[1] Geeddaakka la 'doo'doo intaas kijire saggi Bilaato 'hor amuri 'doo'doo boroofenhi Gaalilaaya ichohi Waakh soorriyo ibahcho lakayagiis ibahche Yeesso icheeke.
[2] Yeesso wihi us ilaabe, “Atin ka maanta, 'doo'da Gaalilaaya jeenteti icho bolokkhi i'dee liitusuu kol us 'doo'di Gaalilaaya tuumman ka 'doo'di weyti uskeel leh yahe koogtahiin?
[3] I'daas mee. I'daasenyi atin laka chirri atin uskeeliin ikasoonokhan, atin tuumman laka a tuuntaan.
[4] Ommos 'doo'di tomon ichoow siyyeetenye maanti koondihi deere dagaheet Silowaam kasooreye tuume, kol icho weyti 'doo'di Yeerusaleem yaal tuumman goyaka uskeeli buure yeele koogtahiin?
[5] Mele! Wihi an atin icheeko, atin laka chirri atin uskeeliin ikasoonokhan, atin tuumman laka a tuuntaan.”
[6] Yeesso 'deerka mammahta 'doo'd ibahche, “Etoo goorat geeyi fiige gosiis goya katoolliche. Ulla irte geeyaas yeyyeye, gurnaan kayowte. I'daasenyi, gurnaan us geey ka'hele mele.
[7] Ulla 'deerka ilbooyi gos khuto wihi us iyidah, ‘Gu'h seyyah dakkhan an geeya fiig gurnaan on kayowda, ulla gurnaan us delo mele. Gooy uus immarah harra katoolline.’ ”
[8] Et wihi us ilaabe, “ ‘Eti ween, 'dii toro gu'ha laka a fiddiyo, amba 'dollohiis khuta, laag laka kachiba 'dee bal a agarro.
[9] Chirri us berri gurnaan dele, a haaggantahe. Chirri us idelin la goocha.’ ”
[10] Yeesso maantoo Seeri Lanaso ka minkoo weysiite Ya'huude 'doo'd wori Waakh kaabcha.
[11] Makhaabassoo ginna gu'h tomon ichoow siyyeet luhlo tirte la minkaas goya kajirta. Iche la goorat a khonnokhte, fit ma sohatti.
[12] Chirri Yeesso iche arge ka, iche enenyet ortiis iwahe toro wihi us iyidah, “Makhaabassa, sugeeraah a lakaabahche!”
[13] Ulla dahantiis makhaabassaas korche, iche la chirraas on fit tolossatte, Waakh koolisse.
[14] Jeenteti Yeesso makhaabassa Seeri Lanaso isamaachuu, eti minki weysiite Ya'huud itoollo weyti hollowe. Ulla wihi us 'doo'd iyidah, “Ibeen lih enenyet hiliis haagsati a jirta. Eti khannan 'deerka ibeenneta lihe goyaka a yimaate a lasamaacho, Seeri Lanaso mee.”
[15] Kamur wihi us ilaabe, “Iskaayyeessooy! Etiimba Seeri Lanaso ka heeriis ommos eheliis inti lakahide ka ma furo ma yegcho?
[16] 'Deerka makhaabassa rumanka hiiy Aburaahamenye Seytaan gu'h tomon ichoow siyyeet tuumman hide, Seeri Lanaso wihi hide ma lakafuro?”
[17] Chirri us i'daas yidah ka 'doo'di kootte Yeesso tirrimo lakhaanyo khaatatte, i'daasenyi 'doo'di addan haaggi noole us yeelo kahamaade.
[18] Yeesso toro wihi us 'doo'd worsate, “Kamalda bal, dakhi Waakh a koo mehe? Mehe iokkanaacho maanta?
[19] A i'di ilinti weyti rucchule etoo khaate gosiis goyaka il gesse. Ilime bahte geey titahye, chimbirohi saraat la liikhimohiis kafiddiyaan.”
[20] Toro wihi us worsate, “Dakhi Waakh mehe iokkanaacho?
[21] Dakhi Waakh a i'di makhaabassi booddati makaate fuurisso wohoor khaatte, ingangaanoti buure kakhayte ichoowka ingangaano tuumman fuurte.”
[22] Yeesso orey isohte anki ilkerengeetti weene Yeerusaleem tabe. Geedda us sohti la ilkerengeet ichoow goobab dah kagooche, 'doo'd wori Waakh abche.
[23] Etoo la wihi us Yeesso worsate, “Kamur 'doo'di uskeel lakaribo a koo rucchul on a?” Yeesso la wihi us ilaabe,
[24] “Hol dowe afafhi juukhe kagel. I'di tahe wihi an atin iadeeh, 'doo'di buure afafhaase kagelin 'doona, i'daasenyi ma yabuu'diin.
[25] Chirri eti min leh sookahe afaf hide, min khariissa tolossattaane, afaf jahtaane, eti min leh hawwaassattaane, ‘Eti weenoow, afaf nah ifur,’ idowtaan. “I'daasenyi wihi us atin isoolaabo, ‘An ma atin gardi, ommos inti atin katimaateen ma gardi.’
[26] “Atin la wihi atin tadeehiin, ‘Nah goorat a kileegolossanne, at la ilkerengeetoheenyo ka 'doo'd wori Waakh abisse.’
[27] “I'daasenyi wihi us ilaabo, ‘An ma atin gardi, ommos inti atin katimaateen ma gardi. Nyaama ikataba atinhi tuummane uskeel yeessaan!’
[28] Atin la maanti atin Aburaaham ichoow Isakh ichoow Yaakoobo ichoow 'doo'di goorat Waákh íyeyyeedo goobi Waakh ka agartaane, i'daasenyi atin atin lariho, a ooytaane bolokh ka ilko iskarobtaan.
[29] 'Doo'd beri ichoow bahay ichoow miig ichoow gurro kayamiite, meelassicho khaattaane, dakhi Waakh ka sukuuku isleegelaan.
[30] Rumanka 'doo'doo 'duboote ki oraat yateehe, koo oraat la ki 'duboot yateeh.”
[31] Chirraas on Farissaayotoo timiyye wihi iche Yeesso itidah, “Karnati 'Herood Antiiba layadeeh usuhi kiyagiise 'doona, inta katab.”
[32] Yeesso wihi us ilaabe, “Nyaama 'dowwohotaas wihi atin itadeehiin, ‘Ani maalinka ichoow saahta ba 'doo'd ginnayyo kabahcha, 'doo'd samaacha, ibeenki seyyahnaatteet ka la hili goorat an iimiy massicha.’
[33] I'daasenyi maalinka ichoow saahta ichoow saahti yomboot ba a sohda on. Rumanka la et Waákh íyeyyeedo ilkerengeetti weene Yeerusaleem khariis kayamuut mele.
[34] “Yeerusaleemoow, ilkerengeetti weenoow, atin 'doo'di Waákh íyeyyeedo a tagiisiine, 'doo'di Waakh atin isooerge la dagah kachibtaan. Saggi orran lukki weylassiis barbarre goya igessatuu, an geeddi buurenye anihi dahanoheey atin koogoogo 'doone, i'daasenyi atin ma 'doonin!
[35] Yeya, Waakh rubeytiis minki Waakhe buurenye kiine a kaguure minki marah kalday atin ikatabe. Wihi an atin icheeko, yombuu toro ma iagartaane ichoowka, ‘Waakh ki magahi Kamur kayamiit a imaale,’ tadeehiin.”