[1] Maantoo makhaaballeti kooddi goosso ichoow 'doo'doo 'doo'di uskeel khabo liiekkaacho a yimiyye wihi Yeesso 'doo'd abcho dagansate.
[2] I'daasenyi Farissaayo ichoow tagaammeti amurre ba nyunnyuweene wihi icho yidaaheen, “Eta 'doo'di uskeel lehe soodowweesta toro leegolossata!”
[3] Yeesso la 'deerka mammahta ibahche,
[4] “Eemba etiinkoo iiyti kudoowenye khaba, koo la baabaa. Etaas, iiyti tomon saagaal ichoow saagaale inti iche yaakhto kataba, ki kaldaye baabe yowta ichoowka 'hela menya?
[5] Chirri us 'hele ka weyti hamaada, naf adah sookorsata
[6] goob keena. Ulla 'deerka ollokkiis ichoow aalassiis dakkhamba waha wihi us iyadeeh, ‘Kaaleya a isleehamaano, i'di tahe naffeeyki iiyyaate kootte baabe a 'hele.’
[7] Wihi an atin iadeeh, saggaas on u, goobi Waakh ka hamaadi buurenye jira jeenteti etoo kaldaye uskeeliis kasoonokhtuu. Hamaadi eta khabo hamaadi et tomon saagaal ichoow et saagaal fiffissane uskeelicho ikasoonokhan weyti kussanyahe.
[8] “Ommolla eemba makhaabassoo chilim tomon khabto, koo kalday a kabaabe. Makhaabassa taahiche a bolkhissa min harta chilinkiche mujjum yowatta ichoowka 'hessa menya?
[9] Chirri iche 'hesse la deyyehoti aalassichee ichoow ti ollokkichee tuumman wahta wihi iche itadeeh, ‘Kaaleya a isleehamaano, i'di tahe an chilinkeeyki baabe a 'hele!’
[10] Wihi an atin icheeko, saggaase herti Waakh ihamaadda chirri etoo kalday uskeeliis kasoonokhte.”
[11] Yeesso yeed orey iwoye, “Makhaabaloo yeeletoo lammee khabo a jire.
[12] Inanki nugul kahe wihi us aabbahiis iyidah, ‘Aabba, dahalheeyki ani imiinsan isii!’ Makhaabal 'deerka hoola yeele lammache gise.
[13] “Inkoo geeddoo labarye ka, inanki nugul wihi lasiiche dakkhan ororiche, iloo fogaat irte, ilaas ka hoolahiis kagir'daame.
[14] Wihi goorat us khabe tuumman massiche. Saahka abaartoo uskul ilaas gesse raarahe ititah.
[15] Ulla irte hili etoo ilaas gele, et la gosas ierge, 'dee golcha a yaakhicho.
[16] Ulla gololi golcha taham ohom 'doone. I'daasenyi et wihi us yaham siicho mele.
[17] “Maanti matah soonokhte, masse wihi us uuriis goyaka yidah, ‘'Doo'di aabbaheey kireeste gololi yaakho us yahame ichoowka us soowaacho a khaba, ani la kalla inta ka raarahe ikhaatta!
[18] A kaha aabbaheey inokhda wihi an iadeeh, “Aabba an Waakh ortiis ka ichoow ortaah ka uskeel a yeele.
[19] Kola ma imalin chirri weelaahha liiyadeeh, i'di etoo at kireysatte ikayeelo.” ’
[20] 'Deerka kahe anki aabbahiis jiro fool siiche. “I'daasenyi geeddi us goobicho isooeleelin on fogaka aabbahiis usu arge, uur isoonugleeste inyaame sorboobte dongate.
[21] “Inam la wihi us yidah, ‘Aabba an Waakh ortiis ka ichoow ortaah ka uskeel a yeele. Ma imalin chirri kola weelaahha liiyadeeh!’
[22] “I'daasenyi aabbahiis ilbooyyetiis wahe wihi us iyidah, ‘Nyaama dafarti weyti haaggan sookhaata inam gessa. Lahaagti far sookhaata far gessa. Kobo laka sookhaata gessa.
[23] 'Dee irda maari weyti ruusan sookhaata khala sukuuku a gello, a hamaano!
[24] I'di tahe inankeeyka a i'doo goorat us yumuyye toolla la a sookahe, goorat a baabe toollaka a soonokhte!’ Sukuuku 'deerka labahche.
[25] “Geeddaas dakkhan la inanki teyyane gose khuta. Chirri us goob yimiyye us min isoodowwaate ka, kowdoti 'doo'di gir'daamo daage.
[26] Ilbooyoo wahe wihi us worsate, ‘Mehe jira?’
[27] Wihi us ilaabe, ‘Walaalaahki goorat baabe iche soonokhte, aabbahaah la heeri ruusan ikhale. I'di tahe usuhi nebey khabo toro la haaggane yimiy.’
[28] “Inanki ween hollowe min gelin 'dii'de. Aabbahiis 'deerka bahe hawwaaste, mine soogessaa.
[29] I'daasenyi wihi us aabbahiis ilaabe, ‘Aabba an gu'hassi ittaawenye i'di bow'dataah u hil kihaaggiche. Anna injire amurretaah ma kutin. At mehe injire isiisse? Weeli makhaleete an aalasseey lee'dubdi laka ma siin!
[30] I'daasenyi inankaahka hoolahaah tuumman malaayayyo on kamassiche. Maanti us soonokhte ka, at la kahte heeri weyti ruusan ikhasse!’
[31] “ Aabbahiis la wihi us iyidah, ‘Inankaaw at orran dakkhan a ileejirta, wihi an khabo tuumman la a wahaahha.
[32] I'daasenyi a imasse chi'inno sukuuku bihinno hamaano, a mehe walaalaahka goorat a i'di eti yumuyye toolla la a jira, goorat a baabe toolla la a soonokhte.’ ”