[1] Israɛl bɔnsɔn ka masakɛ Ela denkɛ Ose ka masaya san sabanan la, Juda ka masakɛ Akaz denkɛ Ezekiasi ye masaya daminɛ.
[2] A si tun ye san mugan ni duuru ye a ka masaya daminɛ tuma la. A ye san mugan ni kɔnɔntɔn kɛ masaya la Jerusalɛm. A ba tɔgɔ ko Abi, Zakari denmuso tun don.
[3] Ale ye ko ɲuman kɛ Matigi ɲɛ kɔrɔ ka a bɛnbakɛ Dawuda ka siraw taama.
[4] A ye batoli kɛ yɔrɔw ci ka samasenw karikari ka Astarte boliw ci. Musa tun ye nsiranɛgɛ sa min dila, a ye o karikari katuguni fo ka taa se o don ma, Israɛl bonsɔn tun bɛ wusulan suma dumanw wusu o nsiranɛgɛ sa ye ka o sa wele ko Nehustan.
[5] Ezekiasi y'a jigi bɛɛ da Matigi, Israɛl bɔnsɔn ka Ala kan. Juda ka masakɛ minw sigira a ɲɛ ani a kɔ, a bɔɲɔgɔnko si ma sɔrɔ olu la.
[6] A tugura Matigi la, a ma jɛngɛ ka mabɔ a la. Matigi ye ci fɔlen minw di Musa ma, a ye olu mara.
[7] Matigi tora a fɛ a ka kɛtaw bɛɛ la. A murutira Asiri masakɛ ma, a ma sɔn ka kolo o ye.
[8] A ye Filisitikaw ka jamana tiɲɛn fo ka taa se Gaza ni a laminiw ma, k'a daminɛ kɔlɔsibaaw ka sankanso janw la fo ka se dugu barikamaw ma.
[9] Ezekiasi ka masaya san naaninan tun ye Israɛl bɔnsɔn ka masakɛ Ela denkɛ Ose ka masaya san wolonwulanan ye, Asiri masakɛ Salmanasar taara daga Samari da la.
[10] A y'a minɛ a san sabanan la. O kɛra Ezekiasi ka masaya san wɔɔrɔnan la ani Israɛl ka masakɛ Ose ka masaya san kɔnɔntɔnnan la. Samari minɛna o waati la.
[11] Asiri masakɛ taara ni Israɛl bɔnsɔn ye Asiri jamana la ka u sigi Kalak ni Gozan, Kabor ba da la ani Medi duguw kɔnɔ,
[12] katuguni u ma Matigi u ka Ala kan minɛ, nka u ye a ka layidu tiɲɛn. U ma a lamɛn. Matigi ye ci minw di a ka jɔnkɛ Musa ma, u ma o sira taama.
[13] Ezekiasi ka masaya san tan ni naaninan la, Asiri masakɛ Sankerib nana Juda bɔnsɔn ka dugu barikamaw bɛɛ kɛlɛ ka u minɛ.
[14] O tuma la Juda ka masakɛ Ezekiasi ye ci bila ka taa fɔ Asiri masakɛ ye Lakis ko: «Ne ye filili kɛ. I ka mabɔ ne la. Ni i ye fɛn o fɛn fɔ ne ye, ne na o kɛ.» Asiri masakɛ ye Juda ka masakɛ Ezekiasi ɲangi ni warijɛ talan kɛmɛ saba ani sanu talan bisaba ye.
[15] Ezekiasi ye Matigi ka so kɔnɔ warijɛ bɛɛ ni masaya so kɔnɔ nafolo mara yɔrɔ warijɛ bɛɛ di a ma.
[16] Sanu min tun bɛ Matigi ka so konw la, ani u kondon jiriw la, Ezekiasi ye olu bɛɛ wɔrɔn ka u di Asiri masakɛ ma.
[17] O tuma la Asiri masakɛ ye Tartan ni Rab-Saris ani Rabsake ni kɛlɛbolo barikamaw ci ka bɔ Lakis ka taa masakɛ Ezekiasi kama Jerusalɛm. U taara Jerusalɛm. U selen yen, u y'u jɔ sanfɛ dala bajalan kɛrɛ fɛ, o bɛ fini jɛya yɔrɔ sira da la.
[18] O kɔ, u ye masakɛ wele ka kuma a fɛ. Nka masakɛ ka sokɔlɔsibaa Hilkija denkɛ Eliakim ni sɛbɛnnikɛla Sebna ani tilew kibaru sɛbɛnnikɛla Asaf denkɛ Joak taara u kɔrɔ.
[19] Rabsake y'a fɔ u ye ko: «Ne b'a fɔ ko aw k'a fɔ Ezekiasi ye ko Asiri masakɛ, masakɛba b'a fɔ ko: ‹I jigi bɛ jɔn kan?›
[20] I ko: ‹Ni mɔgɔ b'a fɛ ka kɛlɛ kɛ, a ka kɛ cɛ barikama ni hakilitigi ye›, nka o ye fuu ye. E jigi dun bɛ jɔn kan fo i bɛ muruti ne ma?
[21] Ne y'a dɔn ko i jigi bɛ Misira jamana kan, i jigi dalen bɛ bɔkala ɲɔɲɔnen kan. Ni i bɛ i sinsin o la, o bɛ mɔgɔ bolo sɔgɔ k'a jogin. Mɔgɔ o mɔgɔ bɛ i jigi da Misira masakɛ Faraon kan, o bɛ ten.
[22] «Ni aw b'a fɔ ko aw jigi dalen bɛ Matigi, aw ka Ala kan, Ezekiasi ye min ka batoli kɛ yɔrɔw ni a ka saraka bɔlanw bɔ yen k'a fɔ Juda ni Jerusalɛm ye ko u ka batoli kɛ nin saraka bɔlan ɲɛ kɔrɔ Jerusalɛm, o tɛ Matigi ye wa?
[23] Ayiwa ne matigi, Asiri masakɛ ye min fɔ i ye, i ka sɔn o ma. Ni i bɛ so kan yɛlɛnbaaw sɔrɔ, ne bɛ so waa fila di i ma.
[24] Nka i bɛ se ka ne kuntigi ka jalasabatigi kelenpe gɛn cogo di? I bɛ i jigi da Misira jamana kan ko i na wotorow ni sotigiw sɔrɔ yen.
[25] O bɛɛ n'a ta ni Matigi sago tun tɛ, ne tun na se ka na nin tiɲɛnni kɛ cogo di? Matigi de y'a fɔ ne ye ko: ‹I ka taa nin jamana kama k'a tiɲɛn.›»
[26] Hilkija denkɛ Eliakim ni Sebna ani Joak y'a fɔ Rabsake ye ko: «I ka kuma i ka baaradenw fɛ Sirikaw ka kan na katuguni an bɛ o faamu. I kana kuma an fɛ Yahutu kan na nin kogo kunna mɔgɔw bɛɛ ɲɛ na.»
[27] Rabsake y'u jaabi ko: «Yala ne matigi ye ne ci ko ne ka kuma e ni e matigi dɔrɔn fɛ wa? E m'a dɔn ko mɔgɔ minw bɛ kogo kun na, ko olu ni aw na aw bo dun ka aw ɲɛgɛnɛji min ɲɔgɔn fɛ wa?»
[28] O kɔ, Rabsake y'i jɔ ka pɛrɛn Yahutu kan na ko: «Asiri masakɛ, masakɛba bɛ min fɔ, aw ka aw tulo majɔ o la.
[29] Masakɛ ko: ‹Aw kan'a to Ezekiasi ka aw lafili, katuguni a tɛna se ka aw tila ka bɔ ne bolo.
[30] Ezekiasi kana se ka aw yɛlɛma Matigi fan fɛ fewu k'a fɔ ko: «Matigi tɛna dɛsɛ ka an tila. Asiri masakɛ tɛna se sɔrɔ nin dugu kan.»
[31] Aw kana Ezekiasi lamɛn katuguni Asiri masakɛ ko: «Hɛrɛ ka don an cɛ, aw ka kɛ an fɛ, aw bɛɛ kelen-kelen ka aw ka rezɛnden dun ka aw ka toro mɔ dun ka aw ka kɔlɔnji min
[32] fo ne ka na aw minɛ ka taa ni aw ye aw ka jamana bɔɲɔgɔnko la. Sumankisɛ ni diwɛn jamana don, ani alikama ni rezɛn nakɔw ni olive nakɔw ani di jamana don. Aw na balo yen, aw tɛna sa.» Aw kana Ezekiasi lamɛn k'a masɔrɔ a bɛ aw lafili ko: «Matigi na aw tila.»
[33] Yala jamana wɛrɛw ka bato fɛnw ye u tila Asiri masakɛ la wa?
[34] Hamat ni Arpad bato fɛnw bɛ min? Sefarvayim ni Hena ani Iva bato fɛnw bɛ min? Olu sera ka Samari tila ka bɔ ne bolo wa?
[35] O jamana jumɛn ka bato fɛn sera ka u ka jamana tila ka bɔ ne bolo? Matigi na se ka Jerusalɛm tila ka bɔ ne bolo wa?›»
[36] Mɔgɔw bɛɛ y'u makun, u ma a jaabi hali kuma kelen na katuguni masakɛ tun ye ci di ko: «Aw kana jaabili si kɛ.»
[37] Hilkija denkɛ Eliakim masa sokɔlɔsibaa ani sɛbɛnnikɛla Sebna ani tilew kibaru sɛbɛnnikɛla Asaf denkɛ Joak seginna ka taa masakɛ Ezekiasi yɔrɔ la ni u ka finiw faralen ye ka Rabsake ka kuma bɛɛ lakali a ye.