[1] Chirri Yeesso waha dakkhan 'doo'd iyidahye us massiche ka, ilkerengeetti Kafarnaa'hum gele.
[2] Etoo koobbintoo iskareet itoollo la ilbooyiiskoo us weyti 'doono weyti khannanyahe, a omoottanyahe.
[3] Eta iskar itoollo chirri us Yeesso woriis daage ka, ewweenkoo Ya'huud ergate, Yeesso a lasoowaho, a yimaate ilbooyiis a samaacho.
[4] Chi'icho Yeesso iyimaateen ka hawwaasteene, wihi icho iyidaaheen, “A imasse cha'at eta waha iyeesso,
[5] a mehe yaafteen a 'doona, toro minkeenki weysiite Ya'huud laka a inno idise.”
[6] Yeesso 'deerka ewween raahe. Chirri us minki eti koobbinti iskareet itoollo idowwaate ka, etaas aalassiiskoo Yeesso or kasoodowche, wihi us iyidah, “Kamur, sina iiskawaarin, a mehe minkeeyki at tamiit ma mu'dan.
[7] Jeentetaas u anihi kiamiit ma mu'dane, i'daasenyi sooyeed ilbooyeey la a samaataa.
[8] I'di tahe ani rubeyteey laka a etoo iskarti addane ikawewween antohicho raaho, toro la iskarti addane an andi laka a jirta. Chirri an koo, ‘Kaale,’ iidah a yamiit. Chirri an koo, ‘Nyaam iro,’ iidah la a irta. Chirri an ilbooyeey, ‘Waha yeel,’ iidah la a yeela.”
[9] Chirri Yeesso waha daage ka weyti girmeeste. Ururi usu sooraaho iurgiye, wihi us iyidah, “Wihi an atin iadeeh, an injire yaafohi Issiraayel goyaka laka eti geedda weyti Waakh kakhuufo ma 'helin!”
[10] 'Doo'di kootte lasooergate 'deerka min inokhte, ilbooyi khannan usuhi samaate 'heleen.
[11] Yomboka Yeesso abattitiis ichoow ururi buure khabaayi ilkerengeetti Naayin irte.
[12] Chirri us aritti ilkerengeeteet sooeleele ka, inanki kaldaye makhaabassoo muunkhee leetehe usuhi buje hawwaal liisi'do kasooyegeen. Ururi buurenye ilkerengeet kayimiy la iche a leejire.
[13] Kamur chu'us makhaabál arge ka, uur isoonugleeste wihi us iyidah, “Ooyine chubbah!”
[14] Ulla 'deerka irte, lallaabohi inanki buje lakasi'do 'daare. 'Doo'di si'do la tolossate. Yeesso la wihi us yidah, “Irka sookahe kidowa!”
[15] Inanki buje soorronte, yeyyeede. Yeesso la inam abarti desse dahan gesse.
[16] Icho tuumman roorro gesse, Waakh saa'deene, “Etoo weene Waákh íyeyyeedo goyteen a yimiy. Waakh a yimiyye 'doo'diis gargaara,” yidaaheen.
[17] Yeessó woriis ili Ya'huud ichoow ilassi addane isoodow tuumman kataa'he, ladaage.
[18] Abatti Yoohanahi Enenyet Baattissiyo wor Yeesso tuumman Yoohana siisse. Ulla chirraakka et lamma wahe,
[19] Kamur iergate wihi us worsate, “At a Ki Lasubhe lasugo, bal etoo addane sugna?”
[20] Reeraas lammee chirri us Yeesso iirte, wihi us iyidah, “Yoohanahi Enenyet Baattissiyo nah sooergate, mehe worsata ya, Ki Lasubhe lasugo a ati, bal etoo addane sugna?”
[21] Yeesso la chirraakka 'doo'di ittaawenye khakkhannan ichoow ki bolokh khabo ichoow ki ginnayyo dakhtaan samaache. 'Doo'di ittaawenye indo laa la indo fure.
[22] 'Deerka wihi us reeri lasooergate ilaabe, “Nyaama nokhda, Yoohana waha atin agarteen ichoow waha atin daagteen icheeka. 'Doo'di indo laa indo a bahcha, ki goorat luhlo ikhabin la luhlo a bahcha. 'Doo'di bu'dayyo sar kakhabe a lasamaacha, ki dogo laa la dogo a bahcha. 'Doo'di tuume omoot a lakasookahcha, 'doo'di wahanyeyyohi Waakh miinsan ka miskiine la Wori Haaggan a liicheeka.
[23] Eti Waakh imaalo a ki jeenteteey u kakhuufnaanki us ikakhuufo i'diin.”
[24] Inkoo reeri kootte Yoohana sooergate nokhte ka, Yeesso Yoohana woriis urur kaleeyyeede, wihi us yidah, “Bal wihi atin hidaad ka iratteene sooagarteen kamalda. Etoo 'dabakhenye i'di hoosi hafar sesseehicho mee iratteene agarteen.
[25] Bal wihi atin iratteene sooagarteen kamalda. A etoo gaaddi haaggan khabo? Mele! 'Doo'di gaaddi gato miige khabo jiroti wohoo liiwaayin jiro, a 'doo'di minassi karnatoot fiddiyo.
[26] I'daasenyi mehe iratteene agarteen? Eti Waákh iyeyyeedo agarteen? Rumanka eti atin agarteen, eti Waákh íyeyyeedo laka a kussanyahe.
[27] Eti woriis Chiirnaanneti Waakh ka lachiire a kan. “ ‘Yeya, ergattiteey ortaahha erga, iche rubeyohi enenyete tannabissa.’
[28] Wihi an atin iadeeh weeli enenyet goyaka, eti Yoohana kaween ma jiro. I'daasenyi eti dakhi Waakh ka 'daran laka, us Yoohana a kaweenyahe.”
[29] Enenyet tuumman, 'doo'di kooddi goocho laka, chi'icho wihi Yeesso yidah daageen ka, saggi jiti Waakh ifissanyahe khaatteen, a mehe Yoohaná icho baattissiye.
[30] I'daasenyi Farissaayo ichoow tagaammeti amurre jeenteti Yoohana icho ibaattissiyin u, mali Waakh icho ikhabe a 'dii'deen.
[31] “Kamalda bal, 'doo'di wey'da 'deerka mehe iokkanaacho? Icho mehe iyoogyahiin?
[32] Icho a i'di nyaakhuti sokko goyaka nyaakhutoo addan kariiro, “ ‘Nah a gurroonne, atin la gurro ma nah leeokkhin, nah geeyi maanti enenyet buje ladowo atin a isoodowne, atin la ma ooyin,’ isidowo.
[33] A mehe Yoohanahi Enenyet Baattissiyo maanti us yimiy farsotoo rucchule sabiib laka ma ubhaabane, toro la geeddi buure af hiite, atin la jeentetaas u wihi atin tidaaheen, ‘Usu alah ginna dakhatta!’
[34] Ínam Aadam la a yimiyye golossate, farsoti sabiib laka dame, atin la mehe tidaaheen ya, ‘'Damaanki toro meleefeenye 'doo'di kooddi goocho ichoow ki uskeel leh aal kabahsati kalla.’
[35] I'daasenyi kharati Waakh runtiche jiroti 'doo'di raaho tuummane lakaarga.”
[36] Etoo Farissaayee maantoo Yeesso golol iwahe, Yeesso la 'deerka minki etaas irte, komborti ballaaddane lakagolossati garabiche ka dikkil kareeye.
[37] Makhaabassoo ilkerengeettaas ka uskeel kaassohatte chi'iche saggi Yeesso minki etaas Farissaayee ikagolossati daagte ka, kurunkoo daakki alabaasta lakahaaggiche, miricchi kijiro sookhaatte.
[38] Yeessohi dikkil kajiifo adahtiis tolossatte ooyte, ilmohiche ka luhlohiis khuyyaamisse. 'Deerka tinticheti matah ka hiyyaayte, luhlohiis doddongatte, miricchi ka subahte.
[39] Eti Farissaayo Yeesso golol iwahe chirri us waha arge ka, wihi us uuriis goyaka yidah, “Chirri kootte rumanka eta eti Waákh íyeyyeedo yahe, makhaabassa 'da'ddaarto eti iche tahe a garta, saggi iche uskeel ikaassohatte a garta!”
[40] Yeesso wihi us ilaabe, “Siimon an wohoo an kisoocheeko a khaba.” Ulla wihi us yidah, “Eti ween isoocheek.”
[41] Yeesso la wihi us iyidah, “Reeroo lammee etoo kamurenye mog kakhabe. Etoo chilimmeti eti orrah kud chan hil haaggiche laguto iche kakhabe, ki addan la chilimmeti eti orrah tomon chan hil haaggiche laguto iche kakhabe.
[42] Inkoo reera lammatiis ba mog gunnaan agaafte ka, eti goorat chilimme leh, lammache ba mog lee'diiche. Kichokoh 'deerka eti mog leh weyti 'doona?”
[43] Siimon wihi us ilaabe, “Ani ka, ki chilimmeti buure lalee'diiche.” Yeesso la “Mujjume goosse,” iyidah.
[44] Yeesso 'deerka makhaabál iurgiye wihi us Siimon iyidah, “Siimon bal makhaabassa yey! At uus an kootte minkaah imiy bicchehi an luhlo kadikhdi laka ma isiinne, i'daasenyi iche ilmohiche ka luhlo a ikhuyyaamisse, tintiche ka la a ihiyyaayte.
[45] At dongo ka ma isoodowwaanne, i'daasenyi makhaabassa uus kootte an imiy luhloheey dongo ma kagoon.
[46] At subakki geeyi oolif ka matah ma isubhine, i'daasenyi iche luhloheey miricchi ka a subahte.
[47] Maantaka wihi an kiadeeh, makhaabassa uskeelicheki ittaawe a liikakute. A mehe 'dooninti buurenye itusatte. I'daasenyi eti uskeeloo rucchul liikakute 'doonintoo rucchul on Waákh tusta.”
[48] Yeesso la wihi us makhaabál iyidah, “Uskeelaah a liikaakute.”
[49] Martiti kootte golossatti wihi iche isitidah, “Eta uskeel laka 'doo'd ikakuto a ayyo?”
[50] Yeesso wihi us makhaabál iyidah, “Kakhuufnaanki at ikakhuufte a kiribe, tab nebey leeiro!”