[1] Israɛl bɔnsɔn ka masakɛ Jeroboam ka masaya san mugan ni wolonwulanan la, Juda ka masakɛ Amazia denkɛ Azaria sigira masaya la.
[2] Ale si tun ye san tan ni wɔɔrɔ ye a sigi tuma la masaya la. A ye san biduuru ni fila kɛ masaya la Jerusalɛm. A ba tɔgɔ ko Jekolia, o tun bɛ Jerusalɛm.
[3] Azaria ye ko ɲuman kɛ Matigi ɲɛ kɔrɔ. A tugura a fa Amazia ka ɲɛjirali la.
[4] Nka a ma batoli kɛ yɔrɔw ci, mɔgɔw tora ka sarakaw faga ka wusulan suma dumanw wusu o batoli kɛ yɔrɔw la.
[5] Matigi ye kuna bila masakɛ la fo ka taa se a sa don ma, fo a tun bɛ a dan na kɛrɛ fɛ yɔrɔ dɔ la. A denkɛ Jotam tun ye a ka so kɔnɔ baarakɛlaw kuntigi ye. O tun bɛ mɔgɔw ka kiri tigɛ.
[6] Azaria ka ko tɔw ni a ka kɛwalew bɛɛ sɛbɛnnen bɛ Juda ka masakɛw ka Tilew Kibaru Kitabu kɔnɔ.
[7] Azaria sunɔgɔra a bɛnbaw fɛ, a su donna olu suw kɛrɛ fɛ Dawuda ka dugu kɔnɔ. A denkɛ Jotam sigira masaya la a nɔ na.
[8] Juda ka masakɛ Azaria ka masaya san bisaba ni seginnan la, Jeroboam denkɛ Zakari kɛra Israɛl bɔnsɔn ka masakɛ ye Samari. Ale ye kalo wɔɔrɔ kɛ masaya la.
[9] A ye ko jugu kɛ Matigi ɲɛ kɔrɔ i ko a bɛnbaw y'a kɛ cogo min na. A ma Nebat denkɛ Jeroboam ka ko jugu si dabila, o min ye Israɛl bɔnsɔn bila jurumu la.
[10] Jabɛs denkɛ Salum wulila a kama k'a gosi mɔgɔw bɛɛ ɲɛ na k'a faga. O kɔ, o kɛra masakɛ ye a nɔ na.
[11] Zakari ka ko tɔw sɛbɛnnen bɛ Israɛl bɔnsɔn ka masakɛw ka Tilew Kibaru Kitabu kɔnɔ.
[12] O kɛra ka kɛɲɛ ni Matigi ka kuma fɔlen ye masakɛ Jehu ye ko: «I bɔnsɔn na sigi Israɛl bɔnsɔn ka masasigilan kan fo ka taa se i bɔnsɔn yɛlɛma ko naaninan ma.» A kɛra ten.
[13] Juda ka masakɛ Oziasi ka masaya san bisaba ni kɔnɔntɔnnan la, Jabɛs denkɛ Salum sigira masaya la Israɛl bɔnsɔn kun na. Ale ye kalo kelen kɛ masaya la Samari.
[14] Gadi denkɛ Menahem bɔra Tirza ka taa Samari ka Jabɛs denkɛ Salum gosi k'a faga Samari k'a kɛ masakɛ ye a nɔ na.
[15] Salum ka ko tɔw ni a ka jɛ siri ko bɛɛ sɛbɛnnen bɛ Israɛl bɔnsɔn ka masakɛw ka Tilew Kibaru Kitabu kɔnɔ.
[16] O kɔ, Menahem ye Tifisak dugu ci ka a kɔnɔ mɔgɔw bɛɛ faga ka a jamana tiɲɛn ka taa se fo Tirsa, k'a masɔrɔ o dugu ma da yɛlɛ a ye. A ye Tifisakkaw gosi ka o dugu kɔnɔ muso kɔnɔmaw bɛɛ kɔnɔ fara.
[17] Juda ka masakɛ Azaria ka masaya san bisaba ni kɔnɔntɔnnan la, Gadi denkɛ Menahem kɛra Israɛl bɔnsɔn ka masakɛ ye. Ale ye san tan kɛ masaya la Samari.
[18] A ye ko jugu kɛ Matigi ɲɛ kɔrɔ. A ye Nebat denkɛ Jeroboam ka ko jugu ɲɔgɔn kɛ a si bɛɛ la, o min ye Israɛl bɔnsɔn bila jurumu la.
[19] Asiri masakɛ Pul nana Israɛl bɔnsɔn kama. Menahem ye warijɛ talan waa kelen di a ma walisa a k'a dɛmɛ k'a ka masaya sabati.
[20] Israɛl bɔnsɔn ka masakɛ Menahem ye faama wari minɛ nafolotigiw bolo ka o di Asiri masakɛ ma. O fɛntigiw bɛɛ ye warijɛ sikle biduuru bɔ. O kɔ, Asiri masakɛ kɔseginna ka taa, a ma mɛn jamana kɔnɔ tun.
[21] Menahem ka ko tɔw ani a ka ko kɛlenw bɛɛ sɛbɛnnen bɛ Israɛl bɔnsɔn ka masakɛw ka Tilew Kibaru Kitabu kɔnɔ.
[22] Menahem sunɔgɔra a bɛnbaw fɛ. A denkɛ Pekakia sigira masaya la a nɔ na.
[23] Juda ka masakɛ Azaria ka masaya san biduurunan la, Menahem denkɛ Pekakia kɛra Israɛl bɔnsɔn ka masakɛ ye Samari. Ale ye san fila kɛ masaya la.
[24] A ye ko jugu kɛ Matigi ɲɛ kɔrɔ. Nebat denkɛ Jeroboam ye Israɛl bɔnsɔn bila jurumu minw na, Pekakia ma olu dabila.
[25] Pekakia ka jalatigiba dɔ, Remalia denkɛ Pekak wulila a kama ka ale ni Argob ni Arie gosi ka u faga a ka masaya so kɔnɔ Samari. Pekak ni Galadkaw cɛ biduuru tun don. A ye Pekakia faga ka i sigi a nɔ na.
[26] Pekakia ka ko tɔw ni a ka ko kɛlenw bɛɛ sɛbɛnnen bɛ Israɛl bɔnsɔn ka masakɛw ka Tilew Kibaru Kitabu kɔnɔ.
[27] Juda ka masakɛ Azaria ka masaya san biduuru ni filanan la, Remalia denkɛ Pekak kɛra Israɛl ka masakɛ ye Samari. Ale ye san mugan kɛ masaya la.
[28] A ye ko jugu kɛ Matigi ɲɛ kɔrɔ ka Nebat denkɛ Jeroboam ka siraw taama, o min ye Israɛl bɔnsɔn bila jurumu la.
[29] Israɛl ka masakɛ Pekak ka masaya waati la, Asiri masakɛ Tiglat-Pilesɛr wulila Israɛl bɔnsɔn kama ka Ijɔn ni Abɛl-Bɛt-Maka ni Janoak ni Kedɛs ani Hazor minɛ Galad ni Galile ani Nefitali jamanaw kɔnɔ. O kɔ, ka o mɔgɔw cɛ ka taa ni u ye Asiri jamana la.
[30] Ela denkɛ Ose wulila Remalia denkɛ Pekak kama k'a gosi k'a faga ka kɛ masakɛ ye a nɔ na. O kɛra Oziasi denkɛ Jotam ka masaya san mugannan la.
[31] Pekak ka ko tɔw ni a ka ko kɛlenw bɛɛ sɛbɛnnen bɛ Israɛl bɔnsɔn ka masakɛw ka Tilew Kibaru Kitabu kɔnɔ.
[32] Israɛl ka masakɛ Remalia denkɛ Pekak ka masaya san filanan la, Juda ka masakɛ Oziasi denkɛ Jotam ye masaya daminɛ.
[33] Ale si tun ye san mugan ni duuru ye a sigi tuma la masaya la. A ye san tan ni wɔɔrɔ kɛ masaya la Jerusalɛm. A ba tɔgɔ ko Jerusa, Zadɔk denmuso tun don.
[34] Jotam ye ko ɲuman kɛ Matigi ɲɛ kɔrɔ. A ye a fa Oziasi ka siraw taama.
[35] Nka a ma batoli kɛ yɔrɔw bɔ yen. Mɔgɔw tora ka sarakaw faga ka wusulan suma dumanw wusu o batoli kɛ yɔrɔw la. Jotam ye Matigi batosoba da dila.
[36] Jotam ka ko tɔw ani a ka ko kɛlenw bɛɛ sɛbɛnnen bɛ Juda ka masakɛw ka Tilew Kibaru Kitabu kɔnɔ.
[37] O waati la, Matigi y'a daminɛ ka Siri masakɛ Rezɛn ni Israɛl bɔnsɔn ka masakɛ Remalia denkɛ Pekak lawuli Juda kama.
[38] Jotam sunɔgɔra a bɛnbaw fɛ, a su donna olu suw kɛrɛ fɛ a bɛnba Dawuda ka dugu kɔnɔ. A denkɛ Akaz sigira masaya la a nɔ na.