔ o ye ko: «I ka baaraden dɔ ni fali dɔ ci ne ma yan. Ne bɛ taa Ala ka cɛ sɛgɛrɛ, o kɔ, ka kɔsegin ka na.»
[23] A cɛ y'a ɲininka ko: «I b'a fɛ ka taa o fɛ yen bi wa? Bi tɛ kalo kura wala lafiɲɛ don ye.» Muso ko: «I kana hami o la.»
[24] Muso ye tɛrɛfɛ da fali kan k'a fɔ a ka baaraden ye ko: «An ka tɛliya ka taa, i kana i jɔ sira la fo ni ne y'a fɔ i ye.»
[25] O tuma la muso taara Ala ka cɛ sɛgɛrɛ Karmɛl kulu kan. Ala ka cɛ y'a natɔ ye yɔrɔ jan k'a fɔ a ka baaraden Gehazi ye ko: «Nin ye Sunɛm muso ye.
[26] I ka boli k'a kunbɛn k'a ɲininka ko: ‹I bɛ hɛrɛ la wa? I cɛ ni i denkɛ ka kɛnɛ wa?›» Muso y'a jaabi ko: «Ɔwɔ, hɛrɛ bɛ.»
[27] Muso selen Ala ka cɛ yɔrɔ la kulu kan, a y'a sen susu. Gehazi gɛrɛla muso la ko a b'a gɛn, nka Ala ka cɛ ko: «A to yen! A dusu kasilen don. Matigi ye o ko dogo ne la, a tun t'a fɛ ne ka o dɔn.»
[28] Muso y'a fɔ ko: «Yala ne ye denkɛ deli ne matigi fɛ wa? Ne m'a fɔ e ye ko i kana ne lafili wa?»
[29] Elise y'a fɔ Gehazi ye ko: «I cɛ siri ka ne ka bere ta i bolo ka sira minɛ ka taa. Ni i ni mɔgɔ dɔ bɛnna, i kana a fo. Ni mɔgɔ dɔ ye i fo, i kana o laminɛ. I ka ne ka bere da den ɲɛda kan.»
[30] Den ba y'a fɔ Elise ye ko: «Matigi ɲɛnama tɔgɔ kosɔn, ka i ɲɛnama to, ne tɛna fara i la!» O tuma la Elise wulila ka tugu a kɔ.
[31] Gehazi taara u ɲɛ ka bere da den ɲɛda kan, nka a ma kumakan bɔ, ni tun t'a la tun. A kɔseginna ka Elise kunbɛn k'a fɔ a ye ko: «Den ma kunun.»
[32] Elise sera so kɔnɔ tuma min na, a y'a sɔrɔ den salen dalen don a ka dalan kan.
[33] A donna so kɔnɔ ka datugu a yɛrɛ ni den da la ka Matigi deli.
[34] O kɔ, a yɛlɛnna dalan kan ka i sɛɛnɛ den kan k'a da bɛn den da ma, ka a ɲɛ sin den ɲɛ ma k'a bolow da den bolow kan ka i sɛɛnɛ den kan. Den fari daminɛna ka kalaya.
[35] O kɔ, Elise y'i mabɔ a la ka i yaalayaala so kɔnɔ. O kɔ, a yɛlɛnna ka i sɛɛnɛ den kan tun. O tuma la denmisɛn tisora siɲɛ wolonwula ka a ɲɛ yɛlɛn.
[36] O yɔrɔ nin bɛɛ Elise ye Gehazi wele k'a fɔ a ye ko: «I ka Sunɛm muso wele ka na.» Gehazi y'a wele. Elise y'a fɔ a ye ko: «I denkɛ ta.»
[37] O tuma la muso gɛrɛla ka i bi Elise sen kɔrɔ duguma. O kɔ, a y'a denkɛ ta ka bɔ.
[38] Elise taara Gilgal. Kɔngɔba tun bɛ jamana kɔnɔ o waati la. Kiraw denkɛw taara u sigi Elise ɲɛ kɔrɔ. A y'a fɔ a ka baaraden ye ko: «I ka nɛgɛ daga belebeleba sigi ta kan ka dumuni tobi kiraw denkɛw ye.»
[39] U la kelen taara kungo kɔnɔ ka ɲugu ɲini. O ye nzere mana dɔw sɔrɔ yen k'u kari ka a ka dulɔki bolo fa ni u ye. A seginna ka taa so tuma min na, a ye u tigɛtigɛ ka u kɛ nɛgɛ daga kɔnɔ dumuni tobita kan, katuguni u tun ma a dɔn.
[40] U ye cɛw ka dumuni bɔ. Ka u to dumuni la, u pɛrɛnna ko: «E Ala ka cɛ, saya fɛn bɛ daga kɔnɔ.» U m'a se k'a dun.
[41] Elise ko: «A' ye na ni mugu ye.» A y'a kɛ nɛgɛ daga kɔnɔ k'a fɔ ko: «A' ye dumuni di nin mɔgɔw ma sa.» U ye dumuni kɛ. Fɛn jugu si ma sɔrɔ daga kɔnɔ tun.
[42] Cɛ dɔ nana ka bɔ Bal-Salisa ni suman kura kun fɔlɔ orje buurukun mugan ye ani tinsan kɛnɛ a ka bɔrɛ kɔnɔ ka u di Elise ma. Elisɛ y'a fɔ a ka baaraden ye ko: «I ka nin buuruw di nin mɔgɔw ma, u k'a dun.»
[43] A ka baaraden y'a jaabi ko: «Ne bɛ se ka o di o cɛ kɛmɛ ma cogo di?» Nka Elise y'a jaabi ko: «I ka o buuruw di mɔgɔw ma, u k'a dun. Katuguni Matigi ko: ‹U na dumuni kɛ ka a tɔ to.›»
[44] Ayiwa baaraden ye o sigi mɔgɔw kɔrɔ. U y'a dun, a tɔ tora ka kɛɲɛ ni Matigi ka kuma fɔlen ye.