[1] Masakɛ Ezekiasi ye o kibaru mɛn tuma min na, a y'a ka finiw fara ka cafu fini don a la ka taa Matigi ka so kɔnɔ.
[2] O kɔ, a ye masaya sokɔlɔsibaa Eliakim ni sɛbɛnnikɛla Sebna ani sarakalasebaa cɛkɔrɔbaw ci ka taa Amoz denkɛ kira Esayi sɛgɛrɛ ni cafu fini ye u kan na.
[3] Ezekiasi ka ci filɛ nin ye ko: «Bi ye tɔɔrɔ ni kɔrɔfɔli ani mafiɲɛyali don ye katuguni denw sera bange ye, nka barika tɛ u ba fɛ ka u bange.
[4] Rabsake ye a makɛ Asiri masakɛ ka kuma minw fɔ ka Ala ɲɛnama neni, a dɔrɔ Matigi i ka Ala na o kumaw mɛn ka u sara. Ayiwa, i ka taa delili kɛ an tɔ tolenw ye.»
[5] Ayiwa Ezekiasi ka baaradenw sera Esayi ma tuma min na,
[6] Esayi y'a fɔ u ye ko: «Aw ka taa nin kuma fɔ aw kuntigi ye, ko Matigi ko: ‹Asiri masakɛ ka baaradenw ye ne neni ni kuma minw ye, aw kana siran olu ɲɛ.
[7] A na kibaru dɔ mɛn, ne na a miirili yɛlɛma fo a na kɔsegin a yɛrɛ ka jamana la. Ne na a faga ni npan ye yen.›»
[8] Rabsake y'a mɛn ko Asiri masakɛ bɔra Lakis ka taa daga Libina da la ka o kɛlɛ tuma min na, a taara a sɛgɛrɛ yen.
[9] O tuma la Asiri masakɛ ye ci sɔrɔ Etiopi masakɛ Tirhaka ko la ko a bɛ na a kama ka a kɛlɛ. O de kosɔn Sankerib ye ciden wɛrɛ ci Ezekiasi ma k'a fɔ a ye ko:
[10] «Aw ka a fɔ Juda ka masakɛ Ezekiasi ye ko: ‹I bɛ i jigi da Ala min kan, o kana i lafili, ko Jerusalɛm tɛna don Asiri masakɛ bolo.›
[11] Asiri masakɛ ye min kɛ jamanaw bɛɛ la ka u halaki, i ye o kibaru mɛn. Olu bɛɛ halakira, e bɛ miiri ko i bɛ kisi wa?
[12] Ne bɛnbaw ye siya minw halaki, olu ka bato fɛnw sera ka u tila wa? Gozan ni Karan ni Rezɛf ani Edɛn bɔnsɔn minw bɛ Telasar, olu ka bato fɛnw sera ka u tila wa?
[13] Hamat masakɛ ni Arpad masakɛ ani Sefarvayim dugu masakɛ ni Hena ani Iva masakɛw bɛ min?»
[14] Ezekiasi ye o sɛbɛn minɛ cidenw bolo ka o kalan. O kɔ, a taara Matigi batosoba kɔnɔ ka o sɛbɛn fɛnsɛ Matigi ɲɛ kɔrɔ.
[15] Ezekiasi ye Matigi deli ko: «Matigi, Israɛl ka Ala, e min sigilen bɛ serubɛnw furancɛ la. E kelenpe bɛ dugukolo kan masakɛw bɛɛ kun na, i ye sankolo ni dugukolo da.
[16] Matigi, i tulo majɔ ka lamɛnni kɛ. Matigi, i ɲɛ dayɛlɛ ka filɛli kɛ. Sankerib ye sɛbɛn min ci ka Ala ɲɛnama neni, i tulo majɔ o la.
[17] Matigi, tiɲɛ don, Asiri masakɛw ye siyaw tiɲɛn ka u ka jamanaw halaki,
[18] ka u ka bato fɛnw fili tasuma la, nka olu tun tɛ bato fɛn sɛbɛw ye, jiri ni kabakurun nataliyew don, mɔgɔw bolo baara nɔw don. O de kosɔn u ye olu bɛɛ tiɲɛn.
[19] Ayiwa sisan, Matigi an ka Ala, ne bɛ i deli, i ka an tila ka bɔ Sankerib bolo walisa dugukolo kan masayaw bɛɛ k'a dɔn ko e Matigi kelenpe de ye Ala ye.»
[20] O tuma la Amoz denkɛ Esayi ye ci bila ka taa a fɔ Ezekiasi ye ko: «Matigi, Israɛl ka Ala ko: ‹I ye delili min kɛ Asiri masakɛ Sankerib ko la, ne ye o mɛn.›
[21] Matigi ka kuma filɛ nin ye a kama, ko: ‹Npogotigi Sion denmuso bɛ i mafiɲɛya ka yɛlɛ bɔ i la. Jerusalɛm denmuso bɛ a kun kɔmi i kama.
[22] Asiri masakɛ, i ye jɔn neni k'a mafiɲɛya? I ye i kan kɔrɔta jɔn kama? I ye i ɲɛ kɔrɔta san fɛ Israɛl ka senuma kama k'a lakari.
[23] I ye Matigi mafiɲɛya i ka cidenw da la k'a fɔ ko: «Ne na yɛlɛn kulu kan ni ne ka wotoro dama dɔnbali ye ka taa fo Liban san fɛ. Ne na sedere jiri janw tigɛ, ani sipere jiri ɲumanw. Ne na se fo kulu kuncɛ ma, o kungoba la tu kɔnɔ.
[24] I ko, i ye kɔlɔnw sen jamana wɛrɛ la ka u ji min, ko i na Misira jamana bajiw bɛɛ ja ni i sen tɛgɛ ye.»
[25] ‹I m'a mɛn wa ko ne ye o labɛn ka kɔrɔ, ko ne ye o ko latigɛ fɔlɔfɔlɔ waati tɛmɛnnenw la wa? Sisan ne y'a to o ko ka kɛ, ko i ka dugu barikamaw ci ka u kɛ tomonw ye.
[26] U kɔnɔ mɔgɔw barika dɛsɛra, u siranna ka maloya, u kɛra i ko kungo kɔnɔ bin, i ko ba dala bin nugu, i ko so kunna bin nugu, i ko alikama sun min bɛ ja sani a ka tinsan bɔ.
[27] Ne bɛ i ka kɛta bɛɛ dɔn, ni i bɛ i sigi, ni i bɛ bɔ, ni i bɛ don, ni i wulila ne kama, ne bɛ o bɛɛ dɔn.
[28] I kɛra fatɔ ye ne kama, i ka kuncɛbaya kuma sera ne tulo ma, o de kosɔn ne na ne ka nunnanɛgɛ don i nun na, ka ne ka karafɛ don i da la ka i kɔsegin i na sira fɛ.›
[29] «E Ezekiasi, e na dɔn taamashyɛn min fɛ ko ne ka kumaw na dafa, o filɛ nin ye: ɲinan aw yɛrɛw ka suman minw bɛ tigɛ, aw na olu dun, san natɔ aw na suman mana dun, nka a san sabanan la aw na danni kɛ ka suman tigɛ, aw na rezɛn sunw turu ka olu mɔ dun.
[30] Juda ka so tɔ tolen minw kisira, olu na dili don ko kura ka den kɛ san fɛ.
[31] Ɔwɔ, a tɔ na to Jerusalɛm, dɔ na kisi ka bɔ Sion kulu kan. Kɛlɛbolow Matigi na o kɛ a ka kanuyaba kosɔn.
[32] «O de kosɔn, a filɛ, Matigi y'a fɔ Asiri masakɛ ko la ko: ‹A tɛna don nin dugu kɔnɔ, a tɛna biɲɛ bon dugu kama, a tɛna nɛgɛ bɛnnan si ta a kama, a tɛna yɛlɛnyɛlɛnnan jɔ Jerusalɛm la k'a kɛlɛ.
[33] A na kɔsegin a na sira fɛ, a tɛna don nin dugu kɔnɔ.› Matigi ko ten.
[34] ‹Ne na nin dugu mara walisa k'a kisi ne ni ne ka baaraden Dawuda kosɔn.›»
[35] O su yɛrɛ la, Matigi ka mɛlɛkɛ dɔ taara Asirikaw ka daga la ka mɔgɔ waa kɛmɛ ni bisegin ani duuru faga u la. O dugusajɛ sɔgɔma da fɛ, u ma foyi ye mɔgɔ suw kɔ.
[36] O tuma la Asiri masakɛ Sankerib wulila ka bɔ a ka daga la ka kɔsegin ka taa Ninivɛ. A tora yen.
[37] Don dɔ la, ka a birilen to a ka bato fɛn Nisrok ka so kɔnɔ, a denkɛ fila Adramelɛk ani Sarezɛr y'a faga ni npan ye, o kɔ, olu bolila ka taa Arara jamana la. A denkɛ Esar-Hadon sigira masaya la a nɔ na.