[1] Akab denkɛ Joram kɛra Israɛl bɔnsɔn ka masakɛ ye Samari, Juda ka masakɛ Josafat ka masaya san tan ni seginnan la. Joram ye san tan ni fila kɛ masaya la.
[2] A ye ko jugu kɛ Matigi ɲɛ kɔrɔ, nka a ka juguya ma a fa ni a ba ta bɔ katuguni a fa tun ye Baal bato fɛn minw dila, a ye olu ci.
[3] O bɛɛ n'a ta a ye Nebat denkɛ Jeroboam ka jurumu ɲɔgɔn kɛ, o min ye Israɛl bɔnsɔn bila jurumu la. A ma sɔn ka fara o la.
[4] Sagakuluba tun bɛ Moab bɔnsɔn ka masakɛ Mesa fɛ. Ale ye saga waa kɛmɛ ani sagajigi waa kɛmɛ ani u si di Israɛl bɔnsɔn ka masakɛ ma nisɔngɔ ye,
[5] nka Akab salen kɔ, Moab bɔnsɔn ka masakɛ murutira Israɛl bɔnsɔn ka masakɛ ma.
[6] O tuma la, masakɛ Joram bɔra Samari ka taa Israɛl bɔnsɔn bɛɛ labɛn.
[7] A ye cidenw bila ka taa a fɔ Juda ka masakɛ Josafat ye ko: «Moab bɔnsɔn murutira ne ma, i b'a fɛ ka taa ne fɛ k'a kɛlɛ wa?» Josafat y'a jaabi ko: «Ne na taa. Ne ni i ye kelen ye, ne ka mɔgɔw ni i ka mɔgɔw ye kelen ye, ne ka yɛlɛnkan sow ni i taw ye kelen ye.»
[8] A ko fana: «An na taa sira jumɛn fɛ?» Joram y'a jaabi ko: «Edɔm kungokolon sira fɛ.»
[9] Ayiwa Israɛl bɔnsɔn ka masakɛ ni Juda ka masakɛ ni Edɔm ka masakɛ taara ɲɔgɔn fɛ, nka u ye tile wolonwula kɛ taama la tuma min na, u ka kɛlɛbolow ni u nɔfɛ baganw ka ji dɛsɛra.
[10] O tuma la Israɛl ka masakɛ pɛrɛnna ko: «E, Matigi ye nin masakɛ saba wele walisa ka an don Moab bɔnsɔn bolo.»
[11] Josafat ye ɲininkali kɛ ko: «Yala Matigi ka kira si tɛ yan walisa o ka Matigi ɲininka an ye wa?» Israɛl ka masakɛ ka jɔn dɔ y'a fɔ ko: «Safat denkɛ Elise min tun bɛ ji kɛ Eli tɛgɛ la, o bɛ yan.»
[12] Josafat ko: «Matigi ka kuma bɛ a da la.» O tuma la Israɛl bɔnsɔn ka masakɛ ni Josafat ni Edɔm masakɛ taara Elise sɛgɛrɛ.
[13] Elise y'a fɔ Israɛl ka masakɛ ye ko: «Mun bɛ e ni ne cɛ? Taa i fa ka kiraw ni i ba ka kiraw ɲininka.» Israɛl ka masakɛ y'a jaabi ko: «Ayi, katuguni Matigi yɛrɛ ye nin masakɛ saba wele ka u don Moab bɔnsɔn bolo.»
[14] O tuma la Elise ko: «Kɛlɛbolow Matigi ɲɛnama tɔgɔ kosɔn, ne bɛ baara kɛ o min ye, ni ne tun tɛ Juda ka masakɛ Josafat jate, ne tun tɛna foyi kɛ i ye, ne tun tɛna i filɛ fana.
[15] Nka sisan aw ka na ni nkɔni fɔla dɔ ye ne fɛ yan.» Nkɔni fɔla ye a ka nkɔni fɔ tuma min na, Matigi y'a bolo da Elise kan.
[16] A y'a fɔ ko: «Matigi ko: ‹Aw ka bajalanw sen nin jɛkɛnɛ yɔrɔ bɛɛ la.›
[17] K'a masɔrɔ Matigi ko: ‹Aw tɛna fiɲɛ mankan mɛn, aw tɛna sanji ye, o bɛɛ n'a ta nin jɛkɛnɛ bɛɛ na fa ji la. Aw yɛrɛw ni aw ka misiw ni aw ka baganw bɛɛ na o min.›
[18] Nka o ye fɛn fitinin ye Matigi ɲɛ na. A na Moab bɔnsɔn fana don aw bolo.
[19] Aw na u ka dugu barikamaw ni dugubaw ci. Aw na u ka jirisun ɲumanw bɛɛ tigɛ ka u ka ji boyiw bɛɛ geren ka u ka sɛnɛ kɛ yɔrɔw tiɲɛn ni kabakurunw ye.»
[20] Ayiwa sɔgɔma da fɛ saraka bɔ tuma la, ji nana Edɔm sira fɛ ka jamana yɔrɔw bɛɛ fa ji la.
[21] Moab bɔnsɔn y'a mɛn ko masakɛw natɔ don u kama tuma min na, mɔgɔ minw tun bɛ se ka kɛlɛkɛ minanw ta ani olu ɲɛ mɔgɔw, u bɛɛ ye ɲɔgɔn lajɛ yɔrɔ kelen na ka taa u daga dancɛ la.
[22] O dugusajɛ sɔgɔma da joona fɛ, tile yɛlɛnna ji kun na tuma min na, Moab bɔnsɔn ye ji sanfɛla filɛ, o bɛɛ kɛra joli ye u ɲɛ na.
[23] U kulola ko: «Joli filɛ! Siga t'a la, masakɛw ye npan sama ɲɔgɔn kama ka ɲɔgɔn faga. Ayiwa Moab bɔnsɔn, aw ka wuli, an ka taa fɛnw cɛ.»
[24] O tuma la u wulila ka taa Israɛl bɔnsɔn ka daga kama, nka Israɛl bɔnsɔn wulila ka u gosi. Moab bɔnsɔn bolila u ɲɛ. O kɔ, Israɛl bɔnsɔn taara jamana kɔnɔ ka Moab bɔnsɔn tiɲɛn kosɛbɛ.
[25] U ye duguw ci. Cɛw bɛɛ kelen-kelen ye kabakurun kelen fili foro ɲumanw bɛɛ la ka u datugu. U ye ji boyiw bɛɛ da geren ka jirisun ɲumanw bɛɛ tigɛ. Ntanfuratigiw ye Kir-Haresɛt lamini k'a bon, u ma foyi to yen kabakurunw kɔ.
[26] Moab bɔnsɔn ka masakɛ y'a ye ko a tɛ se ka kisi tun minkɛ, a ye cɛ npantigi kɛmɛ wolonwula lajɛ ka olu bila a ɲɛ fɛ ko a bɛ taa se Edɔm masakɛ ma, nka o ma se ka kɛ.
[27] O tuma la a denkɛ fɔlɔ, min tun ka kan ka sigi a nɔ na, a ye o minɛ ka o kɛ saraka jenita ye dugu lamini kogo sanfɛ. O yɔrɔ nin bɛɛ dimiyaba wulila Israɛl kama. U ye u mabɔ Moab masakɛ la ka kɔsegin ka taa u ka jamana la.