[1] Akab denkɛ cɛ biwolonwula tun bɛ Samari. Jehu ye sɛbɛnni kɛ ka o ci Samari kuntigiw ni dugu cɛkɔrɔbaw ani Akab denkɛw lamarabaaw ma Akab denkɛw ko la, k'a fɔ u ye ko:
[2] «Aw kuntigi denkɛw filɛ aw fɛ yen, wotorow ni sow bɛ aw bolo fana, ani kɛlɛkɛ minanw ni dugu barikama.
[3] Aw kuntigi denkɛ min ka ɲi, ni a ka fisa aw ɲɛ na, aw ka o sigi a fa ka masasigilan kan walisa ka kɛlɛ kɛ aw kuntigi ka so kosɔn.»
[4] O kuma ye u siran kosɛbɛ. O tuma la u ko: «Masakɛ fila ma se ka Jehu bali, an dun na se ka a bali cogo di?»
[5] Masakɛ ka so kunna sigibaa ni dugutigi ni cɛkɔrɔbaw ani denw lamarabaaw ye ci bila ka ta'a fɔ Jehu ye ko: «An ye i ka baaradenw ye, i mana fɛn o fɛn fɔ, an na o bɛɛ kɛ. An tɛ mɔgɔ si ɲɛnatɔmɔ k'a kɛ masakɛ ye. Min ka di i ye, i ka o kɛ.»
[6] Jehu ye sɛbɛn filanan ci u ma k'a fɔ o kɔnɔ ko: «Ni aw ye ne taw ye, ni aw b'a fɛ ka ne ka ciw mara, aw ka masakɛ denkɛw kunkolo tigɛ ka na n'u ye Jizreɛl yan sini ɲan tuma la.» O y'a sɔrɔ masakɛ denkɛ biwolonwula sigilen tun bɛ dugu kɔnɔ mɔgɔbaw cɛma, olu tun bɛ u kalan.
[7] U ye o sɛbɛn kalan tuma min na, o yɔrɔ nin bɛɛ u ye o masakɛ denkɛw cɛ biwolonwula minɛ ka u kunw tigɛ ka olu kunkolow kɛ segiw kɔnɔ ka u ci Jehu ma Jizreɛl.
[8] Ciden dɔ nana ka o kibaru fɔ a ye ko: «U nana ni masakɛ denkɛw kunkolow ye.» Jehu y'a jaabi ko: «A' ye u ton duguma ka kɛ sara fila ye dugu donda la fo sini sɔgɔma.»
[9] Sɔgɔma da fɛ Jehu bɔra, a y'a jɔ mɔgɔw bɛɛ ɲɛ kɔrɔ k'a fɔ ko: «Aw tilennen don. Aw y'a ye ko ne murutira ne kuntigi ma k'a faga, nka jɔn ye ninw bɛɛ faga?
[10] Aw k'a dɔn sisan ko Matigi tun ye kuma minw fɔ Akab kama, o si tɛ bi duguma. Matigi tun ye min fɔ a ka baaraden Eli da la, a ye o kɛ.»
[11] Jehu ye Akab ka so mɔgɔ tɔw fana faga Jizreɛl, a ka kuntigiw bɛɛ ni a ka du mɔgɔw ni a ka laadibaaw. A ma sɔn u si ka dan kɛ.
[12] O kɔ, Jehu wulila ka taa Samari. K'a to sira kan ka taa, a selen saga gɛnnaw ka ɲɔgɔn lajɛ dugu kɔnɔ,
[13] a ni Juda ka masakɛ Akazia balimaw bɛnna. A y'a fɔ olu ye ko: «Aw ye jɔn ni jɔn ye?» U y'a jaabi ko: «An ye Akazia balimaw ye. An bɛ taa masakɛ ni masamusoma denkɛw fo.»
[14] O tuma la Jehu ye ci fɔ ko: «A' ye u ɲɛnama minɛ.» U ye olu ɲɛnama minɛ ka u kunkolow tigɛ saga gɛnnaw ka ji dingɛ da la. Olu tun ye cɛ binaani ni fila ye. U si ma dan kɛ.
[15] Jehu bɔlen kɔ yen, a ni Rekab denkɛ Jonadab bɛnna. O tun bɛ a ɲɛ fɛ. Jehu y'a fɔ a ye ko: «Yala e dusukun jɛlen don ne ta fan fɛ i ko ne dusukun jɛlen don i ta fan fɛ cogo min na wa?» Jonadab y'a jaabi ko: «Ɔwɔ, a jɛlen don i ta fan fɛ.» Jehu ko: «O ɲɛna. Ni a jɛlen don ne ta fan fɛ, i bolo di ne ma.» Jonadab ye a bolo di a ma. Jehu y'a layɛlɛn a kɛrɛ fɛ a ka wotoro kɔnɔ,
[16] k'a fɔ a ye ko: «I ka na ne fɛ, i na ne ka jijali ye Matigi ye.» Jehu taara n'a ye a ka wotoro kɔnɔ.
[17] U selen kɔ Samari dugu kɔnɔ, Jehu ye Akab ka so mɔgɔ tɔw bɛɛ faga Samari. A ye o du mɔgɔw bɛɛ halaki ka u ban ka kɛɲɛ ni Matigi ka kuma fɔlen ye Eli da la.
[18] Jehu ye mɔgɔw bɛɛ lajɛ ka kuma u fɛ ko: «Akab ye baara kɛ Baal ye dɔɔnin, ne Jehu na baara kɛ a ye kosɛbɛ.
[19] Ayiwa sisan aw ka Baal ka kiraw ni a ka baaradenw ni a ka sarakalasebaaw bɛɛ lajɛ ne kɔrɔ yan. U si kana to kɔ, katuguni ne b'a fɛ ka sarakaba faga Baal ye. Ni mɔgɔ o mɔgɔ ma na, o na faga.» O bɛɛ n'a ta Jehu ye o kɛ ni keguya ye walisa a ka Baal ka baaradenw faga.
[20] O tuma la a ye ci di ko u ka seli don welewele da Baal tɔgɔ la. U ye seli don sigi
[21] ka cidenw bila ka taa Israɛl yɔrɔw bɛɛ la. Baal ka baaradenw bɛɛ taara, hali u kelen ma to kɔ. U donna Baal batoso kɔnɔ. U ye so fan bɛɛ fa.
[22] O tuma la Jehu y'a fɔ batoli kɛ fini marabaa ye ko: «I ka dulɔkiw di Baal ka baaradenw bɛɛ ma.» Batoli kɛ fini marabaa ye dulɔkiw don u bɛɛ kan na.
[23] Jehu ni Rekab denkɛ Jonadab donna Baal batoso kɔnɔ. A y'a fɔ Baal ka baaradenw ye ko: «Aw ka kɔlɔsili kɛ kosɛbɛ ko Matigi batobaa si kana sɔrɔ yan Baal ka baaradenw kɔ.»
[24] O tuma la u donna ka sarakaw ni saraka jenitaw bɔ. Jehu tun ye mɔgɔ bisegin bila kɛnɛma k'a fɔ olu ye ko: «Ne bɛ mɔgɔ minw don aw bolo, ni aw fɛn o fɛn y'a to u dɔ ka dan kɛ, o bilabaa na faga o tigi nɔ na.»
[25] Jehu tilalen kɔ saraka laseli la, a y'a fɔ garadiw ni masakɛ ka kuntigiw ye ko: «A' ye don ka u faga, aw kan'a to u si ka bɔ.» Olu ye u faga ni npan ye, garadiw ni kuntigiw ye u suw fili kɛnɛma, o kɔ, ka don ka taa fo Baal ka so ka se bon ɲɛ kɔnɔ la.
[26] U ye Baal ka so kɔnɔ boli samasenw bɔ yen ka u jeni.
[27] U ye Baal ja dɛsɛnen karikari ka Baal batoso fana ci ka o kɛ banakɔ taa yɔrɔ ye fo ka na se bi ma.
[28] Ayiwa Jehu ye Baal bato yɔrɔw bɛɛ ci ka bɔ Israɛl cɛma.
[29] O bɛɛ n'a ta Nebat denkɛ Jeroboam ye Israɛl bɔnsɔn bila jurumu minw na, a ma olu dabila. Sanu misiden minw tun bɛ Bɛtɛl ni Dan, a tora ka olu bato.
[30] Matigi y'a fɔ Jehu ye ko: «I ye ko ɲuman kɛ ne ɲɛ kɔrɔ, ne tun ye min fɔ i ye Akab ka so ko la, i ye o kɛ. O de kosɔn ne y'a latigɛ ko i bɔnsɔn na sigi Israɛl bɔnsɔn ka masasigilan kan fo ka taa se i bɔnsɔn yɛlɛma ko naaninan ma.»
[31] Nka Jehu ma tugu Matigi ka ci fɔlenw na ni a dusukun bɛɛ ye ka Matigi, Israɛl ka Ala ka sariya taama. Jeroboam ye Israɛl bila jurumu minw na, a ma olu dabila.
[32] Matigi y'a daminɛ ka dɔ bɔ Israɛl bɔnsɔn ka dugukolo la. Siri masakɛ Hazaɛl ye se sɔrɔ Israɛl bɔnsɔn kan ka u dancɛw minɛ.
[33] A ye Galad jamana bɛɛ minɛ ka bɔ Jurdɛn ba da la ka taa kɔrɔn fɛ ani saheli yanfan Aroɛr dugu min bɛ Arnɔn kɔ da la. O ye Galad jamana ni Basan jamana bɛɛ ye. O tun ye Gad siya ni Rubɛn siya ni Manase siya ta ye.
[34] Jehu ka ko tɔw ni a ka ko kɛlenw ani a ka kɛlɛ kow, olu bɛɛ sɛbɛnnen bɛ Israɛl bɔnsɔn ka masakɛw ka Tilew Kibaru Kitabu kɔnɔ.
[35] Jehu sunɔgɔra a bɛnbaw fɛ. A su donna Samari. A denkɛ Joakaz sigira masaya la a nɔ na.
[36] Jehu ye san mugan ni segin kɛ masaya la Israɛl bɔnsɔn kun na Samari.