[1] Jehu ka masaya san wolonwulanan la, Joas sigira masaya la. A ye san binaani kɛ masaya la Jerusalɛm. A ba tɔgɔ ko Zibija, Beɛr-Sebaka tun don.
[2] Joas ye ko ɲuman kɛ Matigi ɲɛ kɔrɔ sarakalasebaa Jehojada ka ɲɛ jirali waati bɛɛ la.
[3] O bɛɛ n'a ta a ma batoli kɛ yɔrɔw ci. Mɔgɔw tun bɛ to ka saraka jenitaw ni wusulan suma duman sarakaw lase o batoli kɛ yɔrɔw kan.
[4] Joas y'a fɔ sarakalasebaaw ye ko: «Wari minw bɛ bila Matigi ka kɛsu kɔnɔ a ka so kɔnɔ Israɛl bɔnsɔn bɛɛ kelen-kelen fɛ ani mɔgɔ kunmabɔ wari ani diyaɲe nili fɛn minw bɛ bila Matigi ka so kɔnɔ,
[5] sarakalasebaaw bɛɛ kelen-kelen ka o wariw minɛ u dɔnbaaw bolo, olu ka kɛ ka Alabatosoba tiɲɛn yɔrɔw dila.»
[6] O y'a sɔrɔ masakɛ Joas tun bɛ a ka masaya san mugan ni sabanan la ka ban, sarakalasebaaw tun ma Alabatosoba tiɲɛn yɔrɔ si dila fɔlɔ.
[7] O tuma la masakɛ Joas ye sarakalasebaaw kuntigi Jehojada ni sarakalasebaa tɔw wele k'a fɔ u ye ko: «Mun kosɔn aw tɛ Alabatosoba tiɲɛn yɔrɔw dila? K'a daminɛ sisan na, aw kana wari si minɛ tun, aw k'a to a ka kɛ ka Alabatosoba tiɲɛn yɔrɔw dila.»
[8] Sarakalasebaaw ma wari minɛ mɔgɔw bolo tun, u ma sɔn ka Alabatosoba tiɲɛn yɔrɔ dilali baara fana kɛ.
[9] Ayiwa sarakalasebaa Jehojada ye wari bila kɛsu kelen ta ka wo kɛ o la ka o bila saraka bɔlan kinin yanfan fɛ, Alabatosoba donda la. Sarakalasebaa minw tun bɛ da kɔlɔsi, olu ye wari bilataw bɛɛ bila Alabatosoba kɔnɔ.
[10] U y'a ye ko wari caman bɛ o kɛsu kɔnɔ tuma min na, masakɛ ka sɛbɛnnikɛla ani sarakalasebaaw kuntigi ye o kɛsu dayɛlɛ ka Alabatosoba kɔnɔ wari jate ka o kɛ bɔrɛw kɔnɔ.
[11] O kɔ, u tun bɛ o wari di Alabatosoba baara kuntigiw ma. Jiri dɛsɛlaw ni so jɔlaw, minw tun bɛ baara kɛ Matigi ka so kɔnɔ, u tun bɛ olu sara.
[12] So jɔlaw ni kaba dɛsɛlaw, u tun bɛ olu sara, ka jiriw ni kaba dɛsɛnenw ani so dila fɛnw bɛɛ san so tiɲɛn yɔrɔw dilali kama.
[13] Nka mɔgɔw taara ni wari min ye Alabatosoba kɔnɔ, u ma o si kɛ ka warijɛ jifilenw ni fitinɛ da bɔlanw ni tasaw ni buru fyɛtaw ni sanu minanw ni warijɛ minanw dila Matigi ka so ye.
[14] U ye o wari di baarakɛlaw ma, ko olu k'a kɛ ka Matigi ka so tiɲɛn yɔrɔw dila.
[15] U ye o wari don mɔgɔ minw bolo, olu ka o baarakɛlaw sara, u ma olu ɲininka wari ko la, katuguni dannamɔgɔw tun don.
[16] U ma taa ni jalaki yafa sarakaw wari ni jurumu kafari wari ye Alabatosoba kɔnɔ. Olu tun ye sarakalasebaaw ta ye.
[17] O waati la Siri masakɛ Hazaɛl nana bi Gat kan k'a minɛ. A tun b'a fɛ ka Jerusalɛm fana minɛ.
[18] O tuma la Juda bɔnsɔn ka masakɛ Joas ye a fa Akazia ni Joram ani Josafat ka fɛn senumaw bɛɛ ta ani a yɛrɛ ka fɛn senumaw ani sanu minw bɛɛ tun bɛ Matigi ka nafolo mara yɔrɔ la ani masakɛ ka so kɔnɔ mara yɔrɔ la, ka olu bɛɛ ci Siri masakɛ Hazaɛl ma. O y'i mabɔ Jerusalɛm la.
[19] Joas ka ko tɔw ni a ka kɛwalew, olu bɛɛ sɛbɛnnen bɛ Juda bɔnsɔn ka masakɛw ka Tilew Kibaru Kitabu kɔnɔ.
[20] Joas ka baaradenw murutira a ma ka jɛ siri a kɔ kan ka masakɛ gosi Milo, Sila sira kan.
[21] Joas ka baaradenw, Simeat denkɛ Jozakar ni Somɛr denkɛ Jozabad y'a gosi, a sara. U y'a su don a bɛnbaw kɛrɛ fɛ Dawuda ka dugu kɔnɔ. A denkɛ Amazia sigira masaya la a nɔ na.