[1] Kiraw denkɛw y'a fɔ Elise ye ko: «An bɛ sigi so min kɔnɔ i ɲɛ kɔrɔ, o ka dɔgɔ an na.
[2] An ka taa Jurdɛn ba dala, an bɛɛ kelen-kelen bɛ so cɛtigɛ jiri kelen tigɛ ka siyɔrɔ dɔ jɔ.» Elise ko: «A' ye taa.»
[3] U la kelen ko: «Ne bɛ i deli, i ka taa i ka jɔnw fɛ.» Elise ko: «Ne na taa.»
[4] O tuma la a ni u taara ɲɔgɔn fɛ. U selen Jurdɛn ba dala, u bira jiri tigɛli la.
[5] Ka u dɔ to jiri tigɛ la, o ka jelekisɛ ŋunanna ka bɔ a kala la ka bi ji rɔ. A kulola ko: «E ne matigi, jele singanen don.»
[6] Ala ka cɛ y'a ɲininka ko: «A bira yɔrɔ jumɛn?» A y'a bi yɔrɔ jira Elise la. O tuma la Elise ye dɔgɔ bolo dɔ kari ka o fili o yɔrɔ la. Jelekisɛ fogonna ji kun na.
[7] A y'a fɔ ko: «A ta.» Kamalen y'a bolo mɔɔnɔbɔ ka jelekisɛ ta.
[8] Ayiwa Siri masakɛ tun bɛ Israɛl bɔnsɔn kɛlɛ. A y'a fɔ a ka baaraden dɔw ye ko: «Ne na ne ka daga sigi nin yɔrɔ ni nin yɔrɔ la.»
[9] O tuma la Ala ka cɛ y'a fɔ Israɛl ka masakɛ ye ko: «E, i yɛrɛ kɔlɔsi, i kana tɛmɛn nin yɔrɔ fɛ katuguni Sirikaw dogolen bɛ yen fɛ.»
[10] O tuma la Israɛl ka masakɛ ye mɔgɔ dɔw ci ka taa ka Ala ka cɛ ka yɔrɔ fɔlen filɛ. Ala ka cɛ ye masakɛ lasɔmi o cogo la siɲɛ kelen tɛ, siɲɛ fila tɛ.
[11] Siri masakɛ hakili ɲaamina o ko la kosɛbɛ. A y'a ka baaradenw wele k'a fɔ olu ye ko: «An ka mɔgɔ min kɛra Israɛl ka masakɛ ɲin ye, aw tɛ o jira ne la wa?»
[12] A ka baaradenw la kelen y'a jaabi ko: «Ayi, ne matigi, o mɔgɔ si tɛ an cɛma, nka i bɛ min fɔ, hali i ka sibon kɔnɔ, Israɛl bɔnsɔn ka kira Elise bɛ o kow bɛɛ fɔ u ka masakɛ ye.»
[13] O tuma la masakɛ ko: «A bɛ yɔrɔ min na, aw ka taa o filɛ, ne na o minɛ.» O tuma la u nana a fɔ a ye ko: «A bɛ sɔrɔ Dotan.»
[14] O yɔrɔ nin bɛɛ masakɛ ye sow ni wotorotigiw ani kɛlɛboloba ci ka taa su fɛ ka dugu lamini.
[15] O dugusajɛ, sɔgɔma da fɛ, Ala ka cɛ ka baaraden bɔra. A ye kɛlɛbolo ni sow ni wotorow kɛlen ye ka dugu lamini. A y'a fɔ Elise ye ko: «E, ne matigi, an na mun kɛ sa?»
[16] Elise y'a jaabi ko: «I kana siran, katuguni an ɲinw ka ca ka tɛmɛn olu ɲinw kan.»
[17] O kɔ, Elise ye Ala deli ko: «Matigi, i ka ne ka baaraden ɲɛ yɛlɛ walisa a ka yeli kɛ.» Matigi ye baaraden ɲɛ dayɛlɛ. O y'a ye ko kulu yɔrɔ bɛɛ falen bɛ sow ni wotoro tasumamaw la, ka Elise fan bɛɛ lamini.
[18] O tuma la Sirikaw jiginna ka taa Elise fan fɛ. Kira ye Matigi deli ko: «I ka nin mɔgɔw ɲɛw fiyen.» Matigi ye o mɔgɔw ɲɛw fiyen ka kɛɲɛ ni Elise ka delili ye.
[19] O kɔ, Elise nana a fɔ u ye ko: «Nin tɛ o dugu sira ye, nin tɛ o dugu fana ye. Aw bɛ Ala ka cɛ min ɲini, a' ye tugu ne la, ne na o yɔrɔ jira aw la.» U taara a nɔ fɛ Samari.
[20] U selen Samari dugu kɔnɔ, Elise ko: «Matigi, i ka o mɔgɔw ɲɛw yɛlɛ walisa u ka yeli kɛ.» Matigi ye u ɲɛw yɛlɛ, u y'a sɔrɔ ko u bɛ Samari dugu cɛmancɛ la.
[21] Israɛl bɔnsɔn ka masakɛ y'u ye minkɛ, a y'a fɔ Elise ye ko: «Ne ka u faga wa, ne fa, ne ka u faga wa?»
[22] Elise y'a jaabi ko: «I kana u faga. Ni i ye mɔgɔw minɛ kɛlɛ la ni i ka npan ni i ka kala ye, i bɛ olu faga wa? A' ye dumuni ni ji di u ma. U ka dumuni ni minni kɛ ka kɔsegin u kuntigi ka yɔrɔ la.»
[23] Israɛl ka masakɛ ye dumuniba dila u ye. U ye dumuni kɛ ka minni kɛ. O kɔ, a y'u bila ka taa. U kɔseginna u kuntigi ka yɔrɔ la. Kabini o don na, Sirikaw ka kɛlɛbolow ma taa Israɛl bɔnsɔn ka jamana kɔnɔ tun.
[24] Waati dɔ tɛmɛnnen kɔ, Siri masakɛ Ben-Hadad ye a ka kɛlɛbolow bɛɛ lajɛ ka taa daga Samari da la.
[25] Kɔngɔba donna Samari kɛlɛ kosɔn fo fali kunkolo kelen tun bɛ feere warijɛ bisegin la. Jɛnɛntuban bo tɛgɛ ɲɛ kelen tun bɛ feere warijɛ duuru la.
[26] Ka Israɛl bɔnsɔn ka masakɛ tɛmɛntɔ to dugu lamini kogo kan, muso dɔ pɛrɛnna k'a fɔ a ye ko: «Ne matigi, masakɛ, ne dɛmɛ.»
[27] Masakɛ ko: «Ni Matigi ma i dɛmɛ, ne bɛ se ka i dɛmɛ ka bɔ ɲɔ gosi yɔrɔ la wala rezɛn ji bɔ yɔrɔ la wa?»
[28] Masakɛ ko fana: «Mun kɛra i la?» Muso ko: «Nin muso y'a fɔ ne ye ko, ne ka ne denkɛ di, an ka o dun bi, ko sini an na ale denkɛ dun.
[29] O tuma la an ye ne denkɛ tobi k'a dun. O dugusajɛ ne y'a fɔ ko a ka a den di, an k'a dun, nka a y'a den dogo.»
[30] Masakɛ ye o muso ka kuma mɛn tuma min na, a y'a ka finiw fara ka taama dugu lamini kogo kan. Mɔgɔw y'a ye ko a ye cafu fini don a ka dulɔki jukɔrɔ.
[31] Masakɛ pɛrɛnna ko: «Ni ne ma Elise kunkolo tigɛ bi, ni Safat denkɛ Elise kunkolo tora a kan na bi, Ala ka ko jugu kɛ ne la.»
[32] Ka Elise sigilen to a ka so kɔnɔ ka cɛkɔrɔbaw to a fɛ yen, masakɛ ka ciden dɔ taara yen. Sani o ciden ka se yen, Elise y'a fɔ cɛkɔrɔbaw ye ko: «A' y'a filɛ, o mɔgɔ fagala den ye mɔgɔ dɔ ci k'o ka ne kunkolo tigɛ. A' ye aw yɛrɛw kɔlɔsi, ni o ciden sera yan, aw ka da tugu, aw kana sɔn a ka don. Aw tulo tɛ a makɛ senkan na a kɔ wa?»
[33] K'a to kuma la u fɛ, a filɛ, o ciden sera a ma. A ko: «Nin bɔnɛ ye Matigi nɔ ye. Ne bɛ se ka Matigi makɔnɔ tun wa?»