[1] Maantoo Yeesso intoo ka a weesta. Inkoo us weysi massiche ka etoo abattitiise wihi us iyidah, “Kamur saggi liiweesti nah abi i'di goorat Yoohana laka abattitiis iabchuu.”
[2] Yeesso la wihi us icho iyidah, “Geedda atin weysattaan waha daha, “ ‘Aabbahaanyaaw, magahaahki munyee a liinkaanyito, at ba enenyet tuumman dakhatta.
[3] Gololeenyoki maan dakkhan nah sii.
[4] Uskeeleenyo nah ikakut, i'di nah laka 'doo'di uskeel nah iyeele uskeel ikakunnuu. Toro la kajmeti uskeel nah kalugu'ddo nah kajeyi.’ ”
[5] Wihi us icho iyidah, “Eemba etiinkoo maanta minki aaliiskoo naanokho irayye, ‘Aalaaw, etoo aaleeyenye sulhaal isohti toolla minkeey yimiyye,
[6] gololi an siicho la ma khabo, makaate seyyahtoo an siicho isii,’ iyidah?
[7] “Eemba eti min goya kijiro, ‘Nyaam, sina iikawaarinne, afaf a hidayyihiine, ani ichoow nyaakhuteey ba a u'durra, sag an isookaho an walah kisiicho mele,’ kiyidah.
[8] Wihi an atin icheeko, chirri eta isookahine jeenteti us aaliis iyahuu golol isiin laka, jeenteti us kansi isiinne us daah ika'harin u, a geeddi us sookaho wihi us 'doono siicho.
[9] “'Deerka wihi an atin iadeeh, Waakh wihi at 'doonto daddaahe, a kisiicho. Wihi at 'doonto Waakh kayoyyowo, a ka'hessaa. Waakh arit ifah idahe, ulla a kifaho.
[10] I'di tahe eti tuummane walah daahe, Waakh wihi us daahe a siicha, ki walah yowti la, Waakh a ka'hela, ki ifaha yidah la, Waakh arit a ifaha.
[11] “Atinhi ooyenyee, etiinkoh chirri weeliis bahag daahe toof siicha?
[12] Ommos chirri weeliis ukkah daahe arraar siicha?
[13] Chirri atinhi uskeel leh ba nyaakhutiin siinti haaggan siissaan, Aabbahiinki serey jiro la geeddoo meheenye 'doo'di usu Rubeyti Munyee daahe siicha!”
[14] Yeesso maantoo etoo ginnatoo af tirto, iche kabahche. Chirri ginna et kabahte ka, et yeyyeede urur la girmeeste.
[15] I'daasenyi gaasichokoo mehe yidaaheen ya, “Miigti Beelsebuulhi karnati ginnayyootenye enenyet ginna kabahcha.”
[16] Gaasoo wohoo miigti Waakh tuso goobi Waakh kayimiyye icho daaheen ka ichohi Yeesso angey geesso 'doonaan.
[17] Yeesso wihi icho kamassaan garte wihi us icho iyidah, “Yaafbaaw seley goote isdihto, a baabaata, minki seley gowe isdiho a baaba.
[18] Chirri Seytaan seley goggowe isinokhte dakhiis saggoh orey ikasohta? Jeenteti an i'da iadeeh, a jeenteti atin an miig Beelsebuule ginnayyo kabahcha ielattaan.
[19] Chirri maanta an miig Beelsebuul ka ginnayyo enenyet kabahcho, 'doo'di atin raaho la miig eyya ginnayyo kabahcha? Icho 'deerka atin hukkuma.
[20] I'daasenyi chirri an farri Waakh ka ginnayyo bahcho, waha saggi dakhi Waakh goytiin iyimiyye tusaan.”
[21] “Chirri etoo miige birtiis dakkhan khaatte minkiis toorribo, meehiis et 'daaro mele.
[22] I'daasenyi chirri etoo usú kamiige usu dihe usu kahataate la, etaas usú kamiige birti eti min leh kakhuufo ichoow meehiis a khaata, 'doo'd gisa.
[23] “Eti tuummane ani ileejirin, a itirrima. Eti igargaarine walah ileesooholin a ileefida.
[24] “Maanti ginna etoo goya kabahte, ginnata a iratta, ili daarenye bicche laa dah kagoossa. Fur yowatta, i'daasenyi fur ma 'hesso. 'Deerka wihi iche tadeeh, ‘Fureeyki an kasootabe inokhda.’
[25] Maanti iche tamiit furi harane lamujjummooche 'hessa.
[26] Ginnataas 'deerka a iratta, ginna teeba addane iche laka kasuuje sookhaatta etaas goya gelaane, fur yeessaan. Etaas la jirotiis, ti goorat oraat a ka'darsatta.”
[27] Yeesso yeyyeedaayi, makhaabassoo urur goyaka sooyeedde wihi iche Yeesso itidah, “Waakh rumanka abarti kidesse toro kinuugsatte a imaale!”
[28] Yeesso wihi us ilaabe, “'Doo'di rumanka Waakh imaalo, a ki Yeedi Waakh daago toro la raaho.”
[29] Geedda urur buuraati Yeesso wihi us yidah, “'Doo'di i'dee a 'doo'di uskeel leh! Icho wahanyeyyohi miigti Waakh tuso daahaan. I'daasenyi wihi goorat Waakh Yoona ka enenyet tuse on menye, walah addane lasiicho mele.
[30] A mehe Yoona goorat ilkerengeetti Ninaawi ka saggi Waakh isooergate iche 'doo'd tuse. I'daasu la Ínam Aadam laka wihi isoobaho saggi Waakh usu isooerge iche 'doo'di i'dee tusaan.
[31] Ibeenki Waakh 'doo'd hukkumo la makhaabassi karnatenye ili Cheeba a kahta 'doo'di i'dee uskeel igoossa. A mehe iche goorat harra gin'dohicheeda katimiyye kharati karnati Soolomon layadeeh khabe dagansatte, toolla la etoo Soolomon laka kaween kallaay.
[32] Ibeenki Waakh 'doo'd hukkumo, 'doo'di ili Ninaawi a tolossata 'doo'di i'dee cheekta. I'di tahe icho maanti Yoona Yeedi Waakh icheeke, uskeelicho a kasoonokhteene, toro la etoo Yoona kaween kalla atin leejira.
[33] “Et taa bolkhicho inti lakadagcho ommos baakhuul iliis gesso mele. Taa a labolkhicha kombor lakorcha, 'dee 'doo'di min soogelo il kaarga.
[34] Issaah i'di taa u sartaah banaye ikeenta. Chirri indohaah haagganyahiin, sartaah tuumman laka banaye buuha. I'daasenyi chirri indohaah suujyahiin, sartaah tuumman a mug'di.
[35] Tab gi'de banayhi at khabto uus icho mug'di itaahan.
[36] Maantaka chirri sartaah tuumman banay buuhaane intoo rucchul laka mug'di ikajirin, sartaah dakkhan a bildiikhta gon, i'di chirra banayhi taa kabolkhaan u.”
[37] Chirri Yeesso yeed massiche ka etoo Farissaayee minkiis ka golol iwahe. Yeesso 'deerka min gele komborti ballaaddane lakagolossati garabiche ka dikkil kareeye.
[38] I'daasenyi eti Farissaayo chirri us Yeessohi geeddi us igolossan dahano idikhan arge ka weyti girmeeste.
[39] Kamur 'deerka wihi us iyidah, “Atinha Farissaayo, kokkoob ichoow baakhuul khariissa dikhtaane, i'daasenyi uuriin goya 'damaam ichoow suujoone buuha.
[40] 'Dalammeey! Waakkhi sartiinti addan haaggiche on menya goya laka haaggiche?
[41] I'daasenyi gololi baakhuul goya kijiro miskiin siicha 'dee walah tuumman ka bi'dir a bahtaanee.
[42] “Atinhi Farissaayee sinati atin sugto eenna a buure! A mehe atin geeyohi golol haaggicho i'di maanta nyaayka ichoow imboogayyohi fil ittaawe ka Kamur gisi tomonnaatteet a ibihissaan. I'daasenyi 'doo'di jiti fissan ka lahukkumo ichoow 'dooninti Waakh a 'diisseen. Wihi atin laka'doono a atinhi Kamur gisi tomonnaatteet ibihissaan, i'daasenyi wahanyeyyohi weyti khumman a'diinna.
[43] “Atinhi Farissaayee, sinati atin sugto eenna a buure. A mehe minassi weysiite Ya'huud ka komborohi weynaaneete 'doontaane, toro la atinhi sokkoyyo ka inkaanyit ka atin labariiticho 'doontaan.
[44] “Sinati atin sugto eenna a buure. A mehe atin a i'di hawwaalohi dagah ikhabine, enenyet igaranne sarchooda on yabti.”
[45] Tagaankoo amurree wihi us Yeesso ilaabe, “Eti ween, chirri at waha elatti at nah laka a nah leeabaarranta alah!”
[46] Yeesso wihi us ilaabe, “Atinhi tagaammeti amurree, sinati atin sugto eenna a buure! Atin huleesi enenyet iubaa'dane enenyet karartaane, atin rubeytiin la far ma okkhissaane enenyet ma leekhabattaan.
[47] “Sinati atin sugto eenna a buure, a mehe atine go'ddassi enenyet lakahawwaalo 'doo'di Waákh íyeyyeedo idissaan, aacchinyetiinna la 'doo'di Waákh íyeyyeedo bakkisse.
[48] Atin 'deerka aacchinyetiin wihi iche yeesse a ayyissaane gar a laabtaan. Icho 'doo'di Waákh íyeyyeedo a bakkicheene, atin la hawwaalohicho disseen.
[49] Jeentetaas u wihi Waakh kharatiis ka essi kallaayo, ‘'Doo'di Waákh íyeyyeedo ichoow ergaano a ierga, icho la gaasoo a yagiisiin, gaasoo laka sina omhichaan.’
[50] Maantaka Waakh 'doo'di i'dee a hukkuma jeenteti diiggi 'doo'di Waákh íyeyyeedo u' goorat Waakh harra soouume lakhubuu.
[51] Uus ogoos Aabel kasookhabatti ichoowka ogoos Sakkariiyahi chalagti hoola lakasoorriyoocho ichoow minki Waakhe buure dahcho lakayigis eleessa. 'Doo'di i'dee la wahaas tuummane lakahukkuma.
[52] “Atinhi tagaammeti amurree, sinati atin sugto eenna a buure! Atin 'doo'd jiti us Waakh kaabti a kadagisseen. Atin rubeytiin jitaas ma raahtaane, 'doo'di addan la usuhi jitaas tabo a jeyisseen.”
[53] Inkoo Yeesso intaas katabe ka tagaammeti amurre ichoow Farissaayo ba Yeesso weyti tirrimeene toro bolokh ka Yeesso wihi buure worsateen.
[54] Icho la saggoo icho Yeesso yeed ka i'helaane icho ikhabtaane 'holaan.