[1] O tuma la Elise y'a fɔ ko: «Matigi ye min fɔ, a' ye o lamɛn. Matigi ko: ‹Sini ɲan tuma farinimugu kilo tan ni fila na feere warijɛ kelen na, orjekisɛ kilo mugan ni naani na feere warijɛ kelen na fana Samari dugu donda la.›»
[2] Masakɛ ka kɔlɔsibaa min bɛ masakɛ kɔrɔ, o ye Ala ka cɛ jaabi ko: «Hali ni Matigi ye sankolo dayɛlɛ, o bɛ se ka kɛ wa?» Elise ko: «I na a ye i ɲɛw la, nka i tɛna a nɛnɛ.»
[3] Kunatɔ naani tun bɛ Samari dugu donda la. Olu y'a fɔ ɲɔgɔn ye ko: «Mun kosɔn an ka to yan ka saya makɔnɔ?
[4] Ni an y'a latigɛ ka taa don dugu kɔnɔ, kɔngɔ bɛ yen, an na sa. Ni an tora yan, an na sa fana. A' ye na sa, an ka taa an yɛrɛw di Sirikaw ka kɛlɛbolo ma. Ni u ye an ɲɛnama to, an ɲɛnama na to, ni u ye an faga, an na sa.»
[5] O tuma la u taara Sirikaw ka daga la dibi don tuma la. U y'a sɔrɔ ko mɔgɔ si tun tɛ yen.
[6] Ala ye wotorow bolikan ni sow bolikanba ni kɛlɛboloba mankan lase Sirikaw ka daga la. Sirikaw y'a fɔ ɲɔgɔn ye ko: «Israɛl ka masakɛ ye Hɛti bɔnsɔn ni Misirakaw ka masakɛw sara ka na an kama.»
[7] O yɔrɔ nin bɛɛ Sirikaw bɛɛ bolila fitiri da fɛ. U ye u ka finisow ni u ka sow ni u ka faliw to daga la yen ka boli ka taa ka u yɛrɛw ni kisi.
[8] O kunatɔw sera kɛlɛ daga donda la ka don finiso dɔ kɔnɔ. U ye dumuni ni minni kɛ, o kɔ, u ye warijɛ ni sanu ani finiw cɛ ka taa olu dogo ka na don finiso wɛrɛ kɔnɔ ka o kɔnɔ fɛnw fana cɛ ka taa olu dogo.
[9] O tuma la u y'a fɔ ɲɔgɔn ye ko: «An ma ko ɲuman kɛ dɛ. Bi ye kibaru ɲuman fɔ don ye. An dun bɛ an makun. Ni an ye dugujɛ makɔnɔ, ni an ma kuma, an na jalaki. Ayiwa, a' ye na sa, an ka taa ka nin kow lakali masakɛ ka so ye.»
[10] O yɔrɔ nin bɛɛ u taara dugu donda kɔlɔsibaaw wele ka o kow fɔ olu ye ko: «An tun taara Sirikaw ka kɛlɛ daga la, an ma mɔgɔ si sɔrɔ yen. An ma mɔgɔ si mankan fana mɛn. Foyi tɛ yen ni sow ni faliw sirilen tɛ ani finiso lankolonw.»
[11] O tuma la dugu dakɔlɔsibaaw pɛrɛnna ka o kunatɔw ka kibaru fɔ masakɛ ka so mɔgɔw ye.
[12] Masakɛ wulila su fɛ k'a fɔ a ka baaradenw ye ko: «Sirikaw ye dabali min dila an kama, ne bɛ o cogo fɔ aw ye. U y'a dɔn ko kɔngɔ bɛ an na, o de kosɔn u bɔra u ka daga la ka u dogo kungo kɔnɔ k'a fɔ ɲɔgɔn ye ko: ‹Ni Israɛl bɔnsɔn bɔra Samari kɔnɔ, an na u ɲɛnama minɛ ka don dugu kɔnɔ.›»
[13] Masakɛ ka baaradenw la kelen y'a fɔ a ye ko: «So minw ɲɛnama tora dugu kɔnɔ, olu bɛ i ko Israɛl mɔgɔ minw ɲɛnama tora salenw kɔ. U bɛɛ jaasilen don. An ka mɔgɔ dɔw ni o sow la duuru ci ka taa a ko sɛgɛsɛgɛ.»
[14] O tuma la u ye wotoro fila ni u sow labɛn, masakɛ ye mɔgɔ ci ka taa Sirikaw ka kɛlɛbolo filɛ. A ko: «A' ye taa a lajɛ.»
[15] Olu taara Sirikaw nɔ fɛ ka taa se Jurdɛn ba ma. U ma foyi ye sira la ni finiw ni minanw tɛ, Sirikaw bolitɔ ye olu minw fili. Cidenw kɔseginna ka o kow fɔ masakɛ ye.
[16] O kɛlen, mɔgɔw bɔra ka taa Sirikaw ka daga la ka fɛnw cɛ. Farinimugu kilo tan ni fila tun bɛ feere warijɛ kelen na, orjekisɛ kilo mugan ni naani tun bɛ feere warijɛ kelen na ka kɛɲɛ ni Matigi ka kuma fɔlen ye.
[17] Masakɛ bolo dalen tun bɛ jalatigi min kan, a ye o kɛ dakɔlɔsibaa ye. Mɔgɔw yɛlɛnna o kan dugu donda la k'a foroki. A sara ka kɛɲɛ ni Ala ka cɛ ka kuma fɔlen ye, a tun y'o fɔ masakɛ ye, o taalen a sɛgɛrɛ.
[18] O cogo la Ala ka cɛ tun y'a fɔ masakɛ ye ko: «Sini ɲan tuma orjekisɛ kilo mugan ni naani na feere warijɛ kelen na, mugu kilo tan ni fila na feere warijɛ kelen na Samari dugu donda la.»
[19] Masakɛ kɔlɔsibaa tun ye Ala ka cɛ jaabi ko: «Hali ni Ala ye sankolo dayɛlɛ, o bɛ se ka kɛ wa?» O tuma la Elise tun y'a fɔ ko: «I na o ye i ɲɛ la, nka i tɛna a nɛnɛ.»
[20] O de kɛra, katuguni mɔgɔw y'a cɔngɔ u sen kɔrɔ dugu donda la, a sara.