[1] Ayiwa, Sirikaw ka kɛlɛbolo kuntigi Naaman tun ye mɔgɔba ye masakɛ ka du kɔnɔ. A ko tun ka di a makɛ ye katuguni Matigi ye se di Siri ma ale bolo. Cɛ farinma ja gɛlɛn tun don, nka kuna tun b'a la.
[2] Waati dɔ la, Sirikaw taara kɛlɛ la. U ye denni dɔ minɛ Israɛl bɔnsɔn ka jamana la, o kɛra Naaman muso ka baarakɛla ye.
[3] Don dɔ la o y'a fɔ a mamuso ye ko: «Ni ne matigi tun bɛ Samari kira yɔrɔ la, o tun na a ka kuna kɛnɛya.»
[4] Naaman taara o kibaru fɔ a kuntigi ye ko: «Israɛl bɔnsɔn denmuso ye nin ni nin fɔ.»
[5] Siri masakɛ y'a jaabi ko: «Ayiwa, i ka taa Samari. Ne na sɛbɛn ci Israɛl ka masakɛ ma.» O tuma la Naaman taara ni warijɛ waa bisaba ni sanu waa wɔɔrɔ ye a bolo ani dulɔki tan.
[6] Naaman taara ni o sɛbɛn ye ka o di Israɛl ka masakɛ ma. O sɛbɛn ko: «Ni i ye nin sɛbɛn sɔrɔ, i k'a dɔn ko ne ye ne ka baaraden Naaman ci i ma walisa i ka a ka kuna kɛnɛya.»
[7] Israɛl ka masakɛ ye o sɛbɛn kalan tuma min na, o yɔrɔ nin bɛɛ a y'a ka finiw fara k'a fɔ ko: «Yala ne ye Ala ye ka mɔgɔ faga wala ka mɔgɔ ɲɛnamaya wa fo Siri masakɛ ye nin cɛ ci ne ma ko ne ka a ka kuna kɛnɛya? A y'a filɛ, a bɛ ne la ɲini ka ne kɛlɛ.»
[8] Ala ka cɛ Elise y'a mɛn ko Israɛl bɔnsɔn ka masakɛ y'a ka finiw fara tuma min na, a ye ci bila k'a fɔ masakɛ ye ko: «Mun kosɔn i ye i ka finiw fara? I ka Naaman bila ka na ne fɛ yan, a n'a dɔn ko kira bɛ Israɛl la.»
[9] O tuma la Naaman ni a ka sow ni a ka wotorow sera Elise ka so da la ka u jɔ.
[10] Elise ye ciden bila ka taa a fɔ Naaman ye ko: «I ka taa i ko Jurdɛn baji la siɲɛ wolonwula. I fari na kɛnɛya, i na saniya.»
[11] Nka Naaman diminnen y'a kɔ don ka taa k'a fɔ ko: «Ne tun bɛ miiri ko kira yɛrɛ na bɔ ka ne kunbɛn ka i jɔ ne kɔrɔ ka Matigi a ka Ala deli ka a bolo finifana bana yɔrɔ kun na ka ne ka kuna kɛnɛya.
[12] Damasi bajiw Abana ni Parpar, olu man fisa ni Israɛl ji bɛɛ ye wa? Ne tɛ se ka ne ko olu la ka jɛya wa?» A diminnenba y'i kɔ don ka taa.
[13] A ka baaradenw gɛrɛla a la k'a fɔ a ye ko: «Ne fa, ni kira tun ye fɛn wɛrɛ fɔ i ye min ka gɛlɛn ka tɛmɛn nin kan, i tun tɛna o kɛ wa? Janko ni a ko i ka taa i ko, i na saniya.»
[14] O tuma la a taara Jurdɛn ba la ka i tunun ji jukɔrɔ siɲɛ wolonwula ka kɛɲɛ ni Ala ka cɛ ka kuma fɔlen ye. A farisogo kɛra i ko denmisɛn farisogo, a kɛnɛyara.
[15] O yɔrɔ nin bɛɛ, a ni a nɔ fɛ mɔgɔw bɛɛ seginna Ala ka cɛ yɔrɔ la. A selen yen, a y'i jɔ Elise ɲɛ kɔrɔ k'a fɔ a ye ko: «Ne y'a dɔn sisan ko Ala wɛrɛ si tɛ dugukolo yɔrɔ si la ni Israɛl ka Ala tɛ. Ayiwa sisan i ka bonya fɛnw minɛ i ka baaraden bolo.»
[16] Nka Elise y'a jaabi ko: «Matigi ɲɛnama tɔgɔ kosɔn, ne bɛ baara kɛ o min ye, ne tɛna foyi minɛ i bolo.» Naaman ye Elise karaba ko a ka o fɛnw minɛ, nka a ma sɔn.
[17] O tuma la Naaman ko: «Ne bɛ i deli ko i ka faliba doni fila bogo mugu di ne, i ka baaraden ma. Kabini sisan ne t'a fɛ ka saraka jenitaw ni saraka kɔrɔtataw bɔ bato fɛn wɛrɛ si ye ni Israɛl ka Matigi tɛ.
[18] O bɛɛ n'a ta, ni ne kuntigi bɛ don Rimon ka so kɔnɔ tuma o tuma ka batoli kɛ ka a sinsinnen to ne bolo la, ni ne ye ne biri Rimon ka so kɔnɔ, Matigi ka o yafa a ka jɔnkɛ ma.»
[19] Elise y'a jaabi ko: «Taa hɛrɛ la.» Naaman bɔra Elise kɔrɔ ka janfa tuma min na,
[20] Ala ka cɛ Elise ka baaraden Gehazi y'a fɔ a yɛrɛ kɔnɔ ko: «A filɛ, ne makɛ ma sɔn ka Siri Naaman bolo fɛn si minɛ. Matigi ɲɛnama tɔgɔ kosɔn, ne na boli a nɔ fɛ ka fɛn dɔ minɛ a fɛ.»
[21] O tuma la Gehazi bolila Naaman nɔ fɛ. Naaman y'a ye ko Gehazi bɛ boli a kɔ minkɛ, a jiginna ka bɔ a ka wotoro kɔnɔ k'a kunbɛn k'a ɲininka ko: «Hɛrɛ don wa?»
[22] Gehazi y'a jaabi ko: «Hɛrɛ don. Ne matigi ye ne ci k'a fɔ i ye ko kiraw denkɛ fila nana ka bɔ Efrayim kulu jamana la sisan. Ko a bɛ i deli ko i ka warijɛ waa saba ani dulɔki fila di u ma.»
[23] Naaman ko: «I ka sɔn ka warijɛ waa wɔɔrɔ minɛ.» A y'a karaba ka o wari bila bɔrɛ fila kɔnɔ ani dulɔki fila, ka olu di a ka baaraden fila ma ka taa Gehazi fɛ.
[24] U selen kulu kan, Gehazi ye o fɛnw minɛ olu bolo ka u bila so kɔnɔ ka o cɛw bila ka taa.
[25] O tuma la Gehazi taara a makɛ Elise yɔrɔ la. O y'a fɔ a ye ko: «I bɔra min, Gehazi?» A y'o jaabi ko: «I ka baaraden tun ma taa yɔrɔ si.»
[26] Nka Elise ko: «O cɛ bɔra a ka wotoro kɔnɔ ka i kunbɛn tuma min na, ne ni tun bɛ yen. Nin ye warijɛ minɛ waati ye wa, nin ye finiw ni olive nakɔtuw ni rezɛn nakɔtuw ni sagaw ni misiw ni baarakɛ cɛw ni baaraden musow minɛ waati ye wa?
[27] O de kosɔn Naaman ka kuna na nɔrɔ e ni i bɔnsɔn na badaa.» Gehazi taara ka bɔ Elise kɔrɔ. Kuna y'a minɛ k'a fari jɛya i ko neje.