[1] Geeddaka urur buuraate, aliffe laka kute ichoowka 'doo'd iskhar'dabte. Yeesso koloo abattitiis leeyeede wihi us iyidah, “Yeedad Farissaayo ki i'di booddati makaate fuurissee yuubsada. Wihi icho essaan tuumman ka a iskaayyeelaane suujoon taa'hichaan.
[2] Walah oboobsane liisoonyiikhin mala, ommos walah dagsane enenyet liiabin mala.
[3] Wihi atin mug'di ka tidaaheen, maalime ladaaga, wihi atin minan goyaka nabah ka isicheekteen la minan sarchooda hooyi saraat lakacheeka.
[4] “Aalassaay wihi an atin icheeko, 'doo'di sar on yagiise wahaas 'dubicho ka wohoo addan iyeelin akaroorina.
[5] I'daasenyi eti atin karoortaan a atin tusa. Ki inkoo us sar yigis antohi us meessi 'dabi armaanjireen kalug'do khabo karoora. Aa a atin iadeehe, taba usu karoora.
[6] Chimbir chan chilimmetoo rucchul ma lagato? I'daasenyi chimbirtoo kaldaye Waakh kadabo laka ma jirto.
[7] Rumanka, tinti matah kaajirto tuumman laka Waakh geeddi iche tahe a garta. Roorro akhabina, atin Waakh ortiis ka chimbirohi ittaawe a kussantihiinee.
[8] “Wihi an atin iadeeh, eti tuummane 'doo'd ortiis ka saggi us keey iyahe cheeko, Ínam Aadam laka herti Waakh ortiche ka, saggi us kiis iyahe a cheeka.
[9] I'daasenyi eti 'doo'd ortiis ka saggi us keey iyahe 'dii'do, herti Waakh ortiche ka a la'dii'da.
[10] Eti tuummane Ínam Aadam igafe a geeddi uskeeliis liikakuto. I'daasenyi eti Rubeyti Munyee igafe, uskeelaas ma liikakuto.
[11] “Chirri minassi weysiite Ya'huud ommos weynaan ichoow 'doo'di anto leh ortiis atin lakeeno 'dee atin lahukkumo, saggi atin isikaayyeeddaan ommos wihi atin sootadeehiin akawa'dwaa'dina.
[12] A mehe Rubeyti Munyee chirraas wihi atin tadeehiin a atin abissa.”
[13] Etoo urur goyaka wihi us Yeesso iyidah, “Eti ween, walaaleey leeyeede dahal ileegisam idah.”
[14] Yeesso wihi us ilaabe, “Eta, ayyo ani eti 'doo'd hukkumo ommos hili dahal atin lagiso isiiche?”
[15] Yeesso la wihi us icho iyidah, “Yuubsada! 'Damaanki atin wihi atin ikhabin 'doontaan ka isyaakhicha. I'di tahe jiroti mujjume hoolahi at khabto mee katamiit.”
[16] Yeesso la toro mammahta 'doo'd icheeke, “Gosi etoo kamure gurnaanki buurenye bahche.
[17] Eta gos leh masse wihi us uuriis goyaka yidah, ‘Mehe yeelo? Inti an gurnaankeey kachibo ma khabo.’
[18] “'Deerka wihi us yidah, ‘I'dane yeela. Koondinyetaaya jejjebcha 'dee ti burbuure disa. Intaas gololeey tuumman ichoow meeheey ba kachiba.
[19] Ani la wihi an isiadeeh, “Wihi buurenye toro haaggane at gu'hassi buure meel isigelisse a khabta. Sina at khabto mele, samacchaar on golosso, hamaad.” ’
[20] “I'daasenyi Waakh wihi us etaas iyidah, ‘'Dalamoow! Ibeenka goya rubeytaah a lakakhaata. Ayyo 'deerka waha at isitannabisse 'hela?’
[21] “Waha a wihi eti tuummane wihi harrata ka kamurenye, i'daasenyi wihi Waakh 'doono ka miskiine iyateeh.”
[22] Yeesso 'deerka wihi us abattitiis iyidah, “Maantaka wihi an atin iadeeh, jirotiin akawa'dwaa'dina, wihi atin tamhiin, ommos sartiin ka wihi atin gessattaan.
[23] Jiro golol a kussantahe, sare la gaad a kussantahe.
[24] Bal khaalkhe yeya, ilmo icho gos kichibaan mele, koondi icho khabaane icho golol kachibaan la mele. I'daasenyi Waakh on goollicha. Atin la geeddoo meheenye weyti chimbiro kussantahiin.
[25] Etiinkoo maanta wa'dwaa'di us wa'dwaa'do ka jirotiis saha'ddoo kalday kakhayaayi?
[26] Chirri at waha rucchul laka iubaa'dan, a i'doh wihi addane buure wa'dwaa'd ikakhabta?
[27] “Bal fiikh saggi iche ibahto yeya. Hil icho haaggichaane icho gaad isikahaaggichaan mele. I'daasenyi karnati goorat Soolomon layadeeh laka kamurroonkiis tuumman khabaayi gaaddiis geeddi fiikhta ma haaggan.
[28] Chirri Waakh hoosi keley baho, toolla jiro saahta 'dab lakalug'do gaado, geeddoo meheenye atin weyti atin gaada? Atin eenna geeddoo rucchul on Waakh kakhuuftaane!
[29] Kol dakkhan la wihi atin tamhiin ommos wihi atin dantaan akaloo'dina. Wahanyeyyohaas akawa'dwaa'dina.
[30] I'di tahe 'doo'di Waakh igaranne harratane wahanyeyyohaas kaalloo'da. Aabbahiin saggi atin waha dakkhan i'doontaan a garta.
[31] I'daasenyi dakhi Waakh 'don'doon, ulla wahanyeyyoha dakkhan a ikaasookhayaa.
[32] “Cha'atin i'di woyhoo adi rucchul tahiin laka, roorro akhabina. I'di tahe wihi Aabbahiin gooche, us hamaad ka dakhiis a atin siicha.
[33] Wihi atin khabtaan ororicha, 'dee chilimme miskiin siicha. Urgohi chilimme jirtuu imassan isiyeela, kamurroonkiin goobi Waakh gessa, inti icho i'daaru laka ikanuglaanne, liihatine, riirintoo rucchul laka ika'daarin gessa.
[34] A mehe inti kamurroonkaah kajiro, iche uuraah laka kajira.
[35] “Taba tannabda, gaaddiin mujjum marda, taassiin la iiche jitine, 'dee Waakh ihila.
[36] I'di ilbooyyeti kamurichoki oroos kasoonokhti sugto ateeha. Icho la uus kamuricho sootolossati chirraas on afaf ifuraan.
[37] Chirri kamuricho ichohi iur'dine fiddiyo on sooeleele, hamaadi buurenye khabaan. Rume atin icheeka, eta kamure gaaddi ilbooyye gessata, ilbooyye komborti ballaaddane lakagolossati garabiche ka dikkille kareecha ulla yamiite icho goollicha.
[38] Ilbooyyeta hamaadoo geeddohenye khabta chirri kamuricho naanokho ommos baryo afiche laka yimiyye, us ichohi iur'dine fiddiyo on sooeleele!
[39] I'daasenyi waha abda, chirri ooyohi min leh saha'ddi eti minkiis hato kayamiit garti, minkiis ma 'diicho ma lajebcho.
[40] Atin laka toorribda gi'de i'di tahe Ínam Aadam saha'ddi liikamurine yamiite.”
[41] Beetero wihi us worsate, “Kamur, mammahta nah kalday on nah miinsantahe bal 'doo'd tuumman on?”
[42] Kamur wihi us ilaabe, “Kamalda bal, ilbooyi weene lakakhuufo toro kharee a ayyo? A ki kamuriis ilbooyyetiis dahantiis gesso 'dee saha'ddi mujjume ka ilbooyye goollicho.
[43] Ilbooyi liimaalo a ki maanti kamuriis soonokhti usuhi hiliis mujjum haaggicho sooeleelo.
[44] Rume atin icheeka, kamuriis wihi us khabo tuummane dahantiis gessa, iweynaacha.
[45] I'daasenyi eemba ilbooya uuriis ka ‘Kamureey geeddi deere khaata soonokhta,’ yidahye kahye, ilbooyyeti mejele ichoow ti deddeyyah jahye, toro la sukuuku bihiyye farso damye ichoowka meleefu yitah.
[46] Kamuri ilbooyaas, maanti us ikamurine soonokhta toro saha'ddi us igaranne soonokhta. Usu seleye goggoocha, toro 'doo'di Waakh irummeysan goya gata.
[47] “Ilbooyi wihi kamuriis usuhi yeelo 'doono garti toro la iyeelin, kolassi ittaawenye lajaha.
[48] I'daasenyi ilbooyi wihi kamuriis usuhi yeelo 'doono igaranne khufe, kolassoo rucchule lajaha. Eti tuummane wihi buure lasiiche la, wihi buurenye lakasuga, eti wihi weyti buure dahan lagesse la wihi weyti buurenye lakasuga.
[49] “Ani a imiyye harra 'dab kabolkhicha. Incheenka la kootte 'dab a lakabolkhiche.
[50] I'daasenyi koloo sina liikawaaricha, amuut. Anna jeenteti wahaas u a bolkha ichoowka wahaas kutaan.
[51] Atin maanta kol ani harra nebey keene koogtahiin? Mele! I'daasenyi seleyhi an 'doo'd fido iimiy.
[52] Uu' toolla kakhabatti, minki et chan khabo afafe iswaaya. Et seyyahe isigessa, lammati addan dihta, lamma la ti seyyahe dihta.
[53] Seleye lagowa, ooyo ínam ichiiyowa, inam la ooyo ichiiyowa, abare inám ichiiyowta, iname la abár ichiiyowta, abare inanti lasoodise ichiiyowta, inanti lasoodise la seyyohtiche ichiiyowta.”
[54] Wihi us urur iyidah, “Chirra atin baali bahay kasookoro agarteen, chirraas on mehe tadeehiin ya, ‘Hir a soo'deya.’ I'daas on la tateeh.
[55] Chirra hafar anki gurro kayamiit la mehe tadeehiin ya, ‘Il a sookululaata.’ Rumanka la i'daas on tateeh.
[56] Iskaayyeessooy! Atin harra a yeytaane, serey yeytaane walah kaabattaan. A i'doh wihi an yeelo iagartaane, toro wohoo rucchul laka ikaabanna?”
[57] “A i'doh goytiin ka wihi mujjume igoonna?
[58] Chirri etoo wohoo kaacheekti ulla kootiin kigeen 'doono, geeddi atin jit raahtaan, weyti hol dowe isineyba. Cha'at i'daas iyeelin, eta eti 'doo'd hukkumo kigeecha, ki 'doo'd hukkumo la dahanti iskareet kigessa, eti iskareet la jeela kigessa.
[59] Wihi an kiadeeh, jeelataas goya ma kasoobahto ichoowka mogtiis tuumman hiyyaayta.”