[1] Waakh saahka ínam Sakkariiyaki Yoohana layadeeh hidaad ka wori us 'doo'd icheeko siiche. Maantaas la Kaaysarhi Tibeeriyas layadeehe gu'h tomon ichoow chan karnati ili Rooma tuumman eheet. Boontiyo Bilaato la gaafanahi boroofenhi Ya'huudiya eheete, 'Herood Antiiba la boroofenhi Gaalilaaya itoolla, walaaliiski Fiilif layadeeh la boroofenhi Itureeya ichoow Tirakoniiti itoolla, Laysaniyas la usú boroofenhi Abileen itoolla.
[2] Aanas ichoow Kayaafas la kuhaaniyyohi wewweene eheneet.
[3] Yoohana la hawti 'dusso Yoordan tuumman kaassohte. Ayti Waakhe us cheeke la a ki 'doo'd uskeelicho kasoonokhti, ulla baattissiyo, 'dee Waakh uskeelicho ikakuto.
[4] Saggi buuggi eti goorat Waákh íyeyyeedo Isaaya layadeeh liikachiiruu, “Etoo hidaad ka a rirriira, ‘Kamur jit imujjummoocha, jiti us leeyamiit ficcha.
[5] Inti ankhare tuumman buuhicha, halal tuumman ichoow kuro iskeekkaacha, jitassi khokkhollokkhan tuumman la ficcha, jitassi sussuuje la mujjum haaggicha.
[6] Weeli enenyet tuumman la 'dee saggi Waakh 'doo'd iribo a arga!’ ”
[7] 'Doo'di ittaawenye baattissiyoti labaattissiyo 'doono la Yoohana iyimiyye, Yoohana la wihi us iyidah, “Dessi Toof! Ayyo atin tootooche 'dee holi Waakh dowwanoha ka keeno kafiriddaan?
[8] Taba gurnaanki saggi rumanka atin uskeel ikasoonokhatteen tuso dela. Taba la iisekkeysanna, ‘Aburaaham a aacchihaanya,’ eelanna. A mehe wihi an atin isoocheeko, Waakh a geeddi us dagahta urgiyicho us nyaakhut nyaakhut Aburaaham kayeelo!
[9] Waakh i'di eti uroti geeyo hiiyyay khabaani goosso dahan kakhabuu kola 'dee a atin goocha. Geeyi gurnaanki haaggan idelin tuumman la a lagoocha 'dab goya lakalug'da.”
[10] Urur wihi us Yoohana worsate, “Mehe 'deerka yeello?”
[11] Yoohana wihi us ilaabe, “Eti ubbaar lamma derdeer khabo, eti ikhabin koo a siicho, eti golol khabo la ki ikhabin a leegismo.”
[12] 'Doo'doo kooddi goocho baattissiyo yimiy laka wihi us Yoohana worsate “Eti ween nah la mehe yeello?”
[13] Yoohana la wihi us ilaabe, “Taba chilimme geeddi la'doono on 'doo'd kagudda, wohoo rucchul laka akorsanna.”
[14] Iskartoo laka wihi iche Yoohana worsatte, “Nah la mehe yeello?” Wihi us ilaabe, “Taba enenyet miig ka chilimme asarina ommos enenyet wihi beenaat akacheekina. Macchaara geeddi atin 'hessaan oollo'dina.”
[15] 'Doo'd wohoo khummane suge. Uurassicho ka kol Yoohana Ki Lasubhe lasugo yahe kamasseen.
[16] Yoohana la wihi us icho dakkhan ilaabe “An toolla bicche atin kabaattissiya, i'daasenyi etoo ani ikaween a yamiit. Anna falfihi kobtiissa an jalkhicho ma mu'dan. Ulla Rubeyti Munyee ka ichoow 'dab ka a atin baattissiya.
[17] Birtiisti gurnaan lakahafaricho, dahane kakhaba. Inti gurnaan lakatumo hara, 'dargaayye koondi kichiba, i'daasenyi urfo 'dabi jirtuu ijitin goya kichiba.”
[18] Yoohana la yeedassoo ittaawe ka enenyet uur miigooche Wori Haaggan icheeke.
[19] I'daasenyi maanti Yoohana 'Heroodhi gaafanee jeente 'Heroodiyati makhaabál walaaliisenye us diste ichoow suujoonki noole 'Herood 'hor yeele leejaakhuu,
[20] 'Herood suujoon kakhaye Yoohana jeela gesse.
[21] Geedda enenyet tuumman labaattissiyo, Yeesso laka yimiyye labaattissiye. Yeesso Waakh wahtaayi, sereye bakkaahte,
[22] Rubeyti Munyee la i'di kutukuurrug u serey ka isooyagte. Hooyoo la serey kasooyeede wihi us yidah, “Ati a Weeleeyki an weyti 'doono, weyti ikahamaadicho.”
[23] Maanti Yeesso hili us Yeedi Waakh cheeko sookhabte, Yeesso geeddi gu'h tomon seyyahe khabe. 'Doo'd tuumman la goorat kol Yeesso ínam Yuussuf yahe koogyahe. Yuussuf la a hiiy 'Heeli.
[24] 'Heeli la a ínam Maa'da'd, Maa'da'd la a ínam Laawi, Laawi la a ínam Meelchi, Meelchi a ínam Yaanay, Yaanay la a ínam Yuussuf.
[25] Yuussuf la a ínam Mataatiya, Mataatiya la a ínam Aamos, Aamos la a ínam Naa'hum, Naa'hum la a ínam Eesili, Eesili la a ínam Naagay,
[26] Naagay la a ínam Maa'd, Maa'd la a ínam Mataatiya, Mataatiya la a inam Seemeyin, Seemeyin la a ínam Yoosech, Yoosech la a ínam Yooda,
[27] Yooda la a ínam Yoowanan, Yoowanan la a ínam Reesa, Reesa la a ínam Serubabeel, Serubabeel la a ínam Cheeltiyeel, Cheeltiyel la a ínam Neeri, Neeri la a ínam Meelchi,
[28] Meelchi la a ínam Aadi, Aadi la a ínam Koosam, Koosam la a ínam Elmaadam, Elmaadam la a ínam Eer, Eer la a ínam Yoochuwa,
[29] Yoochuwa la a ínam Eliyeesar, Eliyeesar la a ínam Yoorim, Yoorim la a ínam Maa'da'd, Maa'da'd la a ínam Laawi, Laawi la a ínam Siimiyon,
[30] Siimiyon la a ínam Yuuda, Yuuda la a ínam Yuussuf, Yuussuf la a ínam Yoonam, Yoonam la a ínam Eliyakiim, Eliyakiim la a ínam Meleeya,
[31] Meleeya la a ínam Meena, Meena la a ínam Mataa'da, Mataa'da la a ínam Naa'dan, Naa'dan la a ínam Dawuud,
[32] Dawuud la a ínam Yeesse, Yeesse la a ínam Obeed, Obeed la a ínam Boowas, Boowas la a ínam Saalmon, Saalmon la a ínam Nahachoon, Nahachoon la a ínam Aminaadab,
[33] Aminaadab la a ínam Raam, Raam la a ínam 'Heesiron, 'Heesiron la a ínam Beeres, Beeres la a ínam Yuuda.
[34] Yuuda la a ínam Yaakoobo, Yaakoobo la a ínam Isakh, Isakh la a ínam Aburaaham, Aburaaham la a ínam Teerah, Teerah la a ínam Naahor, Naahor la a ínam Seerug,
[35] Seerug la a ínam Reewu, Reewu la a ínam Beeleg, Beeleg la a ínam Eeber, Eeber la a ínam Cheelah, Cheelah la a ínam Kaaynan,
[36] Kaaynan la a ínam Aarfakisad, Aarfakisad la a ínam Cheem, Cheem la a ínam Noowa, Noowa la a ínam Lameeg, Lameeg la a ínam Me'duseelah,
[37] Me'duseelah la a ínam Eenog, Eenog la a ínam Yaared, Yaared la a ínam Ma'halaleel, Ma'halaleel la a ínam Kaaynan, Kaaynan la a ínam Eenoch,
[38] Eenoch la a ínam See'd, See'd la a ínam Aadam, Aadam la ooyohiis Waakhe eheet.