[1] Josiasi sigira masaya la a si san seginnan la. A ye san bisaba ni kelen kɛ masaya la Jerusalɛm. A ba tɔgɔ ko Jedida, Adaja denmuso tun don ka bɔ Bozkat.
[2] Ale ye ko ɲuman kɛ Matigi ɲɛ kɔrɔ, a ye a bɛnbakɛ Dawuda ka siraw taama. A ma jɛngɛ ka taa a kinin wala a numan fɛ.
[3] Masakɛ Josiasi ka masaya san tan ni seginnan la, a ye a ka sɛbɛnnikɛla Mesulam denkɛ Azalia denkɛ Safan ci ka taa Matigi ka so kɔnɔ k'a fɔ a ye ko:
[4] «I ka taa sarakalasebaa kuntigi Hilkija sɛgɛrɛ k'a fɔ a ye ko a ka Matigi ka so kɔnɔ wari bɛɛ minɛ, dakɔlɔsibaaw tun ye wari minw minɛ mɔgɔw bolo, a ka o bɛɛ minɛ,
[5] ka o wari di Alabatosoba kɔnɔ baara kuntigiw ma. Olu k'a di so kɔnɔ baarakɛlaw ma walisa u ka so tiɲɛn yɔrɔw dila.
[6] U k'a di jiri dɛsɛlaw ni so jɔlaw ani masonw ma, ko olu ka jiriw ni kaba dɛsɛnenw san so labɛnni kama.
[7] O bɛɛ n'a ta, wari min dira u ma, mɔgɔ ma u ɲininka o ko la katuguni dannamɔgɔw tun don.»
[8] Sarakalasebaa kuntigi Hilkija y'a fɔ sɛbɛnnikɛla Safan ye ko: «Ne ye sariya kitabu ye Matigi ka so kɔnɔ.» Hilkija ye o kitabu di Safan ma, o y'a kalan.
[9] Sɛbɛnnikɛla tilalen kɔ a kalanni la, a taara masakɛ sɛgɛrɛ k'a fɔ a ye ko: «I ka baaradenw ye wari min sɔrɔ Matigi ka so kɔnɔ, an taara o di Matigi ka so baara koɲɛnabɔlaw ma ko u ka Matigi ka so tiɲɛn yɔrɔw dila.»
[10] Sɛbɛnnikɛla Safan y'a fɔ masakɛ ye ko kura ko: «Sarakalasebaa Hilkija ye kitabu dɔ di ne ma.» Safan y'a kalan masakɛ ɲɛ na.
[11] Masakɛ ye o sariya kitabu kɔnɔ kuma mɛn tuma min na, o yɔrɔ nin bɛɛ a y'a ka finiw fara.
[12] O kɔ, k'a fɔ sarakalasebaa kuntigi Hilkija ni Safan denkɛ Akikam ni Mise denkɛ Akibɔr ni sɛbɛnnikɛla Safan ani masakɛ ka baaraden Asaja ye ko:
[13] «An ye nin kitabu min sɔrɔ, a' ye taa Matigi ɲininka ne ni mɔgɔw ni Juda bɔnsɔn bɛɛ ye o kitabu kɔnɔ kuma ko la, katuguni Matigi ka dimiyaba wulila an kama, sabu an bɛnbaw ma o kitabu kɔnɔ kumaw jate. A ye minw fɔ, u ma olu kɛ.»
[14] Ayiwa sarakalasebaa Hilkija ni Akikam ni Akibɔr ni Safan ani Asaja taara kiramusoma Hulda sɛgɛrɛ. Finiw kɔlɔsibaa Salum muso tun don. Salum fa tun ye Tikva ye, Tikva fa tun ye Harhas ye. O muso sigilen tun bɛ Jerusalɛm dugu kinda filanan la. U kumana a fɛ tuma min na,
[15] a y'a fɔ u ye ko: «Matigi, Israɛl bɔnsɔn ka Ala ko: ‹Mɔgɔ min ye aw ci ka na ne yɔrɔ, aw k'a fɔ o ye ko,
[16] Matigi ko: «A filɛ, ne na bɔnɛ lase nin yɔrɔ ni a kɔnɔ sigibaaw ma. Juda bɔnsɔn ka masakɛ ye sariya kitabu min kalan, ne na o kow lase u ma,
[17] katuguni Juda bɔnsɔn ye ne bila ka wusulan suma dumanw wusu bato fɛn wɛrɛw ye ka ne dusu dimin ni u bolo baara nɔ ye. O de kosɔn ne na dimin nin dugu kɔrɔ, o dimiya tɛna suma fewu.» ›
[18] Juda bɔnsɔn ka masakɛ min ye aw ci ka na Matigi ɲininka, aw k'a fɔ o ye ko a ye kuma min mɛn, Matigi, Israɛl bɔnsɔn ka Ala b'a fɔ o ko la ko:
[19] ‹Ne ko, ne bɛ na nin tɔɔrɔ kow ni nin dangali ko minw kɛ nin jamana ni a kɔnɔ mɔgɔw la, i ye olu mɛn tuma min na, i nimisara ka i yɛrɛ majigin ka i ka finiw fara ka kasi ne ɲɛ kɔrɔ, o de kosɔn ne ye i lamɛn.› Matigi ye o fɔ.
[20] Ne na i kafo i bɛnbaw kan. I su na don hɛrɛ la. Ne na tɔɔrɔ ko minw lase nin jamana ma, i ɲɛ tɛna o ye.» O cidenw taara o ci fɔ masakɛ ye.