[1] Ayiwa masakɛ ye Juda cɛkɔrɔbaw ni Jerusalɛm cɛkɔrɔbaw bɛɛ wele ka u lajɛ a kɔrɔ.
[2] O kɔ, masakɛ ni Juda cɛkɔrɔbaw bɛɛ ani Jerusalɛmkaw ani sarakalasebaaw ni kiraw ani mɔgɔw bɛɛ taara Matigi ka so kɔnɔ, mɔgɔ misɛn fara mɔgɔba kan. U ye layidu kitabu min sɔrɔ Ala ka so kɔnɔ, a ye o kalan u bɛɛ ɲɛ na.
[3] Masakɛ wulila ka i jɔ banbe kan ka layidu ta Matigi ye k'a latigɛ ko a na tugu Matigi nɔ fɛ ka a ka ci fɔlenw ani a ka ko latigɛlenw ni a ka sariyaw mara ni a dusukun bɛɛ ani a hakili bɛɛ ye, a ko a na o layidu ko sɛbɛnnenw bɛɛ kɛ. Mɔgɔw bɛɛ fana sɔnna ka o layidu ta.
[4] O tuma la masakɛ y'a fɔ sarakalasebaaw kuntigi Hilkija ni a dankan sarakalasebaaw ani dakɔlɔsibaaw ye ko minan minw bɛɛ dilara Baal ni Astarte ni sankolola dolow ye, u ka olu bɛɛ bɔ Matigi batosoba kɔnɔ. A ye olu jeni Jerusalɛm dugu kɔ fɛ Sedrɔn forow la ka taa ni olu bugurijɛ ye Bɛtɛl.
[5] Juda bɔnsɔn ka masakɛw tun ye boliw ka sarakalasebaa minw sigi walisa olu ka wusulan suma duman wusu batoli kɛ yɔrɔw la ani Juda bɔnsɔn ka duguw ni Jerusalɛm batoli kɛ yɔrɔw la, a ye olu bɛɛ gɛn ka bɔ yen ani Baal ka sarakalasebaaw ani tile ni kalo ani sankolola taamashyɛn jira dolow ni sankolola kɛnɛbɔlanw batobaaw bɛɛ, a ye olu fana gɛn.
[6] A ye Astarte boli ta ka bɔ Matigi ka so kɔnɔ ka taa n'a ye Jerusalɛm dugu kɔ fɛ Sedrɔn kɔ da la. A ye a jeni ka a kɛ bugurijɛ ye ka o mugu seri mɔgɔ gwansanw kaburuw kan.
[7] Jatɔyakɛlaw sigi yɔrɔ minw tun bɛ Matigi ka so kɔnɔ, Josiasi ye olu tiɲɛn. Musow tun bɛ finisow gese da Astarte boli ye o yɔrɔ la.
[8] O kɔ, Josiasi ye Juda bɔnsɔn ka sarakalasebaaw bɛɛ lajɛ k'a daminɛ Geba ka taa bila fo Beɛr-Seba, a ye u ka batoli kɛ yɔrɔw nɔgɔ. Batoli kɛ yɔrɔ minw tun bɛ dugutigi Josue ka donda kɛrɛ fɛ ani min tun bɛ numan fɛ dugu donda la, a ye olu ci.
[9] Yamaruya tun tɛ o batoli kɛ yɔrɔw sarakalasebaaw bolo ka saraka lase Matigi ka saraka bɔlan kan Jerusalɛm, nka u tun bɛ buuru fununbali dun u balimaw fɛ.
[10] Tofɛt min tun bɛ Hinom denkɛw ka jɛkɛnɛ la, Josiasi ye o fana tiɲɛn, walisa mɔgɔ si kana a denkɛ wala a denmuso jeni tasuma la Molɔk ye tun.
[11] Juda ka masakɛw tun ye yɛlɛnkan so minw bila tile ye Matigi ka so kɛrɛ fɛ, a ye olu faga masakɛ ka kuntigi Natan-Melɛk ka so kɛrɛ fɛ ka tile ka wotorow jeni ni tasuma ye.
[12] Juda bɔnsɔn ka masakɛw tun ye saraka bɔlan minw jɔ Akaz ka sankanso san fɛ, masakɛ Josiasi ye olu fana ci ani Manase tun ye saraka bɔlan minw jɔ Matigi ka dukɛnɛ fila la, a ye olu fana ci ka u bɛɛ karikari ka bɔ yen ka o buguri fili Sedrɔn kɔji la.
[13] Israɛl bɔnsɔn ka masakɛ Solomani tun ye batoli kɛ yɔrɔ minw jɔ Sidɔnkaw ka fɛn haramulen Astarte boli ni Moab bɔnsɔn ka bato fɛn Kemas ani Amɔn bɔnsɔn ka bato fɛn Milkom ye Jerusalɛm kuntilenna la halaki kulu kinin fɛ, masakɛ ye olu fana ci.
[14] A ye samasenw karikari ka Astarte bato fɛnw bɛɛ ci ka mɔgɔw kolow kɛ o yɔrɔ la.
[15] Ka fara o bɛɛ kan, Nebat denkɛ Jeroboam tun ye batoli kɛ yɔrɔ min jɔ Bɛtɛl ka Israɛl bɔnsɔn bila jurumu la, Josiasi ye o fana ci. A ye batoli kɛ yɔrɔw ni Astarte boli jeni fo ka u kɛ bugurijɛ ye.
[16] A ye yɔrɔ filɛ ka kaburuw ye kulu kan. A ye mɔgɔ ci ka taa o kaburuw kɔnɔ kolow cɛ ka olu jeni saraka bɔlan kan. A ye o saraka bɔlan fana ci ka kɛɲɛ ni Matigi ka kuma fɔlen ye a ka baaraden kira dɔ fɛ o kow la.
[17] O kɔ, masakɛ ye ɲininkali kɛ ko: «Nin ye mun hakilijigin samasen ye?» Dugu kɔnɔ mɔgɔw y'a jaabi ko: «Ala ka cɛ min nana ka bɔ Juda, o kaburu don. I ye nin min kɛ Bɛtɛl saraka bɔlan na, a ye o kow fɔ.»
[18] Masakɛ y'a fɔ ko: «A' ye a kolow to yen. Mɔgɔ si kana a bolo se u ma.» U ye ale ni Samari kira kolow to yen.
[19] Israɛl bɔnsɔn ka masakɛw tun ye batoli kɛ yɔrɔw ka so minw jɔ Samari duguw kɔnɔ ka Matigi dusu dimin ni olu ye, Josiasi ye olu bɛɛ tiɲɛn k'u kɛ i ko a ye Bɛtɛl ta kɛ cogo min na.
[20] Batoli kɛ yɔrɔ sarakalasebaa minw tun bɛ jamana kɔnɔ, a ye olu faga saraka bɔlanw kan ka mɔgɔ kolow jeni u kan. O kɔ, a seginna ka taa Jerusalɛm.
[21] O tuma la masakɛ Josiasi y'a fɔ mɔgɔw bɛɛ ye ko: «An ka Tɛmɛnkan seli don sigi Matigi aw ka Ala ye i ko a sɛbɛnnen bɛ nin layidu kitabu kɔnɔ cogo min na.»
[22] O bɔɲɔgɔnko Tɛmɛnkan seli tun ma kɛ kabini Israɛl bɔnsɔn ka kiritigɛlaw ka tilew la ani Israɛl bɔnsɔn ni Juda bɔnsɔn ka masakɛw ka tilew bɛɛ kɔnɔ, nin ɲɔgɔn seli tun ma kɛ fɔlɔ.
[23] Masakɛ Josiasi ka masaya san tan ni seginnan la, u ye o Tɛmɛnkan seli kɛ Matigi ye Jerusalɛm.
[24] Jinɛ kililaw ni filɛlikɛlaw ani terafim ni boliw ani fɛn haramulen minw bɛɛ yera Jerusalɛm ni Juda jamana la, Josiasi ye olu bɛɛ gɛn ka bɔ yen. Sarakalasebaa Hilkija ye kitabu min ye Matigi ka so kɔnɔ, a ye o sariya sɛbɛnnenw bɛɛ kɛ a cogo la.
[25] Masakɛ si tun tɛ Josiasi ɲɛ fɛ mɔgɔw la min y'a yɛrɛ di Matigi ma ka Matigi ka sira taama ni a dusukun bɛɛ ni a ni bɛɛ ani a barika bɛɛ ye ka Musa ka sariya taama i ko ale y'a kɛ cogo min na. A ɲɔgɔn ma sɔrɔ a ɲɛ fɛ masakɛw ni a kɔ fɛ masakɛw si la.
[26] O bɛɛ n'a ta, Matigi ma a ka dimiya dabila Juda bɔnsɔn ta fan fɛ Manase ka ko jugu kɛlenw kosɔn.
[27] O de y'a to Matigi y'a fɔ ko: «Ne na Juda bɔnsɔn fili ka mabɔ ne la i ko ne ye Israɛl bɔnsɔn fili cogo min na. Ne tun ye nin dugu Jerusalɛm min ɲɛnatɔmɔ, ani ne tun y'a fɔ so min ko la ko ne tɔgɔ na kɛ yen, ne na o fili.»
[28] Josiasi ka ko tɔw ani a ka ko kɛlenw, olu bɛɛ sɛbɛnnen bɛ Juda bɔnsɔn ka masakɛw ka Tilew Kibaru Kitabu kɔnɔ.
[29] Ka Josiasi to masaya la, Misira masakɛ Faraon Neko wulila Asiri masakɛ kama ko a bɛ taa a kɛlɛ Ufrate ba fan fɛ. Josiasi taara Misira masakɛ kɛlɛ. Faraon y'a ye tuma min na, o y'a faga Megido.
[30] A ka baaradenw y'a su ta wotoro kɔnɔ ka bɔ Megido ka taa fo Jerusalɛm k'a su don a ka kaburu kɔnɔ. Jamana kɔnɔ mɔgɔw ye Josiasi denkɛ Joakaz ɲɛnatɔmɔ k'a mun k'a sigi masaya la a fa nɔ na.
[31] Joakaz si tun ye san mugan ni saba ye a sigi tuma la masaya la. Ale ye kalo saba kɛ masaya la Jerusalɛm. A ba tɔgɔ ko Hamutal, Jeremi denmuso tun don ka bɔ Libina.
[32] A ye ko jugu kɛ Matigi ɲɛ kɔrɔ, a ye a bɛnbaw ka siraw taama.
[33] Masakɛ Faraon Neko y'a siri k'a bila kaso la Ribla, Hamat jamana la walisa a kana masaya kɛ Jerusalɛm. O bɛɛ kɔ, Faraon ye ɲangili wari bila jamana kan, o kɛra warijɛ talan kɛmɛ ani sanu talan kelen ye.
[34] O kɔ, masakɛ Faraon Neko ye Josiasi denkɛ Eliakim sigi k'a kɛ masakɛ ye a fa Josiasi nɔ na ka a tɔgɔ yɛlɛma k'a kɛ Jojakim ye. Nka a ye Joakaz minɛ k'a kɛ jɔn ye Misira jamana la. A sara yen.
[35] Faraon tun ye warijɛ ni sanu min ko fɔ, Jojakim ye o di a ma, nka walisa a ka Faraon ka wari fɔlen sara, a ye wari minɛ mɔgɔw bolo diyagoya la ka kɛɲɛ ni a ka fɔlenw ye mɔgɔw bɛɛ kelen-kelen ye. O kɔ, a ye olu di Faraon Neko ma.
[36] Jojakim si tun ye san mugan ni duuru ye a sigi tuma la masaya la. A ye san tan ni kelen kɛ masaya la Jerusalɛm. A ba tɔgɔ ko Zebuda, Pedaja denmuso tun don ka bɔ Ruma.
[37] A ye ko jugu kɛ Matigi ɲɛ kɔrɔ ka a bɛnbaw ka siraw bɛɛ taama.