[1] Masakɛ Sedesiasi ka masaya san kɔnɔntɔnnan kalo tannan tile tannan don, Babilonɛ masakɛ Nebukadnezar ni a ka kɛlɛbolow bɛɛ taara Jerusalɛm kama, u ye daga sigi dugu ɲɛ fɛ ka dugu lamini. U ye yɛlɛnyɛlɛnnanw jɔ ka dugu lamini.
[2] Daga sigira dugu da la fo ka taa se masakɛ Sedesiasi ka masaya san tan ni kelennan ma.
[3] San kalo naaninan tile kɔnɔntɔnnan la kɔngɔba donna dugu kɔnɔ fo dumuni si tun tɛ mɔgɔw bolo.
[4] O tuma la dugu lamini kogo sɔgɔra. Kɛlɛkɛ cɛw bɛɛ bolila su fɛ ka bɔ kogo fila furancɛ la donda fɛ, o tun bɛ masakɛ ka nakɔ kɛrɛ fɛ. U taara kɛnɛba sira fɛ. O y'a sɔrɔ Kaldekaw tun ye dugu kogo lamini.
[5] Nka Kaldekaw ka kɛlɛkɛ cɛw ye masakɛ nɔgɛn ka kun a ni a ka kɛlɛbolow la Jeriko jɛkɛnɛ la. Masakɛ ka kɛlɛbolow bɛɛ bolila ka a to.
[6] Kaldekaw ye masakɛ minɛ ka taa n'a ye Babilonɛ masakɛ yɔrɔ la Ribla. U ye kiri tigɛ a kan yen.
[7] U ye Sedesiasi denkɛw kan tigɛ a yɛrɛ ɲɛ kɔrɔ, o kɔ, u ye a ɲɛw ci k'a siri ni nsiranɛgɛ jɔlɔkɔw ye ka taa n'a ye Babilonɛ.
[8] San kalo duurunan tile wolonwulanan don, Babilonɛ masakɛ Nebukadnezar ka masaya san tan ni kɔnɔntɔnnan la, garadiw kuntigi Nebuzaradan min tun ye Babilonɛ masakɛ ka jalatigi dɔ ye, o donna Jerusalɛm.
[9] O ye Matigi ka so ni masaya so ani Jerusalɛm sow bɛɛ jeni ka mɔgɔ tɔgɔbaw bɛɛ ka sow jeni ni tasuma ye.
[10] O kɔ, Kaldekaw ka garadiw kuntigi ka kɛlɛkɛ cɛw ye Jerusalɛm dugu lamini kogow ci.
[11] Dugu kɔnɔ mɔgɔw tɔ minw tora ani mɔgɔ minw ye u yɛrɛ di Babilonɛ masakɛ ma ani dugu mɔgɔ tɔw, garadiw kuntigi Nebuzaradan ye olu bila ka taa Babilonɛ.
[12] Garadiw kuntigi ma mɔgɔ si to jamana kɔnɔ ni faantanw tɛ. A ye olu kɛ rezɛn nakɔ kɔlɔsibaaw ni sɛnɛkɛlaw ye.
[13] Nsiranɛgɛ samasenw ani koli minan jusigilanw ani nsiranɛgɛ faaba minw tun bɛ Matigi ka so kɔnɔ, Kaldekaw ye olu bɛɛ karikari ka taa ni o nsiranɛgɛw ye Babilonɛ.
[14] Bugurijɛ minanw ni bugurijɛ cɛlanw ni fitinɛ da bɔlanw ani daganinw, baarakɛ minanw bɛɛ, u ye olu cɛ.
[15] Garadiw kuntigi taara ni tasuma cɛlanw ani sanu ni warijɛ tasaw fana ye.
[16] Solomani tun ye samasen fila ni faa belebeleba kelen ani a jusigilan minw dila Matigi ka so ye, o minanw tun ye nsiranɛgɛ dama dɔnbali ye.
[17] Samasen bɛɛ kelen-kelen jɔ kundama tun ye nɔnkɔn ɲɛ tan ni segin ye, u kunna biri nsiranɛgɛw jɔ kundama tun ye nɔnkɔn ɲɛ saba ye. U masirilen tun bɛ ni jiri feere bisigiw ye ka u lamini ni gerenatiden bisigiw nsiranɛgɛ ye. Samasen fila bɛɛ tun ka kan.
[18] Garadiw kuntigi ye sarakalasebaa kuntigi Seraja ni sarakalasebaa dankan Sofoni ani Matigi ka so dakɔlɔsibaa saba minɛ,
[19] ani kuntigi min bɛ kɛlɛkɛ cɛw kun na ani masakɛ ka laadibaa mɔgɔ duuru minw tun bɛ Jerusalɛm ani kɛlɛkɛ cɛw ka sɛbɛnnikɛla min tun bɛ jamana kɔnɔ mɔgɔw lajɛ ɲɔgɔn kan ani jamana kɔnɔ mɔgɔ cɛ biwɔɔrɔ minw tun bɛ dugu kɔnɔ, a ye olu fana minɛ.
[20] Garadiw kuntigi Nebuzaradan taara ni o mɔgɔ minɛlenw bɛɛ ye Babilonɛ masakɛ yɔrɔ la Ribla.
[21] Babilonɛ masakɛ ye u faga Ribla, Hamat jamana la. O cogo la Juda bɔnsɔn minɛna ka taa jɔnya la ka bɔ u ka jamana la.
[22] Nebukadnezar ye Juda bɔnsɔn tɔ minw to Juda jamana la, Babilonɛ masakɛ ye Safan denkɛ Akikam denkɛ Gedalia kɛ olu ka jamana kuntigi ye.
[23] Juda kɛlɛbolo kuntigiw y'a mɛn ko Babilonɛ masakɛ ye Gedalia kɛ o kuntigi ye tuma min na, u taara a sɛgɛrɛ Mizpa. O kuntigiw tun ye Netania denkɛ Isumaɛl ani Karea denkɛ Jokanan ani Tanhumɛt denkɛ Seraja ye ka bɔ Netofa ani Makaka denkɛ Jazania ani u fɛ cɛw.
[24] Gedalia y'i kali olu ni a fɛ cɛw ye ko: «Aw kana siran Kaldekaw ɲɛ. A' ye to jamana kɔnɔ ka baara kɛ Babilonɛ masakɛ ye, aw na hɛrɛ sɔrɔ.»
[25] Nka Elisama denkɛ Netania denkɛ Isumaɛl min tun ye masa si ye, o ni cɛ tan taara Mizpa ka Gedalia gosi k'a faga. Yahutuw ni Kaldeka minw tun bɛ Gedalia fɛ, a ye olu fana faga.
[26] O tuma la mɔgɔw bɛɛ, mɔgɔ misɛn fara mɔgɔba kan, ani kɛlɛ kuntigiw ye sira minɛ ka taa Misira jamana la, katuguni u tun bɛ siran Kaldekaw ɲɛ.
[27] Juda bɔnsɔn ka masakɛ Jojaken minɛli san bisaba ni wolonwulanan la, san kalo tan ni filanan tile mugan ni wolonwulanan don, Babilonɛ masakɛ Evil-Merodak ka masaya san fɔlɔ la, a ye Juda bɔnsɔn ka masakɛ Jojaken bila ka bɔ kasɔ la.
[28] A ye kuma ɲuman fɔ Jojaken ye ka masasigilan di a ma min bɛ masakɛ tɔw ta san fɛ Babilonɛ jamana la.
[29] A y'a ka kasola fini bɔ a kan na ka a sigi tabali la ka dumuni kɛ masakɛ fɛ don o don.
[30] Masakɛ ye a magoɲɛ fɛn di a ma don o don fo ka se a sa don ma.