[1] Baryoti ibeenki oraate teebataas ka, deyyeho uyuuggeti iche haaggisse khaatte go'ddi Yeesso lakahawwaale iratte.
[2] Daddaabti go'd afiche lagesse ichehi la'dembeleeliye 'heleen.
[9] Inkoo icho go'd kasoonokhteen ka, waha tuumman abattiti tomon ichoow koowe ichoow 'doo'di addan tuumman ba icheekte.
[10] Deyyehoti waha ergaano icheekte la a Maariyati ilkerengeetti Magdaala ichoow Yoowana ichoow Maariyati abar Yaakoobee ichoow deyyehoti addane leejirte.
[11] I'daasenyi abatti deyyeho rummeysawwaayte, a mehe icho ka yeedi liidowo a wihi ilmarhaatteet on.
[12] I'daasenyi Beetero kahe anki go'ddi Yeesso lakahawwaale inyaame. Go'd kagulguubsate, goya yeye, darfohi goorat Yeesso lakaayyuube kalday hawwaal goya kaarge. Ulla usuhi wihi yitah kagirmeesti irte.
[13] Maalinkaas goya abatti Yeessotoo lammee ilkerengeetti weene Yeerusaleem kabahte, ilkerengeettoo rucchule Emaawus layadeehe geeddi kiilomitta tomon ichoow koow jirto, iche isohatta.
[14] Geedda icho 'dulaaan, wori wihi yitahye kahawwoochaan.
[15] Geedda icho hawwoochaan, Yeesso rubeytiis garabicho gele, leesohte.
[16] I'daasenyi Waakh icho indo a hide, eti us yahe ma kasin.
[17] Yeesso wihi us icho worsate, “Atin geedda atin 'dussaan mehe kahawwoossaan?” Icho la tolossateene fool ribowe.
[18] Kichokoo Kiiliyooba layadeeh wihi us worsate, “Ati kaldaye marteenye ilkerengeetti weene Yeerusaleem ka wihi ibeenneta kutte yitah igaran?”
[19] Wihi us worsate “Mehe yitah?” Wihi icho ilaabeen, “Wihi Yeessohi Naasaret layeele. Us eti Waákh íyeyyeedo eheet. Yeediis ichoow wahanyeyyohi us Waakh ichoow enenyet tuumman ortiis ka yeele miige khabeen.
[20] Kuhaaniyyohi wewween ichoow ewweenkeen ba dahanohi 'doo'di omoot igoocho gesseene, icho la usu massalaaba kakaaheen.
[21] I'daasenyi nah usuhi 'doo'di Issiraayel dowwanoha ka soofuro khajjeelle. Wihi addan la, uus waha tuumman yitaaheen, waha toolla a ibeenki seyyahnaatteet.
[22] Deyyehotoo nah leejirto la maanta nah eyng'assaasse, kootte baryo on inti goorat eta lakahawwaale iratte.
[23] I'daasenyi hawwaassi marahe sare goya ikajirin iirteen. Yimaateene saggi icho herti Waakh iargeen nah isoocheekeen. Herta la saggi eta ijiro nah isoocheekte.
[24] Chirraakka wahalheenyokoo hawwaal irteene icho laka wihi kootte deyyeho tidah on argeene, i'daasenyi eti goorat yumuy ma argin.”
[25] Yeesso la wihi us iyidah, “Atin eenna a 'dalamme, toro eenna kakhuufnaanki atin wihi tuummane 'doo'di goorat Waákh íyeyyeedo cheeke kakhuuftaan ka uurassiin a ga'daale!
[26] Wihi massane 'doo'daas Waákh íyeyyeedo cheeke, Ki Lasubhe sinayyoha tuummane 'hela 'dee inti weyti us kaababo irta menya?”
[27] Yeesso la wihi goorat usu miinsane Chiirnaanneti Waakh goya kachiiran ibabbakkaahiche. Uus buuggag Muusa lakasookhabti ichoowka buuggassi 'doo'di Waákh íyeyyeedo chiireen tuumman icheeke.
[28] Chirri icho goobi kootte icho isohtaan sooeleeleen ka, Yeesso etoo orey isohti iskayeele.
[29] I'daasenyi soojeycheene wihi icho iyidaaheen, “Kaale a isleebariino orrahe kola a dihtee.” Ulla 'deerka irte icho leefiddiye.
[30] Chirra us komborti ballaaddane lakagolossati ka meessiis koorronte ka, makaate khaate Waakh kala'd ilaabe, jejjebche, icho gisin sookhabte.
[31] Chirraakka reera indo lafure saggi eta Yeesso iyahe abteen. Toro chirraas on argiwwaayeen.
[32] Wihi icho isworsateen, “Eta chirri kootte us jit ka inno leeyyeedo us Chiirnaanneti Waakh wihi kachiiran us inno isoobabbakkaahicho, rubeyoheen atte ka i'di wohoo 'dab kabolkho menya?”
[33] Chirraas on kaheene, anki ilkerengeetti weene Yeerusaleem inokhteen. Intaas ka abattiti tomon ichoow koowe ichoow 'doo'di addane icho leejiro kulme 'heleene,
[34] wihi icho iyidaaheen, “Kamur rumanka omoot ka a sookahe! Ulla Siimon a isoobahe!”
[35] 'Doo'di kootte lammee laka wihi kootte geeddi icho jit ka'dulaan yitah cheeke. Toro la saggi icho chirri Yeesso makaate jebche eti u yahe iabteen 'doo'd icheekeen.
[36] Geeddi 'doo'da kootte lammee 'doo'di addan wor siicho, Kamur goycho tolossate, wihi us iyidah, “Nebeytiin ma furatti.”
[37] Icho dakkhamba naheen kol icho meleyka argeene koogyihiine.
[38] Ulla wihi us iyidah, “A i'doh mal atin igele? A i'doh geeyoha dakkhane atin ikamalin idowattaan?
[39] Bal dahanoheey ichoow luhloheey yeya, a ani rubeytaaya. I'daara 'dee mujjum eti an ahe kasa. Meleyka jid ichoow lafo ma khabto, saggi atin ani iagarteene an ikhabuu.”
[40] Inkoo us waha yidah ka, dahanohiis ichoow luhlohiis tuse.
[41] Jeenteti icho ihamaadaane toro igirmeestaan u, icho uliba saggi waha Yeesso iyahe ma rummeysanne, ulla wihi us worsate, “Wohoo golole a khabtaan?”
[42] Icho la bahaggoo lakarche idiibeen.
[43] Ulla khaate orcho ka yuhum.
[44] Ulla wihi us iyidah, “Waha dakkhan a wihi maanti goorat an atin leejiro an atin icheeke, wihi tuummane ani imiinsane Chiirnaanneti Amurre ichoow ti 'doo'di Waákh íyeyyeedo ichoow ti buuggi Sabuur lakachiire a labuuhicha.”
[45] Ulla 'deerka malicho fure 'dee wihi Chiirnaanneti Waakh goya kachiiran a abteen.
[46] Ulla wihi us iyidah, “Wihi chiiran a waha. Ki Lasubhe sina loomhicha, ibeenki seyyahnaatteet ka omoot kasookaha.
[47] Ilkerengeetti weene Yeerusaleeme lakasookhabta, antohiis ka wori uskeeli lakasoonokhti ichoow uskeeli Waakh enenyet ikakuto miinsan 'doo'di harra tuumman liicheeka.
[48] Atin a garti wahanyeyyoha.
[49] Ani wihi goorat Aabbaheey atin iayyiche a atin isooerga. I'daasenyi koloo ilkerengeet goya akabahina ichoowka miigti serey katamiit a atin ogoogto.”
[50] Chirri us abatti khaate ilkerengeetti Be'daaniya idowwaache ka, dahanohiis serey iooge, abatti iweeste.
[51] Abatti iweestaayi, abatti katabe goobi Waakh liikorche.
[52] Icho la usu wahteene, ichohi hamaadi buure khabo ilkerengeetti weene Yeerusaleem inokhteen.
[53] Kol dakkhan minki Waakhe buure fiddiyeene, Waakh saa'deen.