[1] Remalia denkɛ Pekak ka masaya san tan ni wolonwulanan la, Juda ka masakɛ Jotam denkɛ Akaz ye masaya daminɛ.
[2] Akaz si tun ye san mugan ye a sigi tuma la masaya la. A ye san tan ni wɔɔrɔ kɛ masaya la Jerusalɛm. A ma ko ɲuman kɛ Matigi a ka Ala ɲɛ kɔrɔ i ko a bɛnba Dawuda y'a kɛ cogo min na.
[3] Nka a ye Israɛl bɔnsɔn ka masakɛw ka siraw taama, fo k'a denkɛ yɛrɛ jeni tasuma la. Matigi ye siya minw gɛn ka bɔ Israɛl bɔnsɔn ɲɛ, a ye olu ka ko haramulenw ɲɔgɔn kɛ.
[4] A ye sarakaw bɔ ka wusulan suma dumanw wusu batoli kɛ yɔrɔw la ani kuluw kan ani jirisun kɛnɛw jukɔrɔ.
[5] O tuma la Siri masakɛ Rezɛn ani Israɛl bɔnsɔn ka masakɛ Remalia denkɛ Pekak taara Jerusalɛm kama k'a kɛlɛ. U ye Akaz lamini nka u ma se sɔrɔ a kan.
[6] O waati yɛrɛ la Siri masakɛ Rezɛn taara Elat ka Yahutuw bɛɛ gɛn ka bɔ o dugu kɔnɔ. Edɔmkaw kɔseginna u ka yɔrɔ la Elat. U bɛ yen halibi.
[7] Masakɛ Akaz ye ɲɛmɔgɔ dɔw ci ka taa Asiri masakɛ Tiglat-Pilesɛr sɛgɛrɛ k'a fɔ o ye ko: «Ne ye i ka jɔn ani i denkɛ ye. I ka taa Sirikaw ni Israɛl bɔnsɔn kama ka ne tila ka bɔ u bolo.»
[8] Wari ni sanu minw tun bɛ Matigi ka so kɔnɔ ani masaya so kɔnɔ nafolo mara yɔrɔw la, Akaz ye olu bɛɛ ta ka olu ci Asiri masakɛ ma k'a kɛ bonyali fɛn ye.
[9] Asiri masakɛ ye Akaz sago kɛ. A taara Damasi kama k'a minɛ ka taa ni Damasikaw ye Kir ka Rezɛn faga yen.
[10] O tuma la masakɛ Akaz taara Damasi ka Asiri masakɛ Tiglat-Pilesɛr kunbɛn. Masakɛ Akaz ye saraka bɔlan dɔ ye Damasi, a ye o dila cogo ni a bisigi ci sarakalasebaa Uri ma, k'a cogoya bɛɛ fɔ a ye.
[11] Masakɛ Akaz ye cogoya min jira sarakalasebaa Uri la ka bɔ Damasi, a ye saraka bɔlan jɔ ka kɛɲɛ ni o cogo yɛrɛ de ye. Sarakalasebaa Uri tilara saraka bɔlan jɔli la sani masakɛ ka kɔsegin ka bɔ Damasi.
[12] Masakɛ kɔseginna ka bɔ Damasi tuma min na, a ye saraka bɔlan ye. A y'i madon ka gɛrɛ saraka bɔlan na.
[13] A y'a ka saraka jenitaw ni a ka mugu sarakaw jeni o kan. A y'a ka saraka bɔntaw ni joli ni diyaɲe nili fɛnw lase o kan.
[14] Nsiranɛgɛ saraka bɔlan min tun bɛ Matigi ɲɛ kɔrɔ, a y'o bɔ o yɔrɔ la k'a bila saraka bɔlan kura ni saheli cɛ walisa fɛn si kana kɛ o kura ni Matigi ka so cɛ.
[15] O kɔ, masakɛ Akaz y'a fɔ sarakalasebaa Uri ye ko: «I ka saraka jenita lase saraka bɔlanba kan sɔgɔma da fɛ ka mugu sarakaw lase a kan wula fɛ ka masakɛ ka saraka jenita ni a ka mugu sarakaw ni jamana kɔnɔ mɔgɔw ka saraka jenitaw ni u ka mugu sarakaw lase. I ka u ka saraka bɔntaw fana seri a kan ka saraka jenitaw joli bɔn a kan ani saraka baganw bɛɛ joli. Ne na nsiranɛgɛ saraka bɔlan kɛ ne ka ɲininkali yɔrɔ ye.»
[16] Masakɛ Akaz ye min fɔ sarakalasebaa Uri ye, a ye o bɛɛ kɛ.
[17] Ka fara o bɛɛ kan, masakɛ Akaz ye koli minan jusigilanw kari ka bɔ wotoro misɛnw kɔnɔ ka o minanw ta. A ye koli minanba ta ka bɔ nsiranɛgɛ misiw kan ka o sigi kabakurun banbe kan duguma.
[18] U tun ye gwa min jɔ Matigi ka so kɔnɔ ani masakɛ ka donda kɛnɛma lafiɲɛ don kama, a ye o yɛlɛma Asiri masakɛ kosɔn.
[19] Akaz ka ko tɔw ni a ka ko kɛlenw bɛɛ sɛbɛnnen bɛ Juda bɔnsɔn ka masakɛw ka Tilew Kibaru Kitabu kɔnɔ.
[20] Akaz sunɔgɔra a bɛnbaw fɛ. A su donna olu suw kɛrɛ fɛ Dawuda ka dugu kɔnɔ. A denkɛ Ezekiasi sigira masaya la a nɔ na.