[1] Kira Elise ye kiraw denkɛ dɔ wele k'a fɔ o ye ko: «I cɛ siri ka nin tulu minannin ta ka taa Ramɔt, Galad jamana la.
[2] Ni i sera yen, i ka Nimsi denkɛ Josafat denkɛ Jehu yɔrɔ ɲini ka don a ka so k'a wele ka bɔ a balimaw cɛma ka taa n'a ye kɛrɛ fɛ bon dɔ kɔnɔ.
[3] O tuma la, i ka tulu minannin ta ka o tulu yɛlɛma a kun na k'a fɔ ko Matigi ko, a ye i mun ka kɛ Israɛl bɔnsɔn ka masakɛ ye. O kɔ, i ka da yɛlɛ ka boli o yɔrɔ nin bɛɛ.»
[4] Ayiwa kira ka baaraden kamalen taara Ramɔt, Galad jamana la.
[5] A selen yen, a y'a sɔrɔ ko kɛlɛbolo kuntigiw tun bɛ ɲɔgɔn ye la. A y'a fɔ Jehu ye ko: «Kuntigi, ne b'a fɛ ka kuma i fɛ.» Jehu y'a jaabi ko: «I b'a fɛ ka kuma an la jumɛn fɛ?» Kamalen y'a jaabi ko: «E ko don, kuntigi.»
[6] O tuma la Jehu wulila ka don bon ɲɛ kɔnɔ la. O kamalen ye tulu yɛlɛma a kun na k'a fɔ a ye ko: «Matigi, Israɛl bɔnsɔn ka Ala ko: ‹Ne ye i mun ka i kɛ Matigi ka jama, Israɛl bɔnsɔn ka masakɛ ye.
[7] I na kuntigi Akab ka so mɔgɔw faga. O cogo la Jezabɛl ye ne ka kiraw ni Matigi ka baaraden minw faga, ne na olu joli hakɛw bɔ a la.
[8] Akab ka so bɛɛ na halaki. Ne na Akab ka soden cɛmaw bɛɛ ban Israɛl la, jɔn fara hɔrɔn kan.
[9] Ne na Akab ka so kɛ i ko Nebat denkɛ Jeroboam ka so ani Akija denkɛ Baesa ka so.
[10] Wuluw na Jezabɛl sogo dun Jizreɛl foro la. Mɔgɔ si tɛna a su don.›» O kɔ, o kamalen ye da yɛlɛ ka boli ka taa.
[11] O tuma la Jehu bɔra ka taa a kuntigi ka baaradenw yɔrɔ la, olu y'a ɲininka ko: «Hɛrɛ tun don wa? Mun kosɔn o mɔgɔ kunntan tun nana i sɛgɛrɛ?» A y'u jaabi ko: «Aw bɛ o cɛ ni a ka kuma dɔn kosɛbɛ.»
[12] Nka u ko: «Ayi dɛrɛ! I kana foyi dogo an na.» O tuma la Jehu y'a fɔ u ye ko: «O kamalen ye nin ni nin fɔ ne ye, k'a fɔ ne ye ko Matigi ko a ye ne mun ka kɛ Israɛl bɔnsɔn ka masakɛ ye.»
[13] O yɔrɔ nin bɛɛ, u bɛɛ kelen-kelen ye u ka dulɔki bɔ ka olu bila Jehu sen kɔrɔ so senda yɔrɔ kan, a yɛlɛnna ka jɔ u kan. O kɔ, u ye buru fyɛ ka pɛrɛn ko: «Jehu kɛra masakɛ ye.»
[14] Ayiwa Nimsi denkɛ Josafat denkɛ Jehu ye Joram kɛlɛ. O tuma la Joram ni Israɛl bɔnsɔn bɛɛ tun bɛ Ramɔt kɔlɔsi Galad jamana la Siri masakɛ Hazaɛl kama,
[15] nka masakɛ Joram tun taara Jizreɛl ka a jogindaw fura kɛ, u tun taara Siri masakɛ kɛlɛ waati min na, a joginna o waati la. Jehu ko: «Ni aw bɛ sɔn, mɔgɔ si kana bɔ dugu kɔnɔ ka taa o kibaru fɔ Jizreɛl.»
[16] Nka Jehu yɛrɛ donna a ka wotoro kɔnɔ ka taa Jizreɛl, Joram bananen tun bɛ yen. Juda ka masakɛ Akazia fana tun taara bɔ Joram ye.
[17] Kɔlɔsilikɛla min tun bɛ Jizreɛl dugu kogo san fɛ, o ye Jehu ka kɛlɛbolo natɔ ye minkɛ, o pɛrɛnna ko: «Ne ɲɛ bɛ kɛlɛbolo natɔ la.» O yɔrɔ nin bɛɛ, Joram ko: «Aw ka sotigi dɔ ci ka taa u kunbɛn ka u ɲininka ko: ‹Hɛrɛ don wa?›»
[18] O tuma la sotigi taara Jehu kunbɛn k'a fɔ a ye ko: «Masakɛ ko: ‹Hɛrɛ don wa?›» Jehu y'a jaabi ko: «Hɛrɛ bɛ mun ɲɛ i ye? I ka tɛmɛn ne kɔ fɛ.» Kɔlɔsilikɛla y'a fɔ ko: «Ciden sera o cɛw yɔrɔ la, nka a ma kɔsegin.»
[19] U ye sotigi wɛrɛ ci tun. O sera u yɔrɔ la k'a fɔ ko masakɛ ko: «Hɛrɛ don wa?» Jehu ko: «Hɛrɛ bɛ mun ɲɛ i ye? I ka tɛmɛn ne kɔ fɛ.»
[20] Kɔlɔsilikɛla y'a fɔ ko kura ko: «Ciden sera u yɔrɔ la, nka a ma kɔsegin. Kuntigi min bɛ na, o ka wotoro boli cogo bɔlen bɛ Nimsi denkɛ Jehu ka wotoro boli cogo fɛ, k'a masɔrɔ a bɛ boli i ko fatɔ.»
[21] O tuma la Joram ko: «Aw ka ne ka wotoro siri.» U y'a ka wotoro siri. O kɔ, Israɛl ka masakɛ ni Juda ka masakɛ Akazia bɔra dugu kɔnɔ, u bɛɛ ni u ka wotoro tun don, u taara Jehu kunbɛn. U bɛnna Nabot ka foro la Jizreɛl.
[22] Joram ye Jehu ye tuma min na, a y'a fɔ a ye ko: «Jehu, hɛrɛ don wa?» Nka Jehu y'a jaabi ko: «Hɛrɛ ko bɛ se ka fɔ, k'a sɔrɔ e ba Jezabɛl ka kakalaya ni a ka subaaya kow bɛ yen wa?»
[23] O tuma la Joram y'i kɔ munu ka boli k'a fɔ Akazia ye ko: «Akazia, janfa kɛra an na.»
[24] Jehu ye a ka kala sama ni a barika bɛɛ ye ka Joram bon a kaman fila cɛ, biɲɛ ye a sɔnkun cɛci. Joram bira a ka wotoro kɔnɔ.
[25] O kɔ, Jehu y'a fɔ a fɛ kɛlɛkɛ cɛ Bidikar ye ko: «I ka nin ta ka taa a fili Nabot ka foro la Jizreɛl. I hakili jigin a la, ko ka ne ni i to so boli la ɲɔgɔn fɛ a fa Akab nɔ fɛ, Matigi ye nin kiraya kuma fɔ a ko la ko:
[26] ‹Ne ye Nabot ni a denkɛw joli ye kunun.› Matigi y'a fɔ fana ko: ‹Ne na o ɲɔgɔn kɛ i yɛrɛ la nin foro la.› O de kosɔn i k'a ta k'a fili foro kɔnɔ ka kɛɲɛ ni Matigi ka kuma fɔlen ye.»
[27] Juda ka masakɛ Akazia ye o ye tuma min na, a bolila ka taa nakɔ la sira fɛ, Jehu tugura a kɔ, a ko: «Aw ka o fana gosi wotoro kɔnɔ.» U y'a gosi Gur kulu yɔrɔ Jibleam kɛrɛ fɛ. A bolila ka taa Megido, a sara yen.
[28] A ka baaradenw taara n'a ye wotoro kɔnɔ Jerusalɛm k'a su don a bɛnbaw suw kɛrɛ fɛ a ka kaburu kɔnɔ Dawuda ka dugu kɔnɔ.
[29] Akazia tun kɛra Juda bɔnsɔn ka masakɛ ye Akab denkɛ Joram ka masaya san tan ni kelennan la.
[30] O kɔ, Jehu taara Jizreɛl. Jezabɛl ye o mɛn. A ye kale da a ɲɛ la k'a kunsigi labɛn ka filɛli kɛ a ka finɛtiri fɛ.
[31] Jehu sera dugu donda la tuma min na, Jezabɛl y'a fɔ Jehu ye ko: «Hɛrɛ bɛ wa, Zimri, e min ye i kuntigi faga?»
[32] Jehu y'a ɲɛ jɔ finɛtiri la k'a fɔ ko: «Aw minw bɛ san fɛ yen, aw ye ne ɲin ye wa?» O tuma la du kɔnɔ baaraden fila wala saba ye u jɛngɛ ka Jehu filɛ finɛtiri fɛ.
[33] A pɛrɛnna k'a fɔ olu ye ko: «Jezabɛl fili duguma.» U y'a fili duguma. A joli seriserila kogo ni yɛlɛnkan sow kan. Jehu y'a cɔngɔ a sen kɔrɔ.
[34] Jehu donna so kɔnɔ ka dumuni kɛ ka minni kɛ. O kɔ, a ko: «A' ye taa nin muso dangalen filɛ k'a su don, sabu masakɛ denmuso don.»
[35] O tuma la baaradenw taara ko u b'a su don nka u ma foyi ye ni a kunkolo ni a sentɛgɛw ni a tɛgɛfuraw tɛ.
[36] U kɔseginna ka o fɔ Jehu ye. A ko: «O ye Matigi ka kuma fɔlen ye a ka jɔnkɛ Tisibite Eli da la. A ko wuluw na Jezabɛl sogo dun Jizreɛl kungo kɔnɔ.
[37] Ko Jezabɛl su na kɛ Jizreɛl forola nɔgɔ ye walisa a kana fɔ ko: ‹Jezabɛl filɛ nin ye.›»