[1] Matigi bɛ Eli layɛlɛn sankolo la fununfunun fɛ tuma min na, Eli ni Elise bɔra Gilgal ɲɔgɔn fɛ.
[2] O tuma la Eli y'a fɔ Elise ye ko: «Ne bɛ i deli, i ka to yan, k'a masɔrɔ Matigi ye ne ci ka taa Bɛtɛl.» Elise y'a jaabi ko: «Matigi ɲɛnama tɔgɔ kosɔn, ka i ɲɛnama to, ne tɛna fara i la.» U taara ɲɔgɔn fɛ Bɛtɛl.
[3] Kiraw denkɛ minw sigilen tun bɛ Bɛtɛl, olu nana a fɔ Elise ye ko: «Yala i b'a dɔn ko Matigi na i kuntigi ta ka taa sankolo la bi wa?» Elise ko: «Ɔwɔ, a' ye aw makun. Ne yɛrɛ y'a dɔn.»
[4] Eli y'a fɔ Elise ye ko: «Ne bɛ i deli, i ka to yan katuguni Matigi ye ne ci ka taa Jeriko.» Elise y'a jaabi ko kura ko: «Matigi ɲɛnama tɔgɔ kosɔn, ka i ɲɛnama to, ne tɛna fara i la.» U taara Jeriko ɲɔgɔn fɛ.
[5] Kiraw denkɛ minw sigilen tun bɛ Jeriko, olu gɛrɛla Elise la k'a fɔ a ye ko: «Yala i b'a dɔn ko Matigi na i kuntigi ta ka taa sankolo la bi wa?» Elise ko: «Ɔwɔ, a' ye aw makun. Ne fana y'a dɔn.»
[6] Eli y'a fɔ Elise ye ko: «Ne bɛ i deli ko i ka to yan katuguni Matigi ye ne ci fo Jurdɛn ba dala.» Elise ko: «Matigi ɲɛnama tɔgɔ kosɔn, ka i ɲɛnama to, ne tɛna fara i la.» Ayiwa u fila taamana ka taa Jurdɛn ba dala ɲɔgɔn fɛ.
[7] Kiraw denkɛw la cɛ biduuru tugura u la ka furancɛ to u ni ɲɔgɔn cɛ. Eli ni Elise fila bɛɛ ye u jɔ Jurdɛn ba dala.
[8] O tuma la Eli ye a ka dulɔkiba ta ka o kuru ka baji gosi n'a ye. Ji cɛ tilara fila ye. Eli ni Elise ye ba tigɛ u sen na gwele kan.
[9] U ye ba tigɛ tuma min na, Eli y'a fɔ Elise ye ko: «I bɛ fɛn min fɛ, i ka o deli, ne ka o kɛ i ye sani ne ka ta ka bɔ i kɔrɔ.» Elise y'a jaabi ko: «Ni min bɛ i la, i ka o ɲɔgɔn fila di ne ma.»
[10] Eli y'a fɔ a ye ko: «I ye fɛn gɛlɛnma deli. Nka ni i ye ne taatɔ ye ka bɔ i kɔrɔ, o tuma la i ka fɔlen na kɛ. Ni i ma ne taatɔ ye, a tɛna kɛ.»
[11] Ka u to kuma la ka taa, wotoro tasumama ni so tasumamaw nana u fara ka bɔ ɲɔgɔn na. Eli yɛlɛnna sankolo la fununfunun fɛ.
[12] Elise y'a taatɔ filɛ ka pɛrɛn ko: «Ne fa! Ne fa! Israɛl bɔnsɔn ka wotorow ni a ka sotigiw!» Elise ma a ye tun. O tuma la Elise ye a yɛrɛ ka dulɔkiba fara fila ye.
[13] O kɔ, Elise ye Eli ka dulɔkiba ta. A ye o da a kamankun kan ka na se Jurdɛn ba ma ka i jɔ Jurdɛn ba dala.
[14] Eli tun ye dulɔkiba min bila, Elise ye o ta ka baji gosi n'o ye k'a fɔ ko: «Matigi, Eli ka Ala bɛ min?» Elise ye baji gosi tuma min na, baji cɛ tilara fila ye. Elise tɛmɛnna ka taa ba kɔ.
[15] Kiraw denkɛ minw sigilen tun bɛ Jurdɛn ba kɔ fɛ Jeriko, olu ye Elise ye minkɛ, u ko: «Eli ni bɛ Elise kan.» U gɛrɛla a la k'a kunbɛn ka u biri duguma a kɔrɔ,
[16] k'a fɔ a ye ko: «Cɛ ja gɛlɛn biduuru bɛ i ka jɔnw cɛma yan. A to olu ka taa i kuntigi ɲini. A dɔrɔ Matigi Ni y'a ta k'a bila kulu dɔ san fɛ wala kulu furancɛ dɔ la.» Elise y'u jaabi ko: «Aw kana u ci ka taa.»
[17] Nka u tora ka u sinsin o kan kosɛbɛ fo a y'a fɔ u ye ko u ka taa. O tuma la u ye cɛ biduuru ci ka taa Eli ɲini tile saba kɔnɔ. U ma se ka a ye.
[18] U nalen Elise yɔrɔ la Jeriko, a y'a fɔ u ye ko: «Yala ne m'a fɔ aw ye ko aw kana taa wa?»
[19] Jerikokaw y'a fɔ Elise ye ko: «Nin dugu sigi yɔrɔ ka ɲi i ko ne matigi ɲɛ b'a la cogo min na, nka a ji man ɲi, a dugukolo fana man ɲi.»
[20] Elise ko: «A' ye na tasa kura dɔ di ne ma ka kɔgɔ kɛ a kɔnɔ.» U nana o di a ma.
[21] O tuma la Elise taara ji boyi da la ka kɔgɔ fili a kɔnɔ k'a fɔ ko: «Matigi ko a na nin ji diya. A tɛna fagali kɛ tun, a tɛna dugukolo kan fɛnw bali ka den tun.»
[22] O ji diyara fo ka na se bi ma ka kɛɲɛ ni Elise ka kuma fɔlen ye.
[23] Elise bɔra yen ka taa Bɛtɛl. K'a to sira la, kamalen dɔw bɔra o dugu kɔnɔ. U ye yɛlɛ bɔ Elise la k'a fɔ ko: «Yɛlɛn ka taa, kunsigi bɔnnen, yɛlɛn ka taa, kunsigi bɔnnen.»
[24] Elise y'i kɔ filɛ ka u danga Matigi tɔgɔ la. O yɔrɔ nin bɛɛ, ursi wara fila bɔra tu kɔnɔ ka o kamalen binaani ni fila farafara.
[25] Elise bɔra yen ka taa Karmɛl kulu kan, o kɔ, ka taa Samari.